Chumayela Mahungu Lamanene Kun’wana Ni Kun’wana

¹ Vakreste vo sungula va chumayele mahungu lamanene kun’wana ni kun’wana. A va hiseka swinene lerova ku nga si hela malembe ya 30 endzhaku ka ku pfuxiwa ka Yesu Kreste, rungula ra Mfumo a ri “twarisiwile eka swivumbiwa hinkwaswo leswi nge hansi ka tilo.”—Kol. 1:23.

² Malandza ya Yehovha lama hisekaka namuntlha ma ni xikongomelo lexi fanaka—ku fikelela un’wana ni un’wana hi mahungu lamanene ya Mfumo loko swi koteka. I yini lexi nga hi pfunaka ku fikelela pakani leyi? Eswiphen’wini swo tala swa nsimu ya hina, ngopfu-ngopfu etindhawini ta le makaya, ha ha va kuma vanhu ekaya loko hi famba hi yindlu na yindlu. Hambileswi leswi tsariweke eka xiengetelo lexi swi nga byi siviki vutirheli bya yindlu na yindlu, vanhu vo tala swinene va tirha nkarhi hinkwawo naswona hakanyingi va va va nga ri kona ekaya loko hi va endzela. Loko va nga ri eku tirheni, va nga ha va va ri eku fambeni, eku xaveni kumbe eku tihungaseni. Xana lava fanelekaka exikarhi ka vona va nga fikeleriwa hi rungula ra Mfumo hi ndlela yihi?—Mt. 10:11.

³ Van’wana ku hlanganiwa na vona lomu va tirhaka kona. Hambi ku ri eswidorobanini ku ni xivandla xa mabindzu laha vanhu vo tala va vaka kona dyambu hinkwaro. Emadorobeni lamakulu, vanhu lava tirhaka etindhawini ta vumakelo kumbe emiakweni ya tihofisi leyo leha ngopfu ni lava tshamaka emiakweni leyi rindziwaka swinene va byi kuma vumbhoni—vo tala va byi twa ro sungula. Hi mahelo-vhiki, van’wana lava endzeriweke loko va ri eku wiseni emintangeni, etindhawini ta vuhungasi, emagovelweni kumbe etindlwini to wisela eka tona kumbe loko va rindzile etindhawini to paka mimovha kumbe endhawini ya mabindzu va kumeke va ri vanhu lava amukelaka swinene mahungu lamanene.

⁴ Nhlayo leyi andzaka ya vahuweleri yi tikarhatela ku nyikela vumbhoni etindhawini ta mani na mani, laha vanhu va nga kumekaka kona. Eku sunguleni, Timbhoni leti a ti kanakana naswona a ti ri ni rhumbu hikwalaho ka leswi ti toloveleke ku chumayela hi ndlela leyi hleriweke, ku nga ku chumayela hi yindlu na yindlu. Xana sweswi ti titwa njhani?

⁵ “Swi pfuxete vutirheli bya mina!” ku vula makwerhu un’wana wa xinuna la nga ni ntokoto. Un’wana wa engetela: “Swi endla ndzi tshama ndzi lunghekile.” Phayona rin’wana leri dyuhaleke ri ri: “Swi ndzi pfuxeta emianakanyweni, emirini ni le moyeni, . . . naswona ndza ha dyondza.” Muhuweleri un’wana u vula leswaku sweswi u le ku fikeleleni ka vanhu vo tala lava a va nga si tshama va vulavula ni Timbhoni ta Yehovha. Vantshwa na vona va karhi va hlanganyela hi ku hiseka entirhweni lowu lowu tsakisaka. Muntshwa u tiphofule hi ndlela leyi: “Swa tsakisa hikuva u vulavula ni vanhu vo tala swinene.” Un’wana u ri: “Ndzi fambisa tibuku to tala ku tlula eku sunguleni!” Leswi hinkwaswo swi humelela ensin’wini leyi tirhiwaka nkarhi na nkarhi.

