Ntirho Lowu Sekeriwaka Hi Xikwembu
1 Malandza yo tala ya Xikwembu namuntlha a ma dyondzekanga, a ma fuwanga naswona a ma na swikhundlha leswi tlakukeke emafambiselweni lawa ya sweswi ya swilo. Hikwalaho ka sweswo, vanhu van’wana va wu tekela ehansi ntirho wa hina wo chumayela. (Esa. 53:3) Hambiswiritano, ntirho lowu hi wu endlaka wo dyondzisa vanhu Bibele, wu chavelele vanhu va timiliyoni emisaveni hinkwayo, wu tlhela wu va nyika ntshembo. Swi tise ku yini leswaku vanhu lava nga dyondzekangiki va kota ku endla ntirho wo tano? Va pfuniwe ntsena hileswi Xikwembu xi va seketelaka. (Mat. 28:19, 20; Mint. 1:8) Muapostola Pawulo u te: “Xikwembu xi hlawule swilo swa vuphukuphuku emisaveni leswaku xi ta va khomisa tingana vanhu vo tlhariha.”—1 Kor. 1:26-29.
2 Vo tala eka vaapostola ni Vakreste va lembe-xidzana ro sungula a va ri vanhu “lava nga dyondzekangiki, lava tolovelekeke.” (Mint. 4:13) Hambiswiritano, va endle ntirho wa vona wo chumayela mahungu lamanene hi xivindzi naswona Yehovha u ma katekisile matshalatshala ya vona. Hambileswi a va langutana ni swihinga ni ku kanetiwa, ‘rito ra Yehovha ri ye ri engeteleka ni ku hlula hi matimba.’ A xi kona lexi a xi ta sivela ntirho wolowo hikuva a wu seketeriwa hi Xikwembu. (Mint. 5:38, 39; 19:20) Swi tano ni manguva lawa. Vafumi va matimba va ringetile ku sivela mahungu lamanene leswaku ma nga ha chumayeriwi, kambe va be hansi.—Esa. 54:17.
3 Ku Dzuneka Hinkwako Ku Ya Eka Xikwembu: Xana hi fanele hi tibuma leswi hi nga malandza lama seketeriwaka hi Xikwembu? Nikatsongo! Loko Pawulo a vulavula hi ntirho wo chumayela lowu endliwaka hi Vakreste, u te: “Hi ni xuma lexi eswibyeni swa vumba, leswaku matimba lama tlulaka lama tolovelekeke ma va ya Xikwembu, ku nga vi ya hina.” (2 Kor. 4:7) Pawulo u swi xiyile leswaku matimba lama humaka eka Xikwembu hi wona ntsena ma n’wi pfuneke leswaku a endla ntirho wa yena wo chumayela.—Efe. 6:19, 20; Filp. 4:13.
4 Na hina ha swi tiva leswaku hi kota ku endla ntirho wo chumayela hikwalaho ka “mpfuno lowu humaka eka Xikwembu.” (Mint. 26:22) Yehovha u hi tirhisa hi ndlela leyi hlamarisaka leswaku hi twarisa ku ninginika loku a nga ta ku endla ematikweni hinkwawo loko a tisa ndzoviso lowukulu lowu nga kwala nyongeni. (Hag. 2:7) Hi ni lunghelo lerikulu ro va “vatirhi-kulobye ni Xikwembu” entirhweni lowukulu wo tshovela hi tlhelo ra moya!—1 Kor. 3:6-9.