Bokisi Ra Swivutiso

◼ I yini lexi faneleke xi tsundzukiwa malunghana ni ku hlayiwa ka tindzimana eminhlanganweni?

Nkarhi wo tala lowu tirhisiwaka eDyondzweni ya Xihondzo xo Rindza ni le Dyondzweni ya Buku ya Vandlha i wa ku hlayiwa ka tindzimana. Leswi swi vula leswaku makwerhu la averiweke ku hlaya u byarha vutihlamuleri lebyikulu tanihi mudyondzisi. U fanele a hlaya hi mukhuva lowu nga ta endla leswaku mhaka ya kona yi ‘vulavula’ lerova vayingiseri va nga yi twisisi ntsena kambe va tlhela va susumeteleka ku teka goza. (Neh. 8:8) Hikwalaho, muhlayi u fanele a xi lunghiselela kahle xiavelo xa yena. (1 Tim. 4:13; vona dyondzo 6 eka Buku Yo Letela Ya Xikolo.) Leswi nga laha hansi i swiringanyeto swa nkoka leswi nga pfunaka malunghana ni ku hlaya lokunene emahlweni ka vanhu.

Tirhisa Maendlelo Lamanene Yo Kandziyisa Mhaka: Kambisisa ka ha ri emahlweni leswaku i marito kumbe swiga swihi leswi faneleke swi kandziyisiwa leswaku mhaka yi ta twisisiwa hi ndlela leyi faneleke.

Vula Marito Hi Mfanelo: Ku vula marito hi mfanelo ni vuswikoti byo vulavula i swa nkoka leswaku vayingiseri va kota ku twisisa swiga leswi kumekaka ebukwini. Languta marito lama nga tolovelekangiki kumbe lama nga tirhisiwiki ngopfu eka xihlamusela-marito, kumbe u yingisela kha- sete leyi rhekhodiweke ya Sosayiti.

Vulavula Swi Twakala Naswona Hi Ku Hiseka: Ku vulavula swi twakala ni hi ku hiseka swi pfuxa ku tsakela, swi pfuxa mintlhaveko ni ku khutaza muyingiseri.

Vana La Tsakeke Ni Ku Ntshunxeka: Ku vulavula hi ndlela ya ntumbuluko swi fambisana ni ku hlaya hi ku rhelela. Loko muhlayi a lunghiselela ni ku titoloveta, a nga ntshunxeka, naswona hikwalaho ka sweswo ku hlaya ka yena ku ta tsakisa ematshan’wini yo phirha kumbe ku karharisa.—Hab. 2:2.

Hlaya Mhaka Ya Wena Hilaha Yi Tsariweke Hakona: Tinhlamuselo ta le hansi kun’we ni rungula leri nga eswiangini ri fanele ri hlayeriwa ehenhla loko ri hlamusela mhaka leyi kandziyisiweke. Leswi faneleke swi tshikiwa i tinhlamuselo leti kombisaka lomu rungula ra kona ri humaka kona ntsena. Nhlamuselo ya le hansi yi fanele yi hlayiwa hi nkarhi lowu yi kombisiwaka ha wona endzimaneni, u yi hlamusela hi ku vula u ku: “Nhlamuselo ya le hansi yi hlayekisa xileswi . . .” Endzhaku ka ku yi hlaya, hambeta u hlaya ndzimana hinkwayo.

Loko ku hlayela vanhu ku endliwa kahle, hi yin’wana ya tindlela letinene leti ha tona hi nga ‘dyondzisaka vanhu ku hlayisa hinkwaswo leswi lerisiweke’ hi Mudyondzisi wa hina Lonkulu.—Mt. 28:20.