“Yehovha I Mupfuni Wa Mina”
1 Loko Yesu a rhuma vadyondzisiwa vakwe vo sungula, u va byele marito lawa: “Maswivo! Ndza mi rhuma kukota tinyimpfu exikarhi ka timhisi.” (Mt. 10:16) Xana sweswo swi va vangele ku chava ivi va tshika ku chumayela? E-e. Va namarhele langutelo leri phofuriweke hi muapostola Pawulo endzhakunyana loko a byele Vakreste-kulobye a ku: “Hi ta va ni xivindzi lexikulu kutani hi ku: ‘Yehovha i mupfuni wa mina; ndzi nga ka ndzi nga chavi. Xana munhu a nga ndzi endla yini?’” (Hev. 13:6) Va tsakele ku va vanhu lava faneriwaka hi ku xumbadziwa hikwalaho ka vito ra Yesu, naswona va hambete va twarisa mahungu lamanene handle ko karhala.—Mint. 5:41, 42.
2 Ntirho wo chumayela wa misava hinkwayo wu le ka swiyenge swo hetelela namuntlha. Hilaha Yesu a vhumbeke hakona, hi vengiwa hi matiko hinkwawo. (Mt. 24:9) Ntirho wa hina wo chumayela wa karhi wa kanetiwa ni ku hlekuriwa, naswona eswiphen’wini swin’wana swa misava, wu yirisiwile. Loko hi kayivela ripfumelo, hi nga fikeriwa hi ku chava. Hambiswiritano, ku tiva leswaku Yehovha i Mupfuni wa hina swa hi phyuphyisa ni ku hi nyika matimba yo tiyisela.
3 Ku va ni xivindzi i ku va ni matimba, ku tiya ni vurhena. I mfanelo leyi hambaneke ni ku chava, ku chuha ni vutoya. Nkarhi hinkwawo vadyondzisiwa va Yesu a va lava xivindzi leswaku va tiyisela. Leswi i swa nkoka leswaku hi ta papalata ku hetiwa matimba hi malangutelo ni hi swiendlo swa misava leyi nga ni vulala ni Xikwembu. Vona ndlela leyi swi hi khutazaka ha yona ku anakanyisisa hi xikombiso lexinene xa Yesu, la hluleke misava! (Yoh. 16:33) Nakambe tsundzuka vaapostola, lava loko va langutane ni miringo leyikulu va vuleke hi xivindzi va ku: “Hi fanele ku yingisa Xikwembu tanihi mufumi ku tlula vanhu.”—Mint. 5:29.
4 A Hi Muxaka Wa Vanhu Lava Tlhelelaka Endzhaku: Hi fanele hi tikarhatela ku hlayisa langutelo lerinene ehenhleni ka ntirho wa hina. (Hev. 10:39) Nkarhi na nkarhi hi fanele hi tsundzuka leswaku hi rhumiwa hi Yehovha tanihi xikombiso xa rirhandzu ni tintswalo takwe eka vanhu hinkwavo. A nga si tshama a kombela malandza yakwe leswaku ma endla nchumu lowu nga ta ka wu nga pfuni nchumu. Swilo hinkwaswo leswi hi averiweke ku swi endla, eku heteleleni swi ta vuyerisa lava rhandzaka Xikwembu.—Rhom. 8:28.
5 Ku va ni langutelo lerinene swi ta hi pfuna ku hambeta hi lava vanhu lava fanaka ni tinyimpfu ensin’wini ya hina. Hi nga ha languta ku pfumala ku tsakela ka vanhu tanihi xikombiso xa ku karhateka ni ku heleriwa ka vona hi ntshembo. A hi endleni leswaku rirhandzu ra hina ri hi susumetela ku va ni ntwela-vusiwana ni ku lehisa mbilu. Nkarhi na nkarhi loko hi fambisa tibuku kumbe hi vona xikombiso xa ku tsakela, pakani ya hina ku fanele ku va ku endla riendzo ro vuyela hi ku hatlisa ni ku endla leswaku ku tsakela ku ya emahlweni. A hi fanelanga hi kanakana vuswikoti bya hina byo sungula dyondzo ya Bibele kumbe bya ku yi fambisa hi ndlela leyi humelelaka. Ematshan’weni ya sweswo, nkarhi na nkarhi hi fanele hi lava mpfuno wa Yehovha ni nkongomiso wa yena hi xikhongelo, hi ri ni ntshembo wa leswaku u ta hi pfuna.
6 Ha tiyiseka swinene leswaku Yehovha u ta kongomisa ntirho lowu ku fikela emakumu ka wona. (Ringanisa Vafilipiya 1:6.) Ku n’wi tshemba ka hina hi ku helela tanihi Mupfuni werhu ka hi tiyisa, leswaku hi nga “tshiki ku endla leswi nga swinene.”—Gal. 6:9.