Nyangwa Lowukulu Wa Ntirho Wu Pfulekile

¹ Tanihi muchumayeri la gingiritekaka wa mahungu lamanene, hi ku hiseka Pawulo u lavisise tindhawu leti a ku ri ni xilaveko lexikulu eka tona, yin’wana ya tona a ku ri muti wa Efesa. U humelerile swinene loko a chumayela kwalaho lerova a kala a tsalela Vakreste-kulobye a ku: “Ndzi pfuleriwe nyangwa ya ntirho lowo saseka.” (1 Kor. 16:9) Pawulo u hambete a tirha ensin’wini yoleyo ni ku pfuna Vaefesa vo tala leswaku va hundzuka vapfumeri.—Mint. 19:1-20, 26.

² Namuntlha, hi pfuleriwe nyangwa lowukulu lowu yisaka entirhweni. Ka ha ri ni mavandlha lama nga swi kotiki ku tirha nsimu ya wona hinkwayo hi ku hetiseka lembe na lembe. Loko vandlha ra ka n’wina ri tsakela ku pfuna, hi kombela mi tihlanganisa ni mulanguteri wa xifundzha kumbe mi tsalela eka Sosayiti. Xisweswo, matshalatshala ya hina ma nga pfala xilaveko lexi nga kona etindhawini to karhi.—Ringanisa 2 Vakorinto 8:13-15.

³ Xana U Nga Tirha Laha Xilaveko Xi Nga Xikulu Kona? Xana u tshama u anakanyisisa hi xikhongelo malunghana ni ku tirha endhawini yin’wana loko swi koteka? U nga ha kota ku pfuna vandlha endhawini ya ka n’wina. Ha yini u nga vulavuli ni mulanguteri wa xifundzha hi mhaka leyi ivi u twa leswi a swi ringanyetaka? Kumbe swi nga endleka ensin’wini ya vandlha ra ka n’wina ku ri ni vanhu lava feke tindleve kumbe lava vulavulaka ririmi rimbe lava ku nga riki na munhu la koteke ku vulavula na vona. Leswaku u ta kota ku va pfuna, xana u nga tikarhatela ku dyondza ririmi ra vona? Tlhandla-kambirhi, kumbexana ana se ku ni ntlawa wa ririmi ro karhi kumbe vandlha ro karhi ekusuhi leri ‘kombelaka N’wini leswaku a rhumela vatirhi va Mfumo lava engetelekeke.’ (Mt. 9:37, 38) Loko swi ri tano, xana u nga swi kota ku ya pfuneta?

⁴ Eka makume ya malembe ya sweswinyana, magidi ya mindyangu ya Vakreste yi rhurhele etindhawini tin’wana hambi ku ri ematikweni man’wana leswaku yi ta hlanganyela hi xitalo entirhweni wo tshovela. Mpatswa wun’wana lowu endleke leswi wu te: “Hi lave ku tirhela Yehovha laha hi nga endlaka swo tala leswinene.” Loko u ri ni ku navela loku naswona u vona swi koteka ku rhurhela kun’wana etikweni leri, rhanga u bula ni vakulu va vandlha ra ka n’wina malunghana ni makungu ya wena.

⁵ Hi kunguhata ku mi nyika nxaxamelo wa tindhawu leti xilaveko xi nga xikulu eka tona. Eka nkarhi lowu, loko u navela ku vutisa Sosayiti malunghana ni lomu xilaveko xi nga kona, nyika Komiti ya Ntirho ya Vandlha papila leri hlamuselaka ku navela ka wena. Va ta ri rhumela eka Sosayiti kun’we ni tinhlamuselo ta vona. Ntsendze loko nyangwa lowukulu wa ntirho wa ha pfulekile, onge hinkwerhu ka hina hi nga hambeta hi khomekile entirhweni wa Yehovha.—1 Kor. 15:58.