⁶ Valanguteri Lava Famba-fambaka Va Rhangela: Hi ku xiya leswaku “misava leyi ni swa yona hinkwaswo swa hundza,” sweswinyana Sosayiti yi ringanyete leswaku valanguteri lava famba-fambaka va endla ndzulamiso eka xiyimiso xa vona xa ntirho wa nsimu wa vhiki na vhiki leswaku vanhu vo tala va ta fikeleriwa hi mahungu lamanene hilaha swi nga kotekaka hakona. (1 Kor. 7:31) Hi malembe yo tala, valanguteri va xifundzha a va hlawula nkarhi wa nimixo exikarhi ka vhiki leswaku va endla ntirho wa yindlu na yindlu, ivi nindzhenga va endla maendzo yo vuyela ni ku fambisa tidyondzo ta le kaya ta Bibele. Etindhawini tin’wana, xiyimiso xexo xi nga ha tirha. Etindhawini tin’wana, vuyelo bya kona byi nga ha va byi nga nyawuli loko u tirha hi yindlu na yindlu nimixo emasikwini yo karhi ya vhiki. Eswiyin’weni swo tano, mulanguteri la famba-fambaka a nga ha vona swi ri swinene ku hlanganyela entirhweni wa le switolo kumbe wa le xitarateni. Kumbe a nga ha hlela mintlawa leyitsongo leswaku yi nyikela vumbhoni emiakweni leyo leha ngopfu ya le tihofisini, etindhawini ta mabindzu, laha ku pakiwaka kona timovha kumbe etindhawini tin’wana ta mani na mani. Loko vahuweleri va wu tirhisa swinene nkarhi lowu nga kona wa ntirho wa nsimu ku nga fikeleriwa vanhu vo tala.

⁷ Swiviko swi kombisa leswaku valanguteri lava famba-fambaka ni vahuweleri hilaha ku fanaka va fambisane na wona ndzulamiso lowu. Tihuvo to hlaya ta vakulu ti kombele mulanguteri wa xifundzha leswaku a letela vahuweleri va nga ri vangani eka swiyenge leswi swa ntirho leswi lavaka nyingiso evandlheni. Vahuweleri lava va pfunekile swinene hi ku famba ni mulanguteri la famba-fambaka loko a hlanganyela eka yin’wana ya mintirho leyi. Vahuweleri lava, na vona va kote ku letela van’wana. (2 Tim. 2:2) Hikwalaho ka sweswo, sweswi vanhu vo tala va karhi va fikeleriwa hi mahungu lamanene.

⁸ Kavula, a swi kali swi lava leswaku u yimela mulanguteri wa xifundzha leswaku a endza leswaku u ta ringeta tin’wana ta tindlela leti ta ku chumayela. Hi leti tindlela tin’wana to hambana-hambana leti u nga ha kumaka ti tirha ensin’wini ya ka n’wina:

⁹ Ku Nyikela Vumbhoni eXitarateni: ‘Xana vanhu lava tshamaka laha va ye kwihi?’ minkarhi yin’wana swa hi hlamarisa loko hi fika endhawini leyi ku tshamaka vanhu eka yona yi nga ri na munhu nimixo exikarhi ka vhiki. Van’wana va nga ha va va rhumiwe kun’wana kumbe va ri eku xaveni. Xana u ringetile ku va fikelela hi ku nyikela vumbhoni exitarateni? Loko xi endliwa kahle, xiyenge lexi xa vutirheli xi nga va ni mihandzu swinene. Ematshan’wini yo yima ndhawu yin’we ni timagazini, i swinene ku tshinelela vanhu ivi hi sungula bulo ra xinghana. A swi bohi ku vula vumbhoni eka muhundzi un’wana ni un’wana wa ndlela. Vulavula ni vanhu lava nga jahangiki, vo tanihi lava nyangaka swilo leswi xavisiwaka eswitolo hi le mafasitereni, lava nga etimovheni leti pakiweke kumbe vanhu lava rindzeleke swo khandziya. Xo sungula, u nga ha n’wi xeweta hi ndlela ya xinghana kutani u rindzela nhlamulo. Loko munhu wa kona a swi tsakela ku vulavula, n’wi vutise mavonelo ya yena emhakeni leyi u nga ha vonaka leswaku yi ta n’wi tsakisa.

