‘Endlela Hinkwavo Leswi Nga Swinene’
1 Nhloko-mhaka leyi nge “Chumayela Rito Ra Xikwembu Hi Ku Hetiseka” ni leyi nge “Fuwa Hi Mintirho Leyinene” ti tirhisiwe eka swiengetelo swa Vutirheli Bya Hina Bya Mfumo bya February na March 2002. (Kol. 1:25; 1 Tim. 6:18) Eminkandziyisweni yoleyo hi khutaziwe ku tikarhatela swinene ku pfuna vanhu lava tsakelaka leswaku va va kona eXitsundzuxweni, hi pfuna vanhu lava holeke leswaku va tlhela va hisekela mintirho ya vandlha, hi tlhela hi pfuna vana va hina ni swichudeni swa Bibele leswi fanelekaka leswaku swi sungula ku chumayela mahungu lamanene. A swi kanakanisi leswaku hi kote ku humelela hi ndlela yo karhi etimhakeni teto hikwalaho ka ku tikarhata ka hina. Kutani, “loko ntsena hi ri ni nkarhi lowunene wa swona, a hi [hambeteni hi endlela] hinkwavo leswi nga swinene.”—Gal. 6:10.
2 Va Rhambe Leswaku Va Tlhela Va Ta: Ematikweni lama nga ehansi ka rhavi ra Afrika Dzonga, lembe na lembe ku va ni vanhu vo tlula 100 000 eXitsundzuxweni lava nga riki vahuweleri va mahungu lamanene. Leswi ku ta ka vona ku kombisaka ku tsakela ko karhi loku va nga na kona, xana hina hi fanele hi endla yini leswaku hi pfuna vanhu vo tano lava nga ni “mboyamelo lowunene eka vutomi lebyi nga heriki” leswaku va va “vapfumeri”? (Mint. 13:48) Va khutaze leswaku va tlhela va sungula ku ta eminhlanganweni ya vandlha hi xihatla lexikulu.
3 Ha yini u nga rhambi munhu la tsakelaka leswaku a ta eDyondzweni ya Buku ya Vandlha a ta titwela loko ku hlamuseriwa vuprofeta bya Esaya? Loko munhu wa kona ku ri xaka ra wena kumbe u n’wi tolovelerile n’wi rhambe loko u ri ni xiavelo xo nyikela nkulumo eka Xikolo xa Vutirheli bya le Tilweni leswaku a ta yingisela. N’wi hlamusele tinhloko-mhaka ta tinkulumo ta le rivaleni leti nga ta nyikeriwa eka mavhiki lama landzelaka. (Ku fanele ku veheriwa xiyimiso lexi faneleke xa tinkulumo ebodweni ra switiviso.) Lavisisa tindlela to pfuna munhu loyi leswaku a navela ku gandzela Yehovha. Naswona loko a nga ri na munhu loyi a n’wi dyondzelaka Bibele evandlheni, wena u nga tinyikela ku dyondza na yena.
4 Hambeta U Khutaza Lava Holeke: Van’wana eka lava vaka kona eXitsundzuxweni ana se va tinyiketerile eka Yehovha. Kambe, hi ku famba ka nkarhi va tshike ku chumayela mahungu lamanene hi ku chivirika. Hambiswiritano, Pawulo u hi khutaza ku ‘endlela hinkwavo leswi nga swinene, ngopfu-ngopfu lava nga swin’we na hina eripfumelweni.’ (Gal. 6:10) Hikwalaho, hi fanele hi khathala ngopfu hi lava holeke.
5 Kumbexana van’wana va amukele xikhutazo lexi humaka eka vakulu ni van’wana xo tlhelela ensin’wini. Loko vakulu va ku avela ku tirha ni muhuweleri la pfuxeleriweke, tsundzuka leswaku rirhandzu leri u nga na rona eka Yehovha ni le ntirhweni wa nsimu ri ta tiyisa muhuweleri yoloye nhlana. N’wi kombise ndlela leyi wena u chumayelaka ha yona eka swiyimo swo hambana-hambana leswaku a tsakela ntirho wo chumayela, a phikelela eka wona kutani a kuma mikateko ya Yehovha.
6 Pfuna Vahuweleri Lavantshwa Leswaku Va Va Ni Masungulo Lamanene: Loko wansati loyi a sungulaka ku hlanganyela a xiya leswaku u kume nhlengeletano ya ntiyiso ya Xikwembu, u lave ku chumayela ta ha suka. Endzhaku ka loko a twisise leswi languteriweke eka yena, u te: “Ndzi lava ku hisekela ntirho lowu to ho suka.” Loko loyi u dyondzaka na yena Bibele a fanelekela ku sungula ku chumayela ensin’wini, n’wi pfune a vona xilaveko xa “ku hisekela ntirho lowu” to ho suka. N’wi pfune leswaku a tolovela ku lunghiselela ntirho wa nsimu ni ku hlanganyela eka wona vhiki ni vhiki.
7 Loko ku ri n’wana wa wena loyi a veke muhuweleri lontshwa la nga khuvuriwangiki, tirha swin’we na yena, u n’wi pfuna ku endla nhluvuko hi ku ya hi malembe ni vuswikoti bya yena. Loko u n’wi pfuna hi ndlela yo karhi, a nga ku hlamarisa hi ndlela leyi a nghenisaka van’wana ha yona ebulwini, kun’we ni ndlela leyi a yi tirhisaka ha yona Bibele ni ku fambisa tibuku ensin’wini. Loko a kote ku vulavula kahle ensin’wini, n’wi dyondzise ku endla maendzo yo vuyela ni ku pfuna vanhu lava kombiseke ku tsakela.
8 Ndlandlamuxa Vutirheli Bya Wena: Xana swiyimo swa wena swa ku pfumelela leswaku u hlanganyela hilaha ku engetelekeke entirhweni wo vula evhangeli ni loko Xitsundzuxo xi hundzile? Xana u nga engetela awara yin’we kumbe timbirhi vhiki rin’wana ni rin’wana eka nkarhi lowu u toloveleke ku wu heta ensin’wini? Xana se u wu funghile eka khalendara ya wena nkarhi lowu u nga ta va phayona ra nkarhinyana ha wona? Kumbe, xana u lulamisa timhaka ta wena leswaku u kota ku nghenela vutirheli bya nkarhi hinkwawo? Hinkwaswo leswi hi nga kotaka ku swi endla ensin’wini swi nga pfuna munhu wo karhi leswaku a amukela ntiyiso! (Mint. 8:26-39) Loko hi ri karhi hi anakanya hi nkarhi lowu nga emahlweni ka hina, ‘minkarhi hinkwayo a hi lavisiseni leswi nga swinene exikarhi ka hina ni le ka vanhu van’wana hinkwavo.’—1 Tes. 5:15.
[Bokisi leri nga eka tluka 3]
Hambeta U Pfuna:
□✔ Lava veke kona eXitsundzuxweni
□✔ Vahuweleri lava pfuxeleriweke
□✔ Vahuweleri lavantshwa lava nga si khuvuriwangiki