Ntirho Wa Nkoka Swinene
1. Xana ku wu tlangela ka hina ntirho wo chumayela swi ta hi susumetela ku endla yini?
1 Ha yini nkarhi na nkarhi hi khutaziwa ku nyikela hi nkarhi wa hina, matimba ni rifuwo evutirhelini bya hina? Xivangelo hileswi ku nga riki na ntirho lowu nga wa nkoka ku fana na wona! Ku anakanyisisa hi vuyelo lebyi ntirho lowu wu vaka na byona, swi ta hi endla leswaku hi ya hi navela ku hlanganyela hi xitalo entirhweni lowu, lowu nga taka wu nga ha endliwi nakambe.—Mint. 20:24.
2. Xana ku chumayela ka hina swi hoxa xandla hi ndlela yihi eku kwetsimisiweni ka vito ra Xikwembu leri tlakukeke?
2 Wu Kwetsimisa Vito Ra Xikwembu: Ntirho wo chumayela wu kandziyisa leswaku Mfumo wa Yehovha ha Kreste Yesu wu ta susa mimfumo hinkwayo ya vanhu naswona wu ta tlhantlha swiphiqo swa vanhu hinkwavo. (Mat. 6:9, 10) Yehovha wa kwetsimisiwa hikuva hi yena ntsena la nga ta ponisa vanhu eka mavabyi ni rifu. (Esa. 25:8; 33:24) Tanihi leswi hi byarheke vito rakwe, vanhu van’wana lava xiyaka mahanyelo ya hina lamanene ni ndlela leyi hi n’wi rhandzaka ha yona, va nga n’wi kwetsimisa. (1 Pet. 2:12) Hakunene ha eneriseka hi ku twarisa vito ra Yehovha Hosi leyi Lawulaka emisaveni hinkwayo!—Ps. 83:18.
3. Hi yihi mikateko leyi kumiwaka hi lava amukelaka rungula ra Mfumo?
3 Wu Ponisa Vutomi: Yehovha “a nga naveli leswaku ku lova ni un’we kambe u navela leswaku [hinkwavo va] hundzuka.” (2 Pet. 3:9) Xana vanhu va ta ma tivisa ku yini mahanyelo lawa Yehovha a ma amukelaka ni lawa a nga ma amukeriki loko ku nga ri na loyi a va dyondzisaka? (Yon. 4:11; Rhom. 10:13-15) Loko vanhu va amukela mahungu lamanene, mahanyelo ya vona ma cinca hikuva va tshika mikhuva yo biha. (Mik. 4:1-4) Ku tlula kwalaho, va va ni ntshembo wo hanya vutomi lebyi nga heriki. Ku hisekela ka hina ntirho wo chumayela ni ku dyondzisa swa hi ponisa swi tlhela swi ponisa ni lava hi yingisaka. (1 Tim. 4:16) Ha tsaka swinene leswi na hina hi hoxaka xandla entirhweni lowu wa nkoka!
4. Ha yini hi fanele hi katseka hi ku helela entirhweni wo chumayela hi Mfumo ni wo endla vadyondzisiwa?
4 Ku nga ri khale, nhlomulo lowukulu wu ta tisa makumu hi xitshuketa emisaveni leyi yo homboloka. Lava gandzelaka Yehovha va ta ponisiwa. Xisweswo, ntirho wo chumayela ni wo endla vadyondzisiwa i wa xihatla, i wa nkoka naswona hi wona lowu vuyerisaka namuntlha. Kutani a hi rhangiseni wona evuton’wini bya hina!—Mat. 6:33.