¹⁰ Mulanguteri un’wana la famba-fambaka u kombele tsevu wa vahuweleri leswaku va famba na yena ni nsati wakwe eku nyikeleni ka vumbhoni exitarateni. Xana vuyelo byi ve byihi? Wa vika: “Hi ve ni mixo lowunene! A ku nga ri na xiphiqo xa leswaku vanhu a va kona. Hi fambise 80 wa timagazini ni swiphephana swo tala. Hi ve ni mabulo yo hlaya lama nyanyulaka. Un’wana wa vahuweleri, loyi a ri entirhweni wa le xitarateni ro sungula, u te: ‘Ndzi ni malembe yo tala ndzi ri entiyisweni naswona a ndzi nga swi voni leswi a a ndzi swi kayela!’ Loko vhiki ri hela, mphakelo lowukulu wa timagazini ta vandlha leti nga exitokweni a wu herile.”

¹¹ Loko a endzele vandlha rin’wana, mulanguteri loyi wa xifundzha u twe leswaku vahuweleri vo hlaya a va ri eku nyikeleni ka vumbhoni mixo wun’wana kambe a va humelelanga ngopfu. Makwerhu un’wana wa xisati u vulavule ni vanhu vambirhi ntsena enkarhini wolowo hinkwawo wa ku nyikela vumbhoni, hikwalaho ka leswi vanhu hinkwavo lava a a hlangana na vona a va tsutsumela emintirhweni. Mulanguteri la famba-fambaka u ringanyete leswaku hinkwavo ka vona va tlhelela exitarateni lexi fanaka endzhakunyana nimixo. Va tlhelerile, naswona va tirhe endhawini yoleyo ku fikela ninhlikanhi. Makwerhu wa xisati la buleke ni vanhu vambirhi ntsena ni mixo swinene u humelele ngopfu loko a tlhelela. U fambise timagazini ta 31 ni tibroxara ta 15, a kuma mavito ni tiadirese ta vanhu va nkombo, kutani a sungula tidyondzo timbirhi ta Bibele ta le kaya! Van’wana entlaweni lowu va ve ni vuyelo lebyi fanaka lebyi khutazaka.

¹² Loko u kuma munhu la kombisaka ku tsakela, ringeta ku tsala vito ra munhu yoloye, adirese ni nomboro ya riqingho. Ematshan’wini yo kombela vuxokoxoko lebyi hi ku kongoma, u nga ha ku: “Ndzi tsakele bulo leri. Xana u vona onge hi nga ri yisa emahlweni enkarhini wun’wana?” Kumbe u vutisa u ku: “Xana swi nga koteka leswaku ndzi ku endzela ekaya?” Vo tala lava ku vulavuriweke na vona hi ndlela leyi va swi pfumerile ku endzeriwa. Tiyiseka leswaku u ni mphakelo lowu eneleke wa swiphephana swo swi tirhisa eku rhambeni ka lava nga ha tsakelaka ku ya eminhlanganweni ya hina.

¹³ Loko u vulavula ni munhu la tsakelaka la tshamaka ensin’wini leyi averiweke vandlha rin’wana, u fanele u ya byela vamakwerhu va ndhawu yoleyo leswaku va ta kota ku n’wi endzela. Xana ku nyikela vumbhoni exitarateni ku nga va ndlela leyi humelelaka yo hangalasa mahungu lamanene endhawini ya ka n’wina? Loko swi ri tano, pfuxeta xihloko lexi nge “Ku Kuma Lava Tsakelaka Hi Ku Nyikela Vumbhoni Bya Le Xitarateni Lebyi Humelelaka” enkandziyisweni wa Vutirheli Bya Hina Bya Mfumo bya July 1994. Kutani endla malunghiselelo yo hlanganyela eku nyikeleni ka vumbhoni bya le xitarateni hi nkarhi lowu faneleke wa siku lowu nga ta endla leswaku u kota ku fikelela vanhu vo tala swinene hilaha swi nga kotekaka hakona.

