Yehovha U Nyika Vanhu Matimba Lama Tlulaka Lama Tolovelekeke

¹ Lunghelo ra risima ra ntirho wo kwetsima—vutirheli bya Vukreste—ri nyikiwe vadyondzisiwa hinkwavo va Yesu. (Mt. 24:14; 28:19, 20) Kambe, ku nga hetiseki ka vumunhu ni mintshikilelo ya mafambiselo lawa ya swilo minkarhi yin’wana swi nga endla leswaku hi titwa hi nga faneleki hilaha ku heleleke.

² Loko leswi swi humelela, hi nga chaveleriwa hi papila ra muapostola Pawulo leri yaka eka Vakreste lava totiweke va le Korinto. U tsarile: “Hi ni xuma lexi eswibyeni swa vumba.” (2 Kor. 4:7) Pawulo a a tiyiseka: “Hi yona mhaka leyi hi nga tshikiki, hileswi hi nga ni vutirheli lebyi.” (2 Kor. 4:1) I ntiyiso, i ntlhontlho eka un’wana ni un’wana wa hina, hambi hi vatotiwa kumbe va “tinyimpfu tin’wana,” ku hambeta hi twarisa mahungu lamanene naswona hi “nga lan’wi.” Hi lava matimba lama humaka eka Xikwembu, lexi nyikaka “matimba lama tlulaka lama tolovelekeke.”—Yoh. 10:16; 2 Kor. 4:7b.

³ Lexi tsakisaka, Timbhoni to tala i vaevhangeli lava hisekaka ku nga khathariseki leswi ti bohekaka ku langutana ni nkaneto lowukulu, swiphiqo leswikulu swa rihanyo kumbe ku pfumala mali. Hinkwerhu ka hina hi fanele hi swi xiya leswaku xiavelo xa hina xa ku chumayela xi seketeriwa hi Yehovha. Ematshan’weni yo pfumelela ku hetiwa matimba kumbe ku chava swi tsanisa ku tiyimisela ka hina ku chumayela, a hi “[hambeteni hi] kuma matimba eHosini ni le ka ntamu wa vukulu bya yona.”—Ef. 6:10; Swiv. 24:10.

⁴ Ndlela Yo Kuma Matimba Ya Xikwembu: Phikelela exikhongelweni, u kombela mpfuno wa Xikwembu ni matimba ya xona. (Rhom. 12:12; Flp. 4:6, 7) Kutani, hi mbilu ya wena hinkwayo, tshemba Yehovha leswaku a ku nyika matimba lama tlulaka lama tolovelekeke. (Swiv. 3:5) Hlaya mintokoto ya vutomi ya manguva lawa eka timagazini ta hina, hikuva yi nyika vumbhoni bya leswaku Yehovha u pfuna malandza ya yena namuntlha leswaku ma tiyisela miringo. Tshama u ri karhi u tihlanganisa ni vamakwerhu evandlheni, naswona u nga fularheli ku ya eminhlanganweni ya vandlha.—Rhom. 1:11, 12; Hev. 10:24, 25.

⁵ Onge hi nga endla hinkwaswo leswi hi nga swi kotaka leswaku hi va exiyin’weni lexinene xo kuma matimba ya Yehovha—matimba lama tlulaka ya ntolovelo ni lama nga ta hi pfuna leswaku hi nga lan’wi entirhweni wa risima swinene wa ku chumayela hi Mfumo.