Ku Va Ni Vun’we Lebyi Tsakisaka Na Yehovha Ni N’wana Wa Yena
Xiendlakalo Xa Nkoka Swinene eLembeni Xi Ta Tlangeriwa Hi March 28
1 Hi ku tlangela Xilalelo xa Hosi endzhaku ka ku pela ka dyambu hi March 28, 2002, hi kombisa leswaku hi ni vun’we lebyi tsakisaka na Yehovha Xikwembu swin’we na Yesu Kreste. Eka xiendlakalo xexo xo hlawuleka swinene, masalela ya Vakreste lava totiweke ma ta tsakela ku “hlangana” loku hlawulekeke, loku wona ni vadyandzhaka van’wana va Mfumo, ma nga na kona na Tatana ni N’wana wa yena. (1 Yoh. 1:3; Efe. 1:11, 12) Vanhu va timiliyoni lava nga va “tinyimpfu tin’wana” va ta anakanyisisa hi lunghelo ro hlamarisa ra ku va ni vun’we na Yehovha ni N’wana wa yena, va hetisisa ntirho wa Xikwembu hi mbilu ni mianakanyo yin’we!—Yoh. 10:16.
2 Ku Tirha Swin’we eVuxakeni Lebyikulu: Yehovha na Yesu va tshama va ri ni vun’we lebyi tsakisaka. Se ku hundze nkarhi lowu nga pimekiki munhu a nga si vumbiwa, va ri ni vunakulobye lebyikulu. (Mik. 5:2) Xisweswo va hlakulele xinakulobye lexikulu xa rirhandzu. Tanihi vutlhari lebyi munhuhatiweke, N’wana loyi wa mativula loko a nga si va munhu wa nyama u kote ku vula a ku: “A ndzi ri munhu loyi [Yehovha] a n’wi rhandzaka hilaha ku hlawulekeke siku ni siku, mina ndzi tsakile emahlweni ka yena nkarhi hinkwawo.” (Swiv. 8:30) Ku va N’wana wa Xikwembu a hete malembe ya ntsandza-vahlayi a ri ni xinakulobye xa rirhandzu ni loyi a nga Xihlovo xa rirhandzu, swi ve ni vuyelo lebyinene eka yena!—1 Yoh. 4:8.
3 Leswi Yehovha a a swi tiva leswaku vanhu va lava ku kutsuriwa, u hlawule N’wana wa yena la tswariweke a ri yexe, loyi a a rhandza vana va vanhu hi mbilu ya yena hinkwayo, leswaku a va xitlhavelo xa nkutsulo, lexi endlaka leswaku hi va ni ntshembo. (Swiv. 8:31) Tanihi leswi Yehovha ni N’wana wa yena hi vun’we va hetisisaka xikongomelo xin’we, hi tshama hi ri ni vun’we na vona ni ku va ni vun’we eka hina vini hi swiboho leswi tiyeke swa rirhandzu, hi endla ku rhandza ka Xikwembu hi tsakile.
4 Ku Kombisa Ku Tlangela Ka Hina Loku Humaka eMbilwini: Hi ku va kona eXitsundzuxweni ni ku rhiya ndleve hi ndlela leyi xiximaka, hi kombisa leswaku hi ri tlangela hi mbilu hinkwayo rirhandzu ra Yehovha ni xitlhavelo lexi N’wana wa yena a hi endleleke xona. Ku ta kandziyisiwa xikombiso xa rirhandzu xa Yesu, vutshembeki bya yena ku yisa eku feni hi ku humesa nkutsulo ni vuhosi bya yena tanihi Hosi eMfun’weni wa Xikwembu lowu simekiweke etilweni swin’we ni mikateko leyi Mfumo wu nga ta yi tisela vanhu. Nakambe hi ta tsundzuxiwa hi xilaveko xa ku hambeta hi kombisa ripfumelo ra hina, hi hisekela ku tirha hi ku pfumelelana ni ku rhandza ka Yehovha tanihi “vatirhi-kulobye entiyisweni.”—3 Yoh. 8; Yak. 2:17.
