“Fuwa Hi Mintirho Leyinene”

¹ Emalembeni yo hetelela yo gingiritekela vutirheli, muapostola Pawulo u tirhe ekusuhi swinene na Timotiya na Tito. U tsale marito lama fanaka ya xikhutazo, a ma kongomisa eka un’wana ni un’wana wa vona. U byele Tito leswaku “lava kholweke Xikwembu” va fanele va “veka mianakanyo ya vona eku hlayiseni ka mintirho leyinene.” (Tito 3:8) Kutani a byela Timotiya leswaku lava va vekeke ntshembo wa vona eka Xikwembu va fanele va “tiyimisela ku avelana ni van’wana.” (1 Tim. 6:17, 18) Leyi i ndzayo leyinene eka hina hinkwerhu! Kambe i yini lexi nga ta hi susumeta leswaku hi endla mintirho leyinene evuton’wini bya hina? Naswona hi yihi mintirho leyi hi ku kongoma hi nga yi endlaka enkarhini lowu taka?

² Ripfumelo ra hina ni ku rhandza Yehovha swin’we ni ntshembo lowunene lowu a hi nyikeke wona, swi hi susumetela ku fuwa hi mintirho leyinene. (1 Tim. 6:19; Tito 2:11) Ngopfu-ngopfu hi nkarhi lowu wa lembe, ha tsundzuxiwa leswaku Yehovha u rhumele N’wana wa yena emisaveni leswaku Yesu a ta susa xisandzu evitweni ra Tata wa yena ni ku pfula ndlela leyi yisaka evuton’wini lebyi nga heriki eka vanhu hinkwavo lava byi va fanelaka. (Mat. 20:28; Yoh. 3:16) Leswi swi ta vekiwa erivaleni loko ku tlangeriwa Xitsundzuxo xa rifu ra Kreste hi March 28. Ku kombisa leswaku ha wu tlangela ntshembo lowu hi nga na wona wa ku kuma vutomi lebyi nga heriki, xana a hi susumeteleki ku endla hinkwaswo leswi hi nga swi kotaka leswaku hi “fuwa hi mintirho leyinene”? Ina, ha susumeteleka! Hi yihi mintirho leyi hi nga yi endlaka sweswi?

³ Mintirho Leyinene Leyi Nga Endliwaka Hi March Ni Le Nkarhini Lowu Taka: A swi kanakanisi leswaku hi ta va kona eXitsundzuxweni—ku nga xiendlakalo lexikulu elembeni eka Timbhoni ta Yehovha emisaveni hinkwayo. (Luka 22:19) Kambe hi lava leswaku ntsako wa xiendlakalo xexo hi wu avelana ni vanhu vo tala hilaha swi nga kotekaka hakona. Loko u languta xiviko xa ntirho eka Buku Ya Lembe Ya 2002, u ta kuma leswaku n’wexemu ematikweni yo tala emisaveni hinkwayo, nhlayo ya lava va veke kona eXitsundzuxweni a yi tlula nhlayo ya vahuweleri ka nharhu, ka mune, ka ntlhanu kumbe ku tlula. Kunene swi lave matshalatshala lamakulu ya vahuweleri hinkwavo emavandlheni leswaku va hangalasa swiphephana swa swirhambo swa Xitsundzuxo emasin’wini ya ka vona. Hikokwalaho hi lava ku heta nkarhi wo tala hilaha hi nga kotaka hakona ku sukela sweswi ku ya fika hi March 28, hi ri karhi hi rhambela vanhu eXitsundzuxweni, hi va pfuna leswaku va dyondza hi ntshembo wa ku ponisiwa.

⁴ Hi April ku va ku nga si titimela ngopfu. Kutani hi nga wu tirhisa njhani nkarhi lowu leswaku hi “fuwa hi mintirho leyinene”? Hi ku hambeta hi hlanganyela hi ku hiseka entirhweni wo chumayela mahungu lamanene, hi ‘hisekela mintirho leyinene.’ (Tito 2:14; Mt. 24:14) Loko u nga swi kotanga ku va phayona ra nkarhinyana hi March, xana u nga phayona hi April na hi May kumbe hi yin’wana ya tona? Loko u ri karhi u phayona hi March xana u nga ya emahlweni?

