Pfuna N’wini Wa Muti Leswaku A Anakanyisisa

1. Hi xihi xingheniso lexi tirhaka kahle ensin’wini?

¹ Hi xihi xingheniso lexi tirhaka kahle ensin’wini—xana i ku kaneta tidyondzo leti n’wini wa muti a pfumelaka eka tona kumbe i ku n’wi pfuna leswaku a anakanyisisa ni ku twisisa mhaka leyi mi kanerisanaka ha yona? Loko muapostola Pawulo a vulavula ni Vayuda eTesalonika u kanerisane na vona, “hikwalaho van’wana va vona va ve vapfumeri.” (Mint. 17:2-4) I yini leswi katsekaka loko u kanerisana ni vanhu van’wana?

2. Xana hi nga xi tekelela njhani xikombiso xa Pawulo loko hi chumayela mahungu lamanene?

² Xiya Ndlela Leyi Va Titwaka Ha Yona Ni Ndhavuko Wa Vona: Leswaku u pfuna vanhu va le nsin’wini ya ka n’wina leswaku va anakanyisisa, u fanele u xiya ndlela leyi va titwaka ha yona. Pawulo u sungule nkulumo yakwe leyi a yi nyikeleke Magriki lawa a ma nga ri vapfumeri eAreyopago hi ku boxa swilo leswi a ma swi tiva ni ku swi amukela. (Mint. 17:22-31) Hikokwalaho, loko u lunghiselela xingheniso xa wena, xiya vukhongeri lebyi tolovelekeke eka vanhu va le nsin’wini ya ka n’wina ni swilo leswi va swi rhandzaka ni leswi va nga swi rhandziki. (1 Kor. 9:19-22) Loko n’wini wa muti a ku kaneta, ringeta ku kuma leswi mi twananaka ha swona kutani mi bula ha swona.

3. Xana hi nga kanerisana njhani ni van’wana hi ndlela leyi humelelaka hi ku tirhisa swivutiso hi vutshila?

³ Tirhisa Swivutiso Hi Vutshila: A hi nge nyiki mufambi minkongomiso yo n’wi pfuna ku fika laha a yaka kona handle ka loko hi tiva ndhawu leyi a nga eka yona sweswi. Hilaha ku fanaka, a hi nge pfuni n’wini wa muti leswaku a vuyeriwa handle ka loko hi tiva vonelo leri a nga na rona sweswi. Emahlweni ko va a kanerisana ni muyingiseri, Yesu a tala ku vutisa swivutiso leswaku a twa vonelo ra munhu yoloye. Hi xikombiso, loko munhu un’wana a vutise Yesu a ku, “Xana ndzi nga endla yini leswaku ndzi kuma ndzhaka ya vutomi lebyi nga heriki?,” Yesu u lave ku twa langutelo ra wanuna yoloye emahlweni ko va a n’wi hlamula. (Luka 10:25-28) Siku rin’wana, loko Petro a nyikele nhlamulo leyi hoxeke, Yesu u tirhise swivutiso hi vutshila ku lulamisa vonelo rakwe. (Mat. 17:24-26) Hikokwalaho, loko n’wini wa muti a vutisa xivutiso kumbe a vula mavonelo yakwe lama hoxeke, hi nga tirhisa swivutiso leswaku hi n’wi pfuna ku anakanyisisa hi mhaka yoleyo.

4. Ha yini hi fanele hi ringeta ku pfuna n’wini wa muti leswaku a anakanyisisa?

⁴ Loko hi pfuna n’wini wa muti ku anakanyisisa, hi tekelela Mudyondzisi Lonkulu, ku nga Yesu, ni vavuri van’wana va evhangeli va lembe-xidzana ro sungula. Hi kombisa n’wini wa muti xichavo. (1 Pet. 3:15) Hikwalaho ka sweswo, a nga hi pfumelela leswaku hi tlhela hi n’wi endzela.