“Lwana Nyimpi Leyinene Ya Ripfumelo”
1 Muapostola Pawulo u tsundzuxe Timotiya ku ‘lwa nyimpi leyinene ya ripfumelo.’ (1 Tim. 6:12) Pawulo hi byakwe u hanye hi ku pfumelelana ni marito wolawo. Loko a dyuhele, u vulavule hi ku tiyiseka leswaku u lwe nyimpi leyinene. (2 Tim. 4:6-8) Hi tindlela hinkwato, u endle ntirho wa vutirheli hi vurhena, hi xivindzi ni hi ku tiyisela. Hi ku tekelela xikombiso xakwe, na hina hi nga tiyiseka leswaku hi endla leswi nga mandleni ya hina leswaku hi lwela ripfumelo ra Vukreste.
2 Endla Matshalatshala Lama Lavekaka: Pawulo u tirhe hi matimba evutirhelini. (1 Kor. 15:10) Na hina hi fanele ku endla tano loko hi ri karhi hi lava vanhu hinkwavo lava fanelekaka ensin’wini ya ka hina. (Mat. 10:11) Leswaku hi fikelela van’wana va vona, swi nga ha lava leswaku hi vindzuka hi ya chumayela lava hi nga ta hlangana na vona exitarateni. Kumbe swi nga lava leswaku hi tirha nindzhenga kumbe nimadyambu leswaku hi ta kuma vanhu loko va vuyile emakaya ya vona.
3 Swi lava ku tilaya ni ku va ni xiyimiso lexinene loko hi lava ku fika hi nkarhi emintlaweni ya hina ya dyondzo ya buku leswaku hi ta hlanganyela eka nhlangano wa ntirho wa nsimu. Hi xikombiso, swirho swin’wana swa ndyangu wa Bethele, swi famba kwalomu ka timinete ta 45 leswaku swi ta hlanganyela evutirhelini hi mahelo-vhiki ni mavandlha lawa swi averiweke eka wona. Nakambe, hi nga khutaziwa hi vahuweleri van’wana ni mindyangu yin’wana evandlheni ra ka hina, lava fambaka mpfhuka wo leha kambe va fikaka hi nkarhi eminhlanganweni. Swikombiso swo tano swa ku hiseka ni ku hleleka ka munhu hi xiyexe swi fanele ku tekeleriwa.
4 Hi fanele hi susumeteleka ku tlhelela eka hinkwavo lava hi va kumaka va tsakela. Hambiloko hi fambisa tibuku exitarateni kumbe hi nyikela vumbhoni hi xitshuketa, hi fanele ku endla matshalatshala ya ku kuma adirese ya munhu yoloye kumbe nomboro yakwe ya riqingho. Kutani hi nga n’wi endzela leswaku hi ta yisa ku tsakela koloko emahlweni ni ku lwela ku sungula dyondzo ya Bibele.
5 Vana Kona eNsin’wini Nkarhi Ni Nkarhi: Pawulo a a tshama a ri eku chumayeleni naswona a a swi endla hi rixaladza. (Rhom. 15:19) Ku vuriwa yini ha wena? Xana u hlanganyela minkarhi hinkwayo evutirhelini? Xana u yile ensin’wini n’hweti leyi? Vafambisi va Dyondzo ya Buku ya Vandlha va tsakela ku vona un’wana ni un’wana wa ntlawa wa vona a ri kona evutirhelini hi August. Va ta ku pfuna leswaku u endla tano.
6 Hi ku tekelela xikombiso xa Pawulo xa ku seketela mahungu lamanene hi xitalo, hi ta hambeta hi ‘lwa nyimpi leyinene ya ripfumelo.’