Chumayela Hi Mfumo
1 Eka Vaheveru 10:23, hi khutaziwa ku “khomelel[a] hi tiya eku languteleni loku hi ku twarisaka.” Naswona ntshembo wa hina wu sekeriwe eMfun’weni wa Xikwembu. Hi ku kongoma Yesu u lerise leswaku mahungu lamanene ya Mfumo ma fanele ma chumayeriwa ematikweni hinkwawo. (Mar. 13:10) Hi fanele hi tsundzuka leswi loko hi ri evutirhelini bya hina.
2 Loko hi endzela vanhu, hi ringeta ku sungula bulo hi swin’wana leswi va tsakisaka kumbe leswi va khumbekaka ha swona. Hi ntolovelo hi boxa swilo leswi va swi tivaka, swo tanihi vugevenga endhawini leyi va tshamaka eka yona, swiphiqo swa vantshwa, ku vilerisiwa hi swa ku tihanyisa kumbe minkitsinkitsi etimhakeni ta misava. Tanihi leswi mianakanyo ya vanhu vo tala yi voyameleke eka “ku vilela hi swa vutomi lebyi,” loko hi kombisa leswaku ha khumbeka naswona ha twisisa, hakanyingi vanhu va ta phofula leswi nga emianakanyweni ya vona. (Lk. 21:34) Leswi swi nga ha hi pfulela ndlela yo va byela ntshembo wa hina.
3 Hambiswiritano, loko hi nga tivoneli, bulo ra hina ri nga tshama ri ri eka swiphiqo ntsena ku fikela laha hi nga ha swi kotiki ku hetisisa xikongomelo xa riendzo ra hina—ku chumayela rungula ra Mfumo. Hambileswi hi yisaka nyingiso eka swiyimo leswo biha leswi tisaka mahlomulo lamakulu swonghasi, pakani ya hina i ku yisa nyingiso eka Mfumo, lowu eku heteleleni wu nga ta herisa swiphiqo hinkwaswo swa vanhu. Entiyisweni hi ni ntshembo lowo hlamarisa lowu vanhu va navelaka swinene ku twa hi ta wona. Hikwalaho hambileswi eku sunguleni hi nga ha vulavulaka hi swiyenge swin’wana swa ‘minkarhi leyi yo nonon’hwa ku langutana na yona,’ hi fanele hi hundzulukela eka rungula ra hina ra nkoka hi ku hatlisa, ku nga “Evhangeli leyi nga heriki.” Hi ndlela leyi hi ta hetisisa vutirheli bya hina hi xitalo.—2 Tim. 3:1; 4:5; Nhlav. 14:6.