“Xana Ndzi Fanele Ndzi Vika Nkarhi Wo Tanihi Kwihi?”

Xana u tshame u tivutisa xivutiso xexo? Swiletelo leswi tolovelekeke swi kumeka ebukwini leyi nge Ku Hleleriwa eka matluka 86-87. Nkongomiso lowu engetelekeke wu nyikeriwa nkarhi na nkarhi ku fana ni le ka Bokisi ra Swivutiso ra Vutirheli Bya Hina Bya Mfumo bya September 2008. Tanihi leswi swiyimo swi hambanaka, a hi nyikiwanga muhwenga wa milawu. Kutani, a swi nge vi swinene loko vakulu kumbe van’wana va nyikela minkongomiso leyi engetelekeke.

Loko ku tlakuka xivutiso naswona ku nga ri na nkongomiso lowu tsariweke malunghana na xona, muhuweleri un’wana ni un’wana a nga ha kambisisa leswi: Xana nkarhi lowu ndzi wu hete ndzi ri ensin’wini? Kumbe ndzi wu hete ndzi ri karhi ndzi endla swin’wana leswi entiyisweni swi nga fambisaniki na yona? Leswi hi swi tsalaka eka xiviko xa hina xa nh’weti na nh’weti swi fanele swi hi tsakisa ku nga ri ku hi siya hi kingindziwa hi ripfalo. (Mint. 23:1) I ntiyiso leswaku nchumu wa nkoka swinene eka hina a hi ku vika nkarhi, kambe i ku tirhisa nkarhi wa hina hi ndlela leyinene hi hiseka evutirhelini.—Hev. 6:11.