Xana U Tshame U Sungula Dyondzo Ya Bibele Eka Riendzo Ro Sungula?

Minkarhi yin’wana loko hi kombela ku fambisela vini va miti dyondzo ya Bibele, va vula leswaku a va swi tsakeli kumbe va vula leswaku Bibele va yi dyondza ekerekeni. Leswi va nga swi tiviki leswaku hi dyondza Bibele hi ndlela leyi hambaneke ni mintlawa leyin’wana ya vukhongeri, a va swi xiyi leswaku leswi a swi ta va vuyerisa swinene. Kutani ematshan’weni yo kombela ku va fambisela yona, ha yini u nga teki timinete ti nga ri tingani u va komba ndlela leyi dyondzo ya Bibele yi fambisiwaka ha yona eka riendzo ro sungula? Hi xikombiso: U nga byeli vanhu leswaku wa swi kota ku sweka swakudya swo nandziha, kambe u va byela leswaku u ta va tela na swona siku rin’wana; namba u va nyika va ti ringetela! Hi leyi ndlela yin’wana leyi u nga swi endlaka ha yona sweswo hi ku tirhisa swiringanyeto leswi nga eka Vutirheli Bya Hina Bya Mfumo bya March 2006, tluka 5:

“Xana u ehleketa leswaku marito lawa ma ta kala ma hetiseka? [Hlaya Esaya 33:24, kutani u yimela nhlamulo.] Ndzi kombela ku ku komba swin’wana leswi tsakisaka hi mhaka leyi.” Nyika n’wini wa muti buku leyi nge Leswi Bibele Yi Swi Dyondzisaka, kutani u n’wi komba ndzimana 22 eka tluka 36. N’wi hlayele xivutiso xa ndzimana yoleyo kutani u n’wi kombela leswaku a lava nhlamulo ya xona endzhaku ka loko u hlaye ndzimana yoleyo. Tlhela u vutisa xivutiso kutani u rhiya ndleve loko a hlamula. Hlayani matsalwa man’wana lama kombisiweke. N’wi vutise xivutiso lexi u nga ta xi hlamula eka riendzo leri landzelaka kutani u endla malunghiselelo yo tlhela u vuya. Hi ndlela yoleyo, u ta va se u sungule dyondzo ya Bibele!