¹⁴ Ku Nyikela Vumbhoni Eka Swo Famba Swa Mani Na Mani: Mixo wun’wana vunyingi bya maphayona byi kunguhate ku nyikela vumbhoni eka vanhu lava a va rindzele bazi ekusuhi ni kholichi ya ndhawu ya ka vona. Loko va ha ri emabulwini lama tsakisaka, va kavanyetekile. Loko bulo ra ha nandziha, bazi ri fikile, ri yimisa bulo hi xitshuketa. Maphayona ma ololoxe xiphiqo lexi hi ku khandziya bazi ivi ma hambeta ma nyikela vumbhoni eka vakhandziyi van’wana loko ri ri karhi ri nghena edorobeni. Loko bazi ri fika lomu a ri ya kona, maphayona ma tlhele na rona, ma nyikela vumbhoni endleleni. Endzhaku ka maendzo yo hlaya yo ya ni ku vuya, va hlengelete mihandzu ya matshalatshala ya vona: Va fambise timagazini to tlula 200 naswona va sungule tidyondzo ta Bibele ta tsevu. Vakhandziyi van’wana hi ku tirhandzela va va nyike tiadirese ni tinomboro ta tiqingho ta vona leswaku va ta endzeriwa emakaya. Evhikini leri tlhandlameke, maphayona ma tlhelele exiticini xa mabazi ivi ma landzela endlelo leri fanaka tanihi le ku sunguleni. Va fambise timagazini ta 164 ni ku sungula dyondzo yin’wana ya Bibele. Exiticini xin’wana mufambi u khandziye bazi ivi a tshama exitulwini lexi a xi nga ri na munhu—etlhelo ka phayona. U langute makwerhu wa xinuna ivi hi ku n’wayitela a ku: “Ndza swi tiva, u ndzi khomele Xihondzo xo Rindza.”

¹⁵ Vahuweleri van’wana va nyikela vumbhoni lebyi humelelaka loko va famba hi bazi, hi xitimela kumbe hi xihaha-mpfhuka. Xana u nga ri sungula njhani bulo ni munhu la tshameke etlhelo ka wena? Muhuweleri un’wana wa malembe ya 12 hi vukhale u sungule hi ku hlaya kopi ya Xalamuka! ebazini, hi ku tshemba leswaku nhwanyana wa kondlo-a-ndzi-dyi la tshameke ekusuhi na yena a nga ha rhandza ku tiva. Swi fambe hi ndlela leyi a naveleke ha yona. Nhwanyana loyi u n’wi vutise leswaku a a hlaya yini, hiloko muntshwa a hlamula leswaku a a hlaya hi ta ku ololoxa swiphiqo leswi vantshwa va bohekaka ku langutana na swona. U tlhandlekele hi ku vula leswaku xihloko xa kona xi n’wi pfunile swinene ni leswaku xi nga n’wi pfuna na yena. U amukele timagazini hi ku tsaka. Bulo ra vona ri twiwe ni hi vantshwa van’wana vambirhi lava na vona va kombeleke tikopi ta timagazini. Loko a twa leswi, muchayeri wa bazi u yimise bazi etlhelo ka ndlela kutani a vutisa xivangelo lexi endlaka leswaku va tsakela timagazini leti swinene. Loko a kume xivangelo xa kona, na yena u amukele tikopi. Kavula, leswi hinkwaswo a swi ta va swi nga humelelanga loko muhuweleri loyi lontsongo a nga vanga na wona mphakelo lowu eneleke wa timagazini to ti fambisela un’wana ni un’wana la tsakelaka!

