Ku Twarisa Mahungu Lamanene Hi Langutelo Lerinene

¹ Hinkwerhu ka hina hi lava ku kuma ntsako ni ku humelela eka leswi hi swi endlaka, ngopfu-ngopfu entirhweni wa ku endla vadyondzisiwa. I yini lexi tisaka ku eneriseka ko tano? Swi sungula hiloko hi hlayisa langutelo lerinene ra mianakanyo loko hi khomekile entirhweni lowu wa nkoka wo pfuna van’wana. (Swiv. 11:25) Mukhuva lowu hi twarisaka mahungu lamanene ha wona wu fanele wu kombisa leswaku entiyisweni ha swi tshemba leswi hi swi vulaka. Loko hi vulavula swi huma etimbilwini, hi kona laha ku tiyimisela ni ku tiyiseka ka hina ku nga ta vonaka. (Lk. 6:45) Loko hi pfuxeta xingheniso xa hina, hi ta va ni ku titshemba lokukulu loko hi vulavula ni vanhu ensin’wini ya hina. Leswi swi ta va swa ntikelo swinene hi September loko hi fambisa buku leyi nge U Nga Hanya Hi Masiku aParadeyisini eMisaveni kumbe leyi nge Ku Endla Vutomi Bya Ndyangu Wa Wena Byi Tsakisa. U nga ha kuma swiringanyeto leswi landzelaka swi pfuna swinene eku twariseni ka mahungu lamanene hi langutelo lerinene.

² Loko u fambisa buku leyi nge “Hanya Hi Masiku,” u nga ha vula leswi eriendzweni ra wena ro sungula: ◼“Loko ndzi vulavula ni vanhu va ndhawu leyi, ndzi kume leswaku van’wana va navela tiko leri sirhelelekeke ni misava leyi nga ni ku rhula. Hi rihi vonelo ra wena malunghana ni xivangelo xa ku tsandzeka ka munhu ku tisa swiyimo swo tano? [Yimela nhlamulo.] Varhangeri van’wana va tipolitiki va nga ha tiyimisela naswona va endla leswo lulama, kambe xiya leswi Bibele hi vutlhari yi tsundzuxaka swona.” Hlaya Pisalema 146:3, 4; ivi u vutisa: “Xana u kona la nga enerisaka swilaveko swa vanhu?” Hlaya tindzimana 5 na 6. N’wi kombe swifaniso leswi nga eka matluka 156-8 ya buku leyi nge Hanya Hi Masiku, ivi u yisa nyingiso eka mimpfuno ya ku fuma ka Xikwembu. Fambisa buku hi munyikelo lowu ringanyetiweke.

³ Loko mi burisane hi ku fuma ka Xikwembu eku sunguleni, u nga ha ringeta xiringanyeto lexi eriendzweni ro vuyela: ◼“Masiku ma nga ri mangani lama hundzeke loko ndzi ri laha, hi burisane hi ku tsandzeka ka munhu ku tisa ku rhula ka xiviri laha misaveni. U ta tsundzuka leswaku hi kambisise xivangelo lexi Bibele yi xi nyikeleke xa ku tsandzeka ko tano. [Tlhela u hlaya Pisalema 146:3.] Xana wa swi vona leswaku ha yini Xikwembu xi hi tsundzuxa leswaku hi nga veki ku tshemba ka hina eka vanhu? [Yimela nhlamulo.] Kumbexana wa pfumela leswaku ntshembo wun’wana ni wun’wana wa ntlhantlho wa hilaha ku nga heriki wu fanele wu huma eka Xikwembu. Xivangelo lexi ha xona hi nga vaka ni ntshembo lowu, xi hlamuseriwe eka Pisalema 146:10. [Hlaya.] Loko hi lava ku va vafumiwa va Mfumo wa Xikwembu, xana hi fanele hi endla yini?” Pfula eka tluka 128 ra buku leyi nge Hanya Hi Masiku, hlaya ndzimana 5, kutani u kandziyisa Yohane 17:3. Byela n’wini wa muti leswaku u lava ku n’wi kombisa ndlela leyi, hi ku tirhisa dyondzo ya Bibele, vanhu va timiliyoni va kume vutivi lebyi yisaka evuton’wini lebyi nga heriki. Loko n’wini wa muti a pfumela, n’wi kombe buku leyi nge Vutivi ivi u sungula dyondzo.

