Ndlela Yo Letela Vahuweleri Lava Ha Ku Sungulaka Ku Chumayela
1. Xana u titwe njhani loko u ya ensin’wini ro sungula?
1 Xana wa ha ri tsundzuka siku ro sungula leri u nga ya ha rona entirhweni wo chumayela hi yindlu ni yindlu? Swi le rivaleni leswaku a wu khomiwe hi rhumbyana. Loko ku ri leswaku a wu famba ni loyi a a ku dyondzela Bibele kumbe muhuweleri un’wana, a swi kanakanisi leswaku a wu tsakile ku famba na yena leswaku a ta ku pfuna. Leswi sweswi se u nga ni ntokoto, na wena u fanele u letela van’wana.
2. I yini leswi vahuweleri lavantshwa va faneleke va swi dyondza?
2 Vahuweleri lavantshwa va fanele va dyondza ndlela yo sungula mabulo ni n’wini wa muti, ku tirhisa Bibele, ku endla maendzo yo vuyela swin’we ni ku sungula tidyondzo ta Bibele ni ku ti fambisa. Va fanele va tlhela va dyondza ni tindlela tin’wana to chumayela, to tanihi ku chumayela exitarateni ni le tindhawini ta mabindzu. U nga va pfuna leswaku va antswisa eswiyin’weni sweswo hi ku va vekela xikombiso lexinene ni hi ku va nyika swiringanyeto.
3. Xikombiso xa hina lexinene xi nga va pfuna njhani vahuweleri lava ha ku sungulaka ku chumayela?
3 Va Vekele Xikombiso Lexinene: Yesu u kombe vadyondzisiwa vakwe ndlela yo chumayela. (Luka 8:1; 1 Pet. 2:21) Loko u hlela ku tirha ni muhuweleri la ha ku sungulaka ku chumayela, lunghiselela xingheniso xo olova lexi nga ta n’wi olovela ku xi tirhisa, kumbexana u nga ha tirhisa leswi nga eminkandziyisweni ya hina. Chumayela eka yindlu yo sungula ni ya vumbirhi leswaku a ta twa leswi u swi vulaka. Loko mi huma, u nga ha n’wi vutisa leswaku u xi twe njhani xingheniso xa wena. Leswi swi ta n’wi pfuna leswaku a vona nkoka wo tirha ni vahuweleri van’wana ensin’wini naswona swi ta n’wi olovela ku amukela swiringanyeto leswi u nga ta n’wi nyika swona endzhaku ka loko a endle xingheniso xakwe.
4. Xana hi nga n’wi pfuna njhani muhuweleri la ha ku sungulaka ku chumayela endzhaku ko yingisela xingheniso xakwe?
4 Nyikela Swiringanyeto: Yesu u tlhele a byela vadyondzisiwa vakwe leswi va faneleke va swi endla loko va chumayela. (Mat. 10:5-14) Na wena u nga pfuna muhuweleri la ha ku sungulaka ku chumayela hi ndlela leyi fanaka. Loko a vulavula, rhiya ndleve. Loko mi huma emutini, n’wi bumabumele swi suka embilwini hambiloko u xiye leswaku xingheniso xakwe xi fanele xi antswisiwa. Loko u nga si n’wi pfuna, kumbexana u nga ha yimela ku rhanga u vona loko a ta antswisa eka yindlu leyi landzelaka, hikuva swi nga ha endleka leswaku u endle xihoxo hikwalaho ko chuha. Tsundzuka leswaku vahuweleri va ni vuswikoti lebyi nga faniki, naswona ku ni tindlela to tala to endla swilo.—1 Kor. 12:4-7.
5. I yini leswi hi nga swi vulaka loko hi teka goza ro pfuna muhuweleri la ha ku sungulaka ku chumayela?
5 Minkarhi yin’wana muhuweleri la ha ku sungulaka ku chumayela a nga ha ku kombela leswaku u vula swo karhi hi xingheniso xakwe. Kambe loko a nga ku kombeli, teka goza. Xana leswi hi nga swi endla njhani hi ndlela ya vutlhari? Vahuweleri van’wana lava nga ni ntokoto va vutisa va ku, “Xana ndzi nga vula swo karhi hi xingheniso xa wena?” kumbe “U ehleketa leswaku a xi ri njhani xingheniso xa wena?” Kumbexana u nga ha ku, “Loko na mina ndza ha ku sungula ku chumayela, a swi ndzi tikela ku . . . , kambe lexi nga ndzi pfuna i. . . . ” Minkarhi yin’wana swa pfuna leswaku havumbirhi bya n’wina mi kambisisa buku leyi nge Ku Hlamulana. Leswaku u nga n’wi heti matimba, n’wi byele nchumu wun’we lowu a faneleke a antswisa eka wona.
6. Xana “nsimbi yi lotiwa hi nsimbi” hi ndlela yihi loko ku tiwa etimhakeni ta nsimu?
6 Nsimbi Yi Lotiwa Hi Nsimbi: Timotiya, muhuweleri la nga ni ntokoto u khutaziwe hi Pawulo leswaku a tinyiketela eku dyondziseni leswaku ku ya emahlweni kakwe ku vonaka eka vanhu hinkwavo. (1 Tim. 4:13, 15) Swi nga ha endleka leswaku se i malembe u sungule ku chumayela, kambe a wu fanelanga u tshika ku antswisa vuswikoti bya wena. Dyondza eka vahuweleri lava u fambaka na vona, ku katsa ni lava nga riki na ntokoto ensin’wini, naswona u tiyimisela ku pfuna van’wana hi musa, ngopfu-ngopfu lava ha ku sungulaka ku chumayela, leswaku va va vachumayeri va mahungu lamanene lava nga ni vuswikoti.—Swiv. 27:17.