¹⁶ Ku Nyikela Vumbhoni eMintangeni Ni Le Tindhawini To Paka: Ku nyikela vumbhoni emintangeni ni le tindhawini to paka i ndlela leyinene ngopfu yo fikelela vanhu. Xana u tshame u ringeta ku nyikela vumbhoni endhawini yo paka kumbe endhawini ya mabindzu? Nkarhi hinkwawo, xiyaxiya ndhawu ya kona swa xinkarhana. Lava munhu la nga jahangiki kumbe la rindzeke emovheni lowu pakiweke ivi u sungula bulo ra xinghana na yena. Loko bulo ri ya emahlweni, nghenisa rungula ra Mfumo. Ringeta ku tirha u ri wexe kambe ku ri ni muhuweleri un’wana kwala xivandleni xexo. U nga rhwali nkwama lowukulu, lowu taleke ku tlula mpimo kumbe ku tivangela mahlo entirhweni wa wena hi ndlela yin’wana. Tlhariha. Swi nga ha va swinene ku tirha swa xinkarhana endhawini yin’we yo paka mimovha ivi u hundzela eka yin’wana. Loko munhu a nga swi rhandzi ku vulavula na wena, famba hi ku rhula u ya lava un’wana loyi a nga swi tsakelaka. Hi ku tirhisa maendlelo lawa, makwerhu un’wana wa xinuna u fambise timagazini ta 90 hi n’hweti loko a ri karhi a nyikela vumbhoni etindhawini to paka.

¹⁷ Vanhu van’wana va ya emintangeni ku ya wisa; van’wana va ya kona ku ya tlanga mintlangu kumbe ku ya hungasa ni vana va vona. Handle ko kavanyeta mintirho ya vona hi ndlela yo hundza mpimo, lavisisa tindlela to nyikela vumbhoni. Makwerhu un’wana u sungule bulo ni muhlayisi wa timbala ta le ntangeni kutani a kuma leswaku a a karhateka hi swidzidzirisi ni vumundzuku bya vana va yena. Dyondzo ya le kaya ya Bibele yi sunguriwile naswona a yi fambisiwa nkarhi na nkarhi kwale ntangeni.

¹⁸ Ku Nyikela Vumbhoni Hi Xitshuketa Endhawini Ya Mabindzu: Hambileswi swi nga kotekiki minkarhi hinkwayo ku chumayela hi ndlela leyi hleriweke eswitolo swa le ndhawini ya mabindzu hikwalaho ka leswi ku nga ni swipimelo swa ndhawu yoleyo swo sivela mintirho yo tano, vahuweleri van’wana va sungule tindlela to nyikela vumbhoni hi xitshuketa. Va tshama ehansi ebenceni ivi va sungula bulo ra xinghana ni van’wana lava tshameke ehansi leswaku va wisa. Loko munhu a kombisa ku tsakela, va n’wi fambisela xiphephana kumbe magazini hi vutlhari kutani va tikarhatela ku endla malunghiselelo ya ku n’wi endzela. Endzhaku ko heta timinete ti nga ri tingani va nyikela vumbhoni exiphen’wini xin’we xa ndhawu ya mabindzu, va hundzela ka xin’wana ivi va sungula bulo ni munhu un’wana. Kavula, u fanele u tivonela leswaku u nga tivangeli mahlo swi nga fanelanga loko u nyikela vumbhoni bya xitshuketa hi ndlela leyi.

¹⁹ Loko u xeweta munhu, sungula bulo hi marito ya xinghana. Loko muyingiseri wa wena a hlamula, n’wi vutise xivutiso, kutani u yingisela hi vukheta loko a tiphofula. Kombisa ku tsakela eka leswi a swi vulaka. Kombisa leswaku langutelo ra yena u ri vona ri ri ra nkoka. Pfumelelana na yena loko swi fanerile.

