Tsima Ro Hlawuleka Ra Vuhundzuluxeri Bya Misava Leyintshwa
1 N’hweti leyi hi ni tsima ro hlawuleka ro fambisa Vuhundzuluxeri Bya Misava Leyintshwa ni buku leyi nge Vutivi. Hi kombela vahuweleri hinkwavo leswaku va yisa nyingiso swinene eku fambiseni ka Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi Xibunu, Xizulu, Xisuthu, Xixhosa ni Xitsonga. Loko muhuweleri ha un’we o fambisa yin’we ntsena ya Tibibele leti hi December, hi ta va hi hungute mphakelo lowukulu lowu hi nga na wona. Hi tsakela ngopfu ku endla tano emahlweni ka ku va Bibele leyi heleleke yi humesiwa hi tin’wana ta tindzimi leti.
2 Xana swa tika ku fambisa minkandziyiso leyi ya Matsalwa ya Xigriki hi tindzimi to hambana-hambana ta laha tikweni? A swi tano nikatsongo! Vahuweleri lava nkarhi na nkarhi va fambaka va ri ni Tibibele leti eminkwameni ya vona va xiye leswaku va swi kota ku fambisa tin’wana ta tona vhiki ni vhiki. Makwerhu un’wana u teke bokisi hinkwaro ra tikopi ta Xibunu ivi a ti fambisa hinkwato exitarateni ni mixo! Loko vandlha ra ka n’wina ri nga ri na tona, ha yini mi nga ti odi hi ku hatlisa? Mi nga ha kuma mphakelo lowu engetelekeke emintsombanweni eku heleni ka lembe.
3 Hi xihi xingheniso lexi u nga ta xi tirhisa? Endzhaku ka loko mi pfuxelanile, u nga ha ku: “Hi le ku fambiseni ka vuhundzuluxeri lebyintshwa bya Testamente Leyintshwa hi [vula ririmi ra kona]. Hi yi fambisela vanhu hi munyikelo wutsongo swinene wa R4,00.” Sweswo swi ta endla leswaku munhu wa kona a nga vileli, hikuva u ta va a tiva leswaku a ku laveki mali yo tala. U nga ha engetela hi ku: “Ndzi kombela ku ku komba swiyenge swi nga ri swingani swa vuhundzuluxeri lebyi.” Yana emahlweni u n’wi kombisa mavekelo man’wana ya timhaka lama hlawulekeke ya Vuhundzuluxeri Bya Misava Leyintshwa, tanihi Matewu 5:3, kumbe u n’wi kombisa Xikombo Xa Marito Lama Nga eBibeleni kumbe Tinhloko-mhaka To Vulavurisana Ta Bibele ni ndlela leyi swiyenge leswi swi nga tirhisiwaka ha yona. Hi xikombiso, u nga ha vutisa n’wini wa muti: “Loko u lava ku dyondza swo tala malunghana ni leswi humelelaka eka munhu loko a fa, u nga languta kwihi eBibeleni leswaku u kuma matsalwa lama hlamuselaka leswi?” Pfula eka Tinhloko-mhaka To Vulavurisana Ta Bibele emakumu ka Bibele ivi u n’wi kombisa matsalwa hinkwawo lawa a nga langutaka wona ehansi ka nhloko-mhaka leyi nge “Rifu,” ivi u n’wi fambisela yona. Vanhu vo tala va ta swi tsakela ku teka Matsalwa Ya Vukreste Ya Xigriki ni buku leyi nge Vutivi hi R9,00 loko u fambisa leyi nga ni xifunengeto xo tsindziyela kumbe R7,75 loko u fambisa leyi nga ni xifunengeto xo olova. Loko va nga swi koti ku ti teka hatimbirhi, fambisa Matsalwa Ya Vukreste Ya Xigriki hi R4,00. Loko u burisana ni loyi a vulavulaka Xitswana naswona Bibele ya Xitswana yi nga ri kona exitokweni xa vandlha ra ka nwina kumbe loko u burisana ni munhu la vulavulaka Xipedi kumbe Xivhenda, n’wi fambisele buku leyi nge Vutivi ntsena. Hi Xinghezi ku ta fambisiwa New World Translation of the Holy Scriptures ni buku leyi nge Vutivi.
4 Ku nga khathariseki leswaku u le ku endleni ka ntirho wa yindlu na yindlu, ntirho wa le xitarateni, maendzo yo vuyela kumbe ku nyikela vumbhoni hi xitshuketa, nkarhi na nkarhi famba ni tikopi ta Matsalwa Ya Vukreste Ya Xigriki naswona u nga kanakani ku ti fambisa. Xana i nyiko yihi leyi u nga yi nyikaka vanhu ku tlula Bibele leyi hundzuluxeriweke hi ndlela yo twisiseka swinene yo tanihi Vuhundzuluxeri Bya Misava Leyintshwa? Nakambe anakanya, Xana kopi ya wena yi languteka njhani? Kumbexana se yi hlakarile hikwalaho ka ku tirhisiwa, hikwalaho u nga tikumela kopi leyintshwa. Nakambe ku vuriwa yini hi vana va wena? Xana va na tona tikopi ta vona vini ta Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi ririmi ra vona? A hi tirhiseni nkarhi wun’wna ni wun’wana en’hwetini leyi ya December leswaku hi fambisa Bibele leyi ya risima ensin’wini ya hina.