Ndlela Leyi Hi Nga Yi Tirhisaka Ha Yona Buku Leyi Nge ‘Rirhandzu Ra Xikwembu’ Ku Fambisa Tidyondzo Ta Bibele
1. Hi xihi xikongomelo xa buku leyi nge ‘Rirhandzu Ra Xikwembu’?
1 A hi nga tikoti hi ku tsaka loko hi kuma buku leyi nge “Tihlayiseni eRirhandzwini Ra Xikwembu” eNtsombanweni wa Muganga lowu nge “Kongomisiwa Hi Moya Wa Xikwembu”! Hilaha ku vuriweke ha kona, buku leyi yi endleriwe ku hi pfuna leswaku hi tiva milawu leyi Yehovha a lavaka leswaku hi hanya ha yona naswona hi yi rhandza, ku nga ri ku hi dyondzisa ntsena tidyondzo ta xisekelo ta Bibele. A hi nge yi fambisi hi yindlu ni yindlu.
2. Xana yi fanele yi tirhisiwa njhani buku leyi naswona eka vamani?
2 Buku leyi yi ta tirhisiwa tanihi buku ya vumbirhi leyi hi nga ta yi dyondza ni swichudeni swa hina swa Bibele endzhaku ka loko hi hete leyi nge Leswi Bibele Yi Swi Dyondzisaka. Tsundzuka leswaku vanhu van’wana va hatla va swi twisisa leswi Bibele yi swi dyondzisaka kasi van’wana va teka nkarhi wo leha. Kutani dyondzo yin’wana ni yin’wana yi fanele yi fambisiwa hi ku pfumelelana ni swiyimo swa xichudeni. Tiyiseka leswaku rungula leri mi ri dyondzaka xi ri twisisa kahle. Buku leyi a yi fanelanga yi tirhisiwa ku sungula tidyondzo ta Bibele ni vanhu lava se va nga dyondza tibuku to tala enkarhini lowu nga hundza kambe va nga tiki eminhlanganweni ya vandlha, naswona va tikombaka va nga swi lavi ku hanya hi ntiyiso lowu va nga wu dyondza eBibeleni.
3. Xana hi fanele hi endla yini loko ku ri leswaku sweswi hi fambisa dyondzo ya Bibele hi buku leyi nge Gandzela Xikwembu?
3 Loko ku ri leswaku sweswi u fambisa dyondzo ya Bibele hi buku leyi nge Gandzela Xikwembu naswona se mi le kusuhi ni ku yi heta, u nga ha vona swi fanerile leswaku mi namba mi yi hetisa kutani u khutaza xichudeni xa wena leswaku xi ti hlayela buku leyi nge ‘Rirhandzu Ra Xikwembu.’ Loko u nga lavi ku yi hetisa, swi ta va swinene ku cincela ebukwini leyi nge ‘Rirhandzu Ra Xikwembu’ kutani mi yi sungula eku sunguleni. Hilaha swi nga ha kona ebukwini leyi nge Leswi Bibele Yi Swi Dyondzisaka, swi le ka wena leswaku mi nga dyondza tinhloko-mhaka leti nga eka xiengetelo kumbe mi nga ti dyondzi.
4. Hi fanele hi endla yini loko xichudeni lexi hi dyondzaka na xona xo khuvuriwa xi nga si heta buku leyi nge Leswi Bibele Yi Swi Dyondzisaka ni leyi nge ‘Rirhandzu Ra Xikwembu’?
4 Loko xichudeni xo khuvuriwa xi nga si heta tibuku leti timbirhi, dyondzo yi fanele yi ya emahlweni ku kondza xi heta buku leyi nge ‘Rirhandzu Ra Xikwembu.’ Hambileswi xichudeni xexo xi nga ta va se xi khuvuriwile, loyi a fambisaka dyondzo u ta ya emahlweni a vika nkarhi, riendzo ro vuyela ni dyondzo. Muhuweleri loyi a nga ta famba na yena, na yena a nga tsala nkarhi wolowo, ntsena loko a hoxe xandla edyondzweni.
5. Xana buku leyi nge ‘Rirhandzu Ra Xikwembu,’ yi ta va pfuna njhani vahuweleri lava nga tshika ntirho wo chumayela?
5 Loko xirho xa Komiti ya Ntirho ya Vandlha xo ku kombela leswaku u fambisa dyondzo ya Bibele ni munhu loyi a nga tshika ntirho wo chumayela, xi nga ha ku komba tindzima leti u faneleke u ti dyondza ni munhu yoloye ebukwini leyi nge ‘Rirhandzu Ra Xikwembu.’ Dyondzo yo tano a yi fanelanga yi heta nkarhi wo leha swinene. Hakunene buku leyi i lunghiselelo lerinene hikuva yi ta hi pfuna leswaku hi tshama “erirhandzwini ra Xikwembu”!—Yudha 21.