⁵ Van’wana lava tirhaka va kuma leswaku va nga chumayela awara yin’we kumbe ku tlula loko va ya entirhweni, va chumayela exitarateni kumbe va vulavurisana ni vanhu lava tirhaka emabindzwini lama pfulaka nimpundzu swinene. Van’wana va tirhisa wun’wana wa nkarhi wa vona wo wisa entirhweni ninhlikanhi leswaku va chumayela. Van’wana va kume swi koteka ku fambisa dyondzo ya Bibele ni mutirhi-kulobye hi nkarhi wolowo. Vamakwerhu vo tala va xisati lava nga tirhiki va kota ku kuma nkarhi wo chumayela loko vana va vona va ri exikolweni. Hi ku pfuka ka ha ri nimixo masiku man’wana leswaku va endla mintirho ya le kaya, va kuma nkarhi lowu engetelekeke ninhlikanhi wo chumayela ni ku dyondzisa.—Efe. 5:15, 16.

⁶ Hambiloko u nga ta swi kota ku va phayona ra nkarhinyana, kumbexana u nga tiendlela xiyimiso xa wena n’wini lexi nga ta ku pfumelela ku hlanganyela hi xitalo evutirhelini, u endla hinkwaswo leswi u nga swi kotaka leswaku u ‘endla leswinene, u fuwa hi mintirho leyinene, u hanana, u tiyimisela ku avelana ni van’wana’ ntiyiso.—1 Tim. 6:18.

⁷ Tsundzuka Ntirho Lowunene Wo Endla Vadyondzisiwa: Lembe ni lembe ku ni vanhu lava tsakelaka lava taka eXitsundzuxweni. Xana swi nga koteka leswaku van’wana evandlheni va khathalela lava veke kona kambe ku nga ri na loyi a va dyondzelaka? Xana va nga endzeriwa nakambe hi xikongomelo xa ku va pfuna va endla nhluvuko emoyeni? Swi nga ha endleka leswaku van’wana va lava a va ri kona eXitsundzuxweni i maxaka ya Timbhoni. Van’wana swi nga ha endleka ku ri vanhu lava tshameke va hlayeriwa enkarhini lowu hundzeke naswona va lava xikhutazo ntsena leswaku va tlhela va sungula ku dyondzeriwa ni ku va kona eminhlanganweni minkarhi hinkwayo. Mawaku ntsako lowu hi nga ta va na wona loko hi va vona va va malandza-kulorhi ya Yehovha lama hisekaka!

⁸ Hi ku hlanganyela hi xitalo evutirhelini hi March ni hi tin’hweti leti landzelaka, swi le rivaleni leswaku hi ta kuma vanhu vo tala lava tsakelaka lava hi nga endlaka maendzo yo vuyela eka vona. Ringeta ku va siya ni xivutiso. Kutani u tshembisa ku xi hlamula loko u vuya. Hi ku endla tano, hi ta pfula ndlela ya riendzo ro vuyela. Swi ta va swinene loko ho tlhelela hi ku hatlisa. Loko hi nga swi kotanga ku sungula dyondzo eriendzweni ro sungula, hi lava ku ringeta ku yi sungula eka riendzo leri landzelaka loko swi koteka.

⁹ Loko hi chumayela exitarateni hi fanele ku xalamukela ku ringeta ku sungula mabulo ni vanhu. Vahuweleri vo tala va nyikiwe mavito, tiadirese ni tinomboro ta riqingho hi vanhu lava tsakelaka lava va hlanganeke na vona loko va chumayela exitarateni. Loko munhu loyi u vulavuleke na yena a nga tshami kona ensin’wini ya ka n’wina, teka fomo leyi nge Please Follow Up (S-43) eHolweni ya Mfumo, u yi tata kutani u yi nyika matsalana wa vandlha ra n’wina, yena u ta yi hundzisela evandlheni ra nsimu leyi munhu yoloye a tshamaka eka yona. Loko matsalana a nga ta swi kota ku yi hundzisela evandlheni rero, u ta yi rhumela erhavini leswaku rona ri yi rhumela. Hi ndlela yoleyo ku tsakela ka yena ku ta yisiwa emahlweni.