²⁰ Makwerhu un’wana wa xisati u ve ni bulo leri tsakisaka ni mukhegula un’wana hi ku boxa ndlela leyi swilo swi durhaka ha yona. Mukhegula loyi hi ku tiyimisela u pfumelelane na yena, naswona va ve ni bulo leri nyanyulaka. Makwerhu loyi wa xisati u kote ku tsala vito ni adirese ya mukhegula loyi, naswona u endle riendzo ro vuyela evhikini rolero.

²¹ Ku Tirha eSwitolo: Mavandlha man’wana ma averiwe tindhawu ta mabindzu tanihi xiphemu xa nsimu ya wona. Makwerhu la langutelaka nsimu a nga ha lunghiselela makhadi ya mepe wa nsimu ya swiyenge leswi swa mabindzu leswi lavaka nyingiso swinene. Makhadi wahi na wahi ya mepe wa nsimu leyi nga ndhawu leyi ku tshamaka vanhu lama katsaka ndhawu ya mabindzu ma fanele ma kombisa kahle leswaku ndhawu ya mabindzu a yi fanelanga yi tirhiwa tanihi xiphemu xa nsimu leyin’wana. Etindhawini tin’wana, swivandla swa mabindzu swi nga tirhiwa kun’we ni miti ya vanhu. Vakulu va nga ha kombela vahuweleri lava fanelekaka leswaku va tirha ndhawu ya mabindzu nkarhi na nkarhi leswaku ntirho wa le switolo wu nga honisiwi.

²² Loko u komberiwe ku hlanganyela entirhweni lowu naswona u nga si tshama u wu endla, ndlela leyinene yo ‘kuma xivindzi’ i ku rhanga u nghena eswitolo swi nga ri swingani leswitsongo; kutani, loko se u titshemba, tirha ni le ka leswikulunyana. (1 Tes. 2:2) Loko u tirha eswitolo, ambala hi ndlela leyi fanaka ni loko u ya eminhlanganweni eHolweni ya Mfumo. Loko swi koteka, nghena exitolo loko ku nga ri na vaxavi lava yimeleke ku xaviseriwa. Kombela ku vulavula ni mufambisi kumbe munhu la langutelaka. Kombisa rirhandzu, naswona xa nkoka ngopfu, komisa rungula ra wena. A swi bohi leswaku u kombela ku khomeriwa. Van’wamabindzu vo tala va tshama va ri ni vaxavi naswona va fike laha va tolovelaka ku kavanyetiwa.

²³ Endzhaku ka ku xeweta n’wini wa xitolo, u nga ha vula leswi: “Vanhu va mabindzu va tshama va ri emintirhweni lerova a hi kanyingi hi va kuma ekaya, hikwalaho hi ku endzele laha bindzwini leri u tirhelaka eka rona leswaku hi ta ku siyela xihloko lexi tlhontlhaka miehleketo leswaku u xi hlaya.” Kutani hlamusela yinhla yin’we kumbe timbirhi ta magazini lowu u wu fambisaka.

²⁴ Kumbexana u nga ha ringeta leswi loko u vulavula ni mufambisi: “Hi xiye leswaku vanhu va mabindzu va tikarhatela ku tshama va ri karhi va tivisiwa xin’wana ni xin’wana. Nkandziyiso wa sweswinyana wa Xihondzo xo Rindza (kumbe wa Xalamuka!) wu ni xihloko lexi khumbaka un’wana ni un’wana wa hina.” Hlamusela leswi xi vulaka swona, kutani u gimeta hi ku vula u ku: “Ha tshemba leswaku u ta tsakela ku xi hlaya.”

