Vana Xikombiso Lexinene Hi Ku Vulavula Ni Hi Mahanyelo
1 Muapostola Pawulo u khutaze Timotiya leswaku a va xikombiso lexinene hi ku vulavula ni hi mahanyelo. (1 Tim. 4:12) Na hina hi fanele hi va xikombiso lexinene hi ku vulavula ni hi mahanyelo, ngopfu-ngopfu loko hi ri evutirhelini, hikuva hi ku endla tano hi ta va hi kombisa leswaku ha ti fikelela timbilu ta lava hi vulavulaka na vona kumbe e-e.
2 Hi fanele hi kombisa tindlela hinkwato ta mikhuva leyinene, to tanihi mahanyelo lamanene, ku anakanyela, tintswalo, ku titsongahata ni vuxiyaxiya. Hi ku kombisa timfanelo leti, hi kombisa leswaku ha swi xiya swiendlo swa hina leswi khumbaka mintlhaveko ya van’wana. Ku va ni mikhuva leyinene loko hi ri evutirhelini swi nga ha fanisiwa ni swo lunga leswi tirhisiwaka ku nandzihisa swakudya. Handle ka swona, swakudya leswinene swi nga phyama naswona swi nga nandzihi. Ku tsandzeka ku kombisa mikhuva leyinene eku tirhisaneni ka hina ni van’wana swi nga ha tisa vuyelo lebyi fanaka.—Kol. 4:6.
3 Vana Xikombiso Lexinene Hi Ku Vulavula: N’wayitelo wa xinghana ni maxewetelo lamanene i swiaki swa nkoka eku nyikeleni ka hina mahungu lamanene. Loko hi lunga xingheniso xa hina hi rirhandzu ni hi ku tiyimisela, hi endla leswaku n’wini wa muti a swi tiva leswaku ha n’wi tsakela swinene. Loko a vulavula, yingisela hi vukheta naswona u kombisa xichavo lexi faneleke eka langutelo ra yena. Loko u vulavula, vulavula hi vutlhari ni hi musa.—Ringanisa Mintirho 6:8.
4 Minkarhi yin’wana hi hlangana ni munhu la nga riki na xinghana, la rhandzaka ku lwa. Xana hi fanele hi angurisa ku yini? Petro u hi khutaza ku vulavula hi ndlela leyi kombisaka “moya wa ku olova ni wa xichavo.” (1 Pet. 3:16; Rhom. 12:17, 18) Yesu u vule leswaku loko n’wini wa muti a ala rungula ra Mfumo hi ku delela, hi fanele hi ‘phumunha ritshuri emilengeni ya hina’ hi ku rhula. (Mt. 10:14) Loko hi kombisa mikhuva leyinene ehansi ka swiyimo swo tano eku heteleleni swi nga ha olovisa mbilu ya munhu la kanetaka.
5 Vana Xikombiso Lexinene eMahanyelweni: Ku chumayela mahungu lamanene eswitarateni leswi nga ni mphensa-mphensa ni le tindhawini ta mani na mani swi lava leswaku hi anakanyela van’wana, hi nga bi huwa kumbe ku sindzisa, naswona hi nga pfaleli vanhu ndlela. Loko hi ri emakaya ya vanhu lava tsakelaka, hi fanele hi hleleka hi ndlela leyinene ni ku tikhoma tanihi vaendzi lava nga ni nsovo, hi kombisa ku tlangela malwandla ya vona. Vana vahi na vahi lava fambaka na hina va fanele va kombisa xichavo eka n’wini wa muti ni le ka nhundzu ya yena naswona va fanele va va ni mikhuva leyinene ni ku yingisela loko hi ri eku vulavuleni. Loko vana va nga lawuleki, leswi swi ta siya langutelo lero biha.—Swiv. 29:15.
6 Ku languteka ka hina ku fanele ku endla van’wana va swi vona leswaku hi vatirheli va Rito ra Xikwembu. Malunghana ni maambalelo ni ku tilunghisa ka hina, a hi fanelanga hi va ni vusopfa ni ku nga khathali, swiambalo swi nga vi leswi vonikelaka kumbe leswi hundzeletiweke. Ku languteka ka hina nkarhi na nkarhi ku fanele ku fambelana ni mahungu lamanene. (Ringanisa Vafilipiya 1:27.) Hi ku xiyisisa ku languteka ka hina ni switirho swa hina, a hi nge khunguvanyisi van’wana kumbe ku va endla leswaku va sola ntirho wa hina. (2 Kor. 6:3, 4) Ku veka ka hina xikombiso lexinene hi ku vulavula ni hi mahanyelo swi engetela ku saseka ka rungula ra Mfumo, swi dzunisa na Yehovha.—1 Pet. 2:12.