¹⁰ Loko u teke nomboro ya riqingho ku nga ri adirese, endla riendzo ro vuyela hi ku bela munhu yoleyo riqingho. Swi lunghiselele ka ha ri emahlweni leswi u lavaka ku bula ha swona. Buku ya wena leyi nge Ku Hlamulana a yi ve ekusuhi na wena leswaku u ta yi tirhisa hi ku hatlisa loko swi laveka. Van’wana va va ni vuyelo lebyinene hi ku dyondza ni vanhu hi riqingho, ku katsa ni vanhu lava a swi tika ku va kuma ekaya. Makwerhu un’wana wa xisati u sungule ku kombela tinomboro ra riqingho eka vavasati lava tsakelaka, lava a a va kuma loko a ri karhi a chumayela hi yindlu ni yindlu, hikwalaho ka sweswo, u kote ku sungula tidyondzo timbirhi ta Bibele.

¹¹ Khomisana Ni Vakulu Eku Pfuneni Ka Vanhu Lava Holeke: Vakulu va swi tsakela swinene ku pfuna vanhu lava hi rirhandzu. Vo tala va vona va tlhele va susumeteleka ku sungula ku va kona eminhlanganweni ya vandlha. Va xi vonile xilaveko xa ku tihlanganisa swinene ni nhlengeletano ya Yehovha ni ku kuma nsirhelelo wa moya lowu hlamuseriweke eka Pisalema 91. Van’wana va vona se va swi lunghekerile ku tlhela va sungula ku chumayela. Loko van’wana lava holeke vo va kona eXitsundzuxweni en’hwetini leyi, na vona va ta tsakela ku dyondzeriwa Bibele. Loko swo va tano, vakulu va ta endla malunghiselelo ya leswaku un’wana a dyondza ni lava va lavaka mpfuno. Loko wo komberiwa leswaku u hoxa xandla hi ndlela yoleyo, ntirhisano wa wena wu ta tlangeriwa swinene.—Rhom. 15:1, 2.

¹² Hambetani “Eku Hlayiseni Ka Mintirho Leyinene”: Vo tala lava veke maphayona ya nkarhinyana hi n’hweti yin’we kumbe to hlayanyana, va kume leswaku ntirho wa vona wa nsimu wu andzile etin’hwetini leti landzelaka. Va kume vanhu lava tsakelaka, lava va bohekeke ku tlhelela eka vona. Sweswo swi va susumetele ku endla matshalatshala lama engetelekeke leswaku va ya ensin’wini ko tala leswaku va ta tlhela va kuma vanhu lava tsakelaka. Van’wana va sungule tidyondzo kutani sweswo swi va pfune ku hlanganyela hi xitalo evutirhelini.

¹³ Kasi van’wana va kume ntsako lowukulu hi ku endla leswi engetelekeke entirhweni wa ku chumayela ni ku endla vadyondzisiwa lerova va susumeteleke ku kambisisa swilo leswi va swi rhangiseke evuton’wini bya vona. Hikwalaho ka sweswo, van’wana va kote ku hunguta mintirho yo karhi ya ku tihanyisa ivi va ya emahlweni va ri maphayona ya nkarhinyana. Van’wana va kote ku va maphayona ya nkarhi hinkwawo. Va kote ku veka ntshembo wa vona hilaha ku heleleke eka Xikwembu, ku nga ri eka swilo leswi misava yi swi tshembisaka. Va kume leswaku hi ku va lava ‘hananaka, va tiyimisela ku avelana’ va kume mikateko leyi fuweke leyi humaka eka Yehovha naswona va tiyise ntshembo wa vona wa ku kuma ‘vutomi bya xiviri.’ (1 Tim. 6:18, 19) Kunene, loko vo tala va va maphayona, vandlha hinkwaro ra vuyeriwa. Maphayona ma tolovele ku vulavula hi mintokoto ya wona kutani ma rhamba van’wana leswaku va hlanganyela na wona evutirhelini, sweswo swi vange leswaku vumoya bya vandlha byi va exiyin’weni xa le henhla.

¹⁴ Onge hinkwerhu hi nga “fuwa hi mintirho leyinene” hi nkarhi lowu wa Xitsundzuxo ni le ndzhaku ka wona, hi ku andzisa ku hlanganyela ka hina evutirhelini bya Vukreste. A hi kombiseni ku tlangela ka hina leswi Yehovha a hi endleleke swona hi ku hi nyika ntshembo wa ku hanya hilaha ku nga heriki emisaveni leyintshwa yo lulama.—2 Pet. 3:13.