Pfunani Vanghana Va Vukati Lava Nga Riki Timbhoni
1 Swa tsakisa swinene loko mimpatswa leyi tekaneke yi va ni vun’we evugandzerini bya ntiyiso. Hambiswiritano, emindyangwini yo tala i munghana un’we ntsena wa vukati la amukeleke ndlela ya ntiyiso. Xana hi nga va pfuna njhani vanghana va vukati lava nga riki Timbhoni ni ku va khutaza leswaku va gandzela Yehovha kun’we na hina?—1 Tim. 2:1-4.
2 Twisisa Leswi Va Swi Ehleketaka: Hambileswi van’wana va vanghana va vukati lava nga riki Timbhoni va nga ha kanetaka, hakanyingi swi vangiwa hi ku honisa kumbe ku nga twisisani. Munhu a nga ha vona onge wa honisiwa kumbe a va ni mavondzo hikwalaho ka leswi munghana wakwe a ha ku sungulaka ku tsakela swilo leswintshwa swa moya. Wanuna un’wana wa tsundzuka: “Loko ndzi ri swanga endlwini, ndzi titwe ndzi cukumetiwile.” Un’wana u ri: “Ndzi vone onge nsati wa mina ni vana va ndzi tshikile.” Vavanuna van’wana va nga ha ehleketa leswaku va lahlekeriwa hi mindyangu ya vona hikwalaho ka vukhongeri. (Vona Xihondzo xo Rindza xa August 15, 1990, matluka 20-3.) Hi yona mhaka leyi swi faneleke leswaku wanuna a va kona ni nsati wakwe loko ku endliwa dyondzo ya le kaya ya Bibele ku sukela eku sunguleni loko swi koteka.
3 Tirhani Tanihi Ntlawa: Mpatswa wun’wana wa Timbhoni wu tirhe swin’we hilaha ku humelelaka leswaku wu pfuna vanhu lava tekaneke leswaku va kuma ntiyiso. Endzhaku ka loko makwerhu wa xisati a sungule dyondzo ni nsati wa kona, makwerhu wa xinuna u endzele nuna wa kona. U swi kotile ku sungula dyondzo ni nuna loyi.
4 Vana Ni Xinghana Ni Malwandla: Mindyangu leyi nga evandlheni yi nga pfuna hi ku kombisa ku tsakela mindyangu leyi nga siki tihlanganisaka ni vugandzeri bya ntiyiso. Maendzo ma nga ri mangani ya xinghana ma nga pfuna munghana wa vukati la nga riki Mbhoni leswaku a vona Timbhoni ta Yehovha ti ri vanhu va rirhandzu, ti ri Vakreste lava khathalelaka lava khumbekaka hi vuhlayiseki bya munhu un’wana ni un’wana.
5 Nkarhi na nkarhi, vakulu va nga kambisisa matshalatshala lama endliweke sweswinyana ni ku xiyisisa leswaku hi swihi leswi engetelekeke leswi nga endliwaka leswaku ku pfuniwa vanghana va vukati lava nga riki Timbhoni hi xikongomelo xa ku va tisa eka Yehovha.—1 Pet. 3:1, nhlamuselo ya le hansi ya NW.