5 Ku Pfuna Van’wana Leswaku Va Hlanganyela Na Hina: Huvo ya vakulu yi fanele ku endla matshalatshala yo hlawuleka ya ku khutaza Timbhoni hinkwato leti holeke ensin’wini ya ka n’wina leswaku ti va kona eXitsundzuxweni xa rifu ra Kreste. (Mat. 18:12, 13) Tsalani mavito ya hinkwavo lava faneleke va endzeriwa leswaku ku nga sali ni un’we nileswaku hinkwavo va rhambiwa hi ku kongoma.
6 Xana va kona van’wana lava u va tivaka lava nga vaka kona eXitsundzuxweni? Teka goza ku sungula leswaku u pfuxa ku tlangela ka vona xiendlakalo lexi. Va rhambe hi musa naswona u va endla va titwa va amukelekile. A hi endleni hinkwaswo leswi nga emandleni ya hina leswaku swichudeni swa hina swa Bibele ni vanhu van’wana lava tsakelaka swin’we ni swirho swa mindyangu ya hina ni van’wana lava hi va toloveleke, hi va rhambela eka xiendlakalo lexi xa nkoka swinene elembeni. Vanhu hinkwavo lava dyondzaka hi “ntikelo lowu tlurisaka wa ku tiva Kreste Yesu,” va nga vuyeriwa hi nkutsulo. (Filp. 3:8) Lava kombisaka ripfumelo exitlhavelweni xa Kreste va nga va ni ntshembo lowu tiyeke wa leswaku va ta kuma vutomi lebyi nga heriki.—Yoh. 3:16.
7 U nga byi languteli ehansi vuyelo lebyi Xitsundzuxo xi nga vaka na byona eka vanhu va timbilu letinene. Emalembeni mambirhi lama hundzeke le xihlaleni xa Papua New Guinea, vanhu lava tsakelaka va 11 va fambe tiawara ta 17 hi byatso lebyitsongo, elwandle leri kariheke leswaku va ta va kona eka xiendlakalo lexi. Hikwalaho ka yini? Va te: “A hi lava ku tlangela Xitsundzuxo xa rifu ra Kreste ni vagandzeri-kulorhi va Yehovha; kutani a swi fanerile ku teka riendzo leri.” Mawaku ku hiseka loku kombisiweke hi vanhu volavo lava tsakelaka ni ku tlangela ka vona ntsako wa ku va ni vun’we na Yehovha, N’wana wa yena ni vamakwavo lava nga Vakreste!
8 Kombela ku dyondza Bibele ni vanhu hinkwavo lava tsakelaka. Va khutaze ku va kona eminhlanganweni ya vandlha minkarhi hinkwayo ni ku byela van’wana mintiyiso leyi va yi dyondzaka. Va pfune va famba “eku vonakaleni” ni ku ‘hanya hi ntiyiso,’ hi ku tirhisa milawu ya Bibele evuton’wini bya vona. (1 Yoh. 1:6, 7) Va pfune va hlakulela vuxaka lebyikulu na Yehovha naswona va hambeta va hluvukisa ku tlangela ka vona lunghelo ra ku endla ku rhandza ka yena hi vun’we.
9 Mawaku lunghelo leri tsakisaka swonghasi ra leswaku hi ntsako hi hlanganyela “hi moya wun’we, [hi] pfunana hi moya-xiviri wun’we ku lwela ripfumelo eka mahungu lamanene”! (Filp. 1:27, 28) A hi byi languteleni hi mahlo-ngati vunakulobye lebyi tsakisaka, lebyi hi nga ta va na byona eXitsundzuxweni hi March 28, hi nkhensa Yehovha na N’wana wa yena hi vuyelela!—Luka 22:19.