Xana U Byi Lunghekerile Vutshunguri Bya Xihatla?

Vutshunguri bya xihatla byi nga laveka hi xitshuketa. (Yak. 4:14) Hikokwalaho, munhu wo tlhariha u ta tilunghiselela hilaha a nga kotaka hakona. (Swiv. 22:3) Xana se u xi endlile xiboho xa matshungulelo lawa u ma lavaka ni maendlelo lawa u nga ta ma amukela naswona se u swi tsarile ehansi? Leswaku u endla xiboho lexinene, ku humesiwe DVD leyi nga ni nhloko-mhaka leyi nge Transfusion-Alternative Health Care—Meeting Patient Needs and Rights ni leyi nge Transfusion-Alternatives—Documentary Series. Loko u ri karhi u yi hlalela vona loko u ta swi kota ku hlamula swivutiso leswi landzelaka. Tanihi leswi DVD leyi yi pfaka yi kombisa ndlela leyi vuhandzuri byi endliwaka ha yona, vatswari va fanele va va ni vuxiyaxiya loko va yi hlalela ni vana.

(1) Ha yini madokodela man’wana ma tlhela ma kambisisa mhaka ya ku pompela vanhu ngati? (2) Nyika swikombiso swinharhu swa vuhandzuri lebyi rharhanganeke lebyi endliwaka handle ko pomperiwa ngati. (3) Ha yini madokodela ni vahandzuri va magidi emisaveni hinkwayo va tiyimiserile ku tshungula vavabyi handle ko va pompela ngati? (4) Xana nkambisiso wa sweswinyana lowu endliweke eswibedlhele wu kombisa yini malunghana ni mhaka ya ku tirhisa ngati? (5) Hi wahi makhombo lama fambisanaka ni ku pomperiwa ngati? (6) Xana vativi vo tala va ri yini malunghana ni vuyelo bya ku tirhisa matshungulelo man’wana handle ka ngati? (7) I yini leswi endlaka munhu a kayivela ngati naswona ku nga endliwa yini leswaku yi engeteleka? (8) Xana tisele to tshwuka ti nga engeteriwa njhani emirini wa muvabyi? (9) Hi tihi tindlela leti tirhisiwaka leswaku ku hungutiwa ku lahlekeriwa hi ngati hi nkarhi wa vuhandzuri? (10) Xana matshungulelo man’wana handle ka ngati ma nga tirhisiwa eka vana ni le ka vanhu lava langutaneke ni swiyimo leswi xungetaka vutomi? (11) Hi wihi nchumu wa nkoka lowu nga enawini, lowu faneleke wu tsundzukiwa loko ku tiwa emhakeni yo tshungula muvabyi?

Swiviko swi kombisa leswaku vahuweleri vo hlayanyana a va si ri tata khadi ra vona ra Advance Medical Directive kumbe a va tshami va ri na rona nkarhi na nkarhi. Varhangeri va mintlawa va fanele va tiyiseka leswaku hinkwavo emintlaweni ya vona va fambisana ni xilaveko lexi xa nkoka. Hambileswi ku amukela byin’wana bya vutshunguri lebyi kombisiweke eka DVD ku nga mhaka ya ripfalo, u nga rindzi kukondza u langutana ni xiyimo xa xihatla ku ri kona u nga ta ehleketa hi vutshunguri lebyi u nga ta byi amukela kumbe lebyi u nga ta ka u nga byi amukeli. Ndzima 7 ya buku leyi nge ‘Rirhandzu Ra Xikwembu’ ni tinhlamuselo leti tshahiweke ku katsa ni xiengetelo lexi nga eka Vutirheli Bya Hina Bya Mfumo bya November 2006 swi ta ku pfuna leswaku u endla xiboho lexi sekeriweke eka leswi u swi dyondzeke. Kutani loko u khuvuriwile, tsala leswi u swi hlawulaka ekhadini ra DPA naswona u famba na rona nkarhi na nkarhi.

[Marito lama tshahiweke exihlokweni lama nga eka tluka 3]

Xana se u xi endlile xiboho xa matshungulelo lawa u ma lavaka ni maendlelo lawa u nga ta ma amukela naswona se u swi tsarile ehansi?