²⁵ Loko ku ri ni vatirhi, naswona u vona swi fanerile, u nga ha engetela u ku: “Xana u nga swi tsakela leswaku ndzi byela vatirhi va wena rungula leri fanaka hi ku komisa?” Loko u pfumeleriwa, tsundzuka leswaku u tshembise ku vula hi ku komisa, naswona mufambisi u ta langutela leswaku u hetisisa xitshembiso xa wena. Loko ku ri ni mutirhi la lavaka bulo lero leha, swi nga antswa u n’wi byela leswaku u ta n’wi endzela ekaya rakwe.

²⁶ Sweswinyana, vahuweleri va nga ri vangani exidorobanini lexitsongo va fambe ni mulanguteri wa xifundzha entirhweni wa le switolo. Vahuweleri van’wana eku sunguleni a va chava, hikwalaho ka leswi a va nga si tshama va endla ntirho wolowo; kambe hi ku hatlisa va sungule ku ntshunxeka ni ku tiphina ha wona. Ku nga si hela awara, va vulavule ni vanhu va 37 ni ku fambisa timagazini ta 24 na 4 wa tibroxara. Makwerhu un’wana u xiye leswaku va kume vanhu vo tala swinene loko va tirha eswitolo ku tlula lava va toloveleke ku va kuma hi n’hweti yin’we loko va famba hi yindlu na yindlu.

²⁷ Ku Pfula Tindlela To Chumayela: Yesu a a nga nyikeli vumbhoni bya yena hi ndlela leyi hleriweke ntsena. U hangalase mahungu lamanene nkarhi wun’wana ni wun’wana lowu faneleke. (Mt. 9:9; Lk. 19:1-10; Yoh. 4:6-15) Xiya ndlela leyi vahuweleri van’wana va tiendlelaka minkarhi yo chumayela ha yona.

²⁸ Van’wana va swi endla mukhuva ku nyikela vumbhoni eka vatswari lava yimeleke vana va vona ekusuhi ni nyangwa wa xikolo. Tanihi leswi vatswari vo tala va fikaka ka ha sele 20 wa timinete, ku ni nkarhi wa ku va nghenisa ebulwini leri nyanyulaka ra mhaka ya Matsalwa.

²⁹ Maphayona yo tala ma tiva tindlela to fikelela vanhu lava nga ha vaka ni ku tsakela ko karhi emhakeni yo hlawuleka leyi timagazini ta hina ti vulavulaka ha yona. Hi xikombiso, makwerhu un’wana wa xisati u kume vuyelo lebyinene hi ku endzela tsevu wa swikolo swa le nsin’wini ya vandlha ra ka vona a ri ni Xalamuka! ya January 8, 1996 leyi nga ni ntlhandlamano wa swihloko leswi vulavulaka hi swikolo. U tlhele a endzela ni va nhlayiso wa mindyangu a ri ni timagazini leti vulavulaka hi vutomi bya ndyangu ni ta ku khomiwa ka vana hi ndlela yo biha naswona u komberiwe ku hambeta a va tela ni minkandziyiso leyi landzelaka leyi vulavulaka hi timhaka leti fanaka. N’wangulo lowu a wu kumeke ehofisini leyi pfunaka lava pfumalaka mintirho hi Xalamuka! ya March 8, 1996 leyi vulavulaka hi ku pfumaleka ka mintirho wu hlamuseriwe wu ri lowu “hlamarisaka swinene.”

³⁰ Mulanguteri wa muganga u vika leswaku yena ni nsati wakwe nkarhi na nkarhi va nyikela vumbhoni hi xitshuketa loko va ri karhi va xava swakudya. Va xava hi nkarhi lowu xitolo xi nga riki na vanhu vo tala ngopfu, naswona vaxavi va famba-famba hi vangwa ra swixavisiwa va nga ri eku hatliseni. Va vika mabulo yo tala lamanene.

³¹ Vahuweleri vo tala va vika vuyelo lebyinene loko va nyikela vumbhoni eka vanhu lava nga endhawini ya vuhlantswelo ya mani na mani. A va ti siyi timagazini loko ku nga ri na munhu kwalaho. Pakani ya vona i ku fikelela vanhu hi mahungu lamanene, hikwalaho va tikarhatela ku vulavula hi xiviri ni vanhu lava nga eku hlantsweni.

