Xixima Ndhawu Leyi Yehovha A Gandzeriwaka Eka Yona

¹ Loko hi ri vaendzi endlwini ya munhu, hi kombisa xichavo eka nhundzu ya munhu yoloye, a hi endli nchumu lexi nga ta yi onha, naswona a hi kavanyeti nhleleko wa ndyangu wolowo. Leswi i swa risima swonghasi loko hi ri vaendzi va Yehovha! Hi fanele hi tiva ndlela leyi hi faneleke hi tikhoma ha yona loko hi ri endyangwini wakwe. (Ps. 15:1; 1 Tim. 3:15) Hambiloko minhlangano ya Vukreste yi khomeriwa eHolweni ya Mfumo, ekaya ra munhu kumbe emuakweni wa tiko, hinkwerhu ka hina hi fanele nkarhi na nkarhi hi kombisa xichavo eka ndhawu ya hina ya vugandzeri onge hiloko ku ri yindlu ya Yehovha, loyi “v̌uhosi bya yena byi tlaku[keke] ku tlula misav̌a ni matilo.”—Ps. 148:13.

² Vamakwerhu van’wana va kombisa ku pfumala xichavo eminhlanganweni hi ku ba huwa kumbe hi ku endla onge rungula leri nyikeriwaka a hi ra nkoka. Vanhu va nga ri vangani lavakulu va dya mabulo swi nga fanelanga ephasejini, exihambukelweni kumbe ehandle ka Holo ya Mfumo hi nkarhi wa minhlangano. Loko n’wana lonkulu a lerisiwa ku sala ni lontsongo, minkarhi yin’wana lavambirhi va sungula ku tlanga naswona va lahlekeriwa hi nongonoko. Vantshwa van’wana va voniwe va ri ehandle ka Holo ya Mfumo endzhaku ka minhlangano, va ri karhi va tlanga, va ba huwa yo tinga hambi ku ri ku xungetana hi tindlela to lwa ta karati. Minkarhi yin’wana va kavanyeta vaakelani kumbe ku pfalela timovha endhawini yo paka kumbe exitarateni.

³ Ndlela Yo Papalata Ku Pfumala Xichavo: Loko hi tlangela ku xiximeka ni ku kwetsima ka vugandzeri bya hina, a swi kanakanisi leswaku a hi nge va kavanyeti van’wana hi ku hlevetela, ku dya, ku cakunha chingamu, ku ba huwa hi maphepha, ku tshamela ku ya exihambukelweni swi nga fanelanga kumbe ku tolovela ku fika eminhlanganweni nkarhi se wu hundzile. Vatswari lava xiximaka ni lava tlangelaka a va nge va pfumeleli vana va vona leswaku va thyakisa khapete, switulu kumbe makhumbi ya Holo ya Mfumo kumbe ekaya leri dyondzo ya buku yi khomeriwaka eka rona. Naswona a swi kanakanisi leswaku hinkwerhu ka hina ha pfumela leswaku mahanyelo lama khomisaka tingana, ku vulavula loku humeke endleleni kumbe mafenya lama thyakeke a ma pfumeleriwi eminhlanganweni ya hina.—Ef. 5:4.

⁴ Loko nkarhi na nkarhi hi tsundzuka xikongomelo xa minhlangano ya hina ya Vukreste, hi ta tiyiseka leswaku hina ni vana va hina hi kombisa xichavo lexi faneleke eka ndhawu ya vugandzeri bya Yehovha laha hi ‘rhandzeke ku tshama kona.’—Ps. 84:10.