⁴ U nga ha ringeta xingheniso lexi loko u fambisa buku leyi nge “Vutomi Bya Ndyangu”: ◼“Loko hi ri karhi hi vulavula ni vaakelani va hina, hi kume leswaku vo tala va navela ku va ni vutomi bya ndyangu lebyi tsakisaka. Xana u vona onge i yini lexi nga pfunaka vanhu leswaku va kuma ntsako lowukulu evuton’wini bya ndyangu? [Yimela nhlamulo.] Xana a wu pfumeli leswaku swi nga vuyerisa ku yingisela leswi Musunguri wa ndyangu a swi vulaka? U veke swiletelo leswi lavekaka eBibeleni. Misinya leyi ya milawu yi hlamuseriwe ebukwini leyi, Ku Endla Vutomi Bya Ndyangu Wa Wena Byi Tsakisa. Xiya tinhloko-mhaka to hambana-hambana leti hlamuseriweke laha. [Pfula nxaxamelo wa leswi nga endzeni.] Buku leyi yi tlhela yi hlamusela ntlhantlho wa hilaha ku nga heriki wa swiphiqo swa vanhu. Hi ku siyela buku leyi hi munyikelo wa R3,50.”

⁵ Loko u tlhelela eka lava u va fambiseleke buku leyi nge “Vutomi Bya Ndyangu,” u nga ha tsakela ku vula leswi: ◼“Masiku ma nga ri mangani lama hundzeke hi bule hi ndlela leyi ku yingisela Muvumbi wa hina swi nga hi pfunaka ha yona ku tlhantlha swiphiqo swa ndyangu. Xana u swi xiyile leswaku mintshikilelo ni swiphiqo swa siku na siku swi tisa ntlhontlho lowukulu eka mindyangu namuntlha? [Yimela nhlamulo.] Xiya leswi Musunguri wa vukati a swi byeleke mpatswa wa vanhu vo sungula.” Hlaya Genesa 1:28 kutani u pfula tluka 8 ra buku leyi nge Vutomi Bya Ndyangu ivi u yisa bulo ra wena emahlweni, hi ku tirhisa tinhla-nkulu leti nga eka tindzimana 11-13. N’wi byele hi ta dyondzo ya Bibele. Loko a yi tsakela, sungula dyondzo hi ku tirhisa buku leyi nge Vutivi.

⁶ Loko u tirha eswitolo, u nga ha tirhisa xingheniso lexi xo koma loko u fambisa buku leyi nge “Hanya Hi Masiku”: ◼“Namuntlha hi endla ntirho wo hlawuleka eka van’wamabindzu va ndhawu leyi. Hinkwerhu ka hina ha khumbeka hi ku andza lokukulu ka vugevenga ni madzolonga endhawini ya hina. Xana u anakanya leswaku u kona la nga ni ntlhantlho wa xiviri wa xiphiqo lexi? [Yimela nhlamulo.] Xikwembu xi na wona ntlhantlho.” Pfula tluka 157 ra buku leyi nge Hanya Hi Masiku; hlaya u tlhela u hlamusela Swivuriso 2:22. Kombisa nhloko-mhaka ya ndzima 19, kutani u fambisa buku hi munyikelo lowu ringanyetiweke.

⁷ Loko u tlhelela eka n’wamabindzu loyi u n’wi fambiseleke buku leyi nge “Hanya Hi Masiku,” u nga ha vula leswi: ◼“Eriendzweni ra mina leri hundzeke, ndzi vule leswaku Xikwembu hi xona ntsena lexi nga ni ntlhantlho wa hilaha ku nga heriki eka vugevenga ni madzolonga. Hi ku ya hi xitshembiso xa xona, hi nga tshemba leswaku misava leyi nga ni ku rhula yi ta va kona.” Hlaya ndzimana 4 eka tluka 159 ra buku leyi nge Hanya Hi Masiku, kun’we ni Pisalema 37:37, 38. Hlamusela swifaniso leswi nga eka tluka 158. N’wi byele hi ta dyondzo ya mahala ya Bibele, leyi nga ha fambiseriwaka endhawini yoleyo ya bindzu kumbe ekaya rakwe.

⁸ Leswi hi nga “vatirhi-kuloni eka Xikwembu,” hi ni xivangelo lexi tiyeke xa ku va ni langutelo lerinene loko hi twarisa mahungu lamanene. (1 Kor. 3:9) Ku hlayisa ka hina langutelo leri swi ta hi tisela mikateko ya Yehovha leyi fuweke.