³² Etindhawini tin’wana, vahuweleri lava hlawuriweke va nyikiwe mpfumelelo wo chumayela etimbaleni ta swihaha-mpfhuka. Minkarhi yin’wana, va tiphine hi ku nyikela vumbhoni eka vaendzi lava humaka ematikweni ya le handle laha vanhu va Yehovha va nga vatsongo hi nhlayo. Loko ku va ni ku tsakela, va va fambisele xiphephana kumbe magazini.

³³ Loko va nga pfumeleriwi ku nyikela vumbhoni hi xiviri eka vanhu lava tshamaka etifuletini leti rindziwaka swinene leti nga ensin’wini ya vandlha ra ka vona, van’wana va swi endle mukhuva ku nyikela vumbhoni hi vutlhari eka varindzi lava nga entirhweni kumbe eka vafambisi va tihofisi ta tifuleti leti hirhiweke. Endlelo leri fanaka ra tirhisiwa emakaya lama tinyangwa ta wona ti tshamaka ti pfariwile ku sivela leswaku vanhu va nga ngheni. Mulanguteri wa xifundzha ni vahuweleri va nga ri vangani va endzele miako ya nkombo leyi sirheleriweke hi ndlela leyi. Eriendzweni rin’wana ni rin’wana, va byele mufambisi leswaku hambileswi va nga pfumeleriwiki ku endzela miako leyi hi ndlela ya hina leyi tolovelekeke, va tsakela leswaku a nga hundziwi hi rungula leri nga eka timagazini ta sweswinyana. Vafambisi lava nga eka miako hinkwayo ya nkombo va amukele timagazini hi ku tsaka ivi va kombela ni minkandziyiso leyi landzelaka! Vanhu lava tshamaka emiakweni yoleyo va nyikeriwa vumbhoni hi riqingho.

³⁴ Tikarhatele Ku Chumayela Hinkwako-nkwako: Ku hetisisa ku tinyiketela ka hina swi katsa ni ku khumbeka hi swilo swa xihatla malunghana ni xiavelo xa hina xo chumayela rungula ra Mfumo. Leswaku hi fikelela vanhu enkarhini lowu va faneleke, hi fanele hi veka timhaka ta munhu hi xiyexe etlhelo leswaku hi ‘ponisa van’wana hi tindlela tin’wana.’ Malandza hinkwawo ya Yehovha lama tinyiketeleke ma lava ku vula hilaha muapostola Pawulo a vuleke hakona a ku: “Ndzi endla hinkwaswo leswi hikwalaho ka Mahungu Lamanene, leswaku ndzi kota ku averiwa minkateko ya wona.”—1 Kor. 9:22, 23.

³⁵ Pawulo u ye emahlweni a tsala: “Hikokwalaho ndzi ta tsaka ngopfu ku tidzunisa hi ta ku tsana ka mina, leswaku matimba ya Kriste ma ta aka eka mina. . . . Hikuva loko ndzi tsanile, hi kona ndzi nga ni matimba.” (2 Kor. 12:9, 10) Hi marito man’wana, a hi nga ta swi kota ku endla ntirho lowu hi matimba ya hina. Hi fanele hi khongela Yehovha leswaku a hi nyika moya wa yena lowo kwetsima lowu nga ni matimba. Loko hi khongela eka Xikwembu leswaku xi hi nyika matimba, hi nga tiyiseka leswaku xi ta hlamula swikhongelo swa hina. Kutani ku rhandza ka hina vanhu swi ta hi susumetela ku lava minkarhi yo chumayela mahungu lamanene eka vona, hinkwako-nkwako laha va nga kumekaka kona. Evhikini leri taka, swi nga va njhani loko wo tirhisa xin’wana xa swiringanyeto leswi hlamuseriweke eka xiengetelo lexi?