Chumayela eTindhawini Ta Mabindzu Hi Xivindzi
1. Ha yini hi nga fanelanga hi hela matimba loko hi vona onge ku chumayela etindhawini ta mabindzu swa chavisa?
1 Xana swa ku chavisa ku chumayela etindhawini ta mabindzu? Loko swi ri tano, u nga heli matimba, hikuva hambi ku ri Pawulo loyi a a ri ni vurhena naswona a a nga chavi ku chumayela, u boheke ku ‘kuma vurhena’ leswaku a ta chumayela. (1 Tes. 2:2) Laha hansi hi ta bula hi mintlhontlho leyi tolovelekeke swin’we ni swiringanyeto leswi twisisekaka swo hlula mintlhontlho yoleyo.
2. Ha yini hi nga fanelanga hi chava ku nyangatsa vatirhi?
2 Xana Ku Kavanyeta Vatirhi Swi Nga Va Phirha? Etindhawini to tala ta mabindzu, vatirhi va pfuna munhu un’wana ni un’wana la nghenaka exitolo naswona va swi languterile ku kavanyetiwa. Tanihi leswi va nga ta ku teka tanihi muxavi wa nkoka, va nga va ni malwandla eka wena. Leswi na wena u nga ta va u ambale hi ndlela leyi xiximekaka u tlhela u va ni rirhandzu ni xinghana, sweswo swi ta endla leswaku va ku xixima.
3. Hi nga swi papalata njhani ku phirha vaxavi?
3 Xana Ndzi Fanele Ndzi Bula Ni Mutirhi Emahlweni Ka Vaxavi? Loko swi koteka, hlawula nkarhi lowu vatirhi va nga khomekangiki ngopfu, wo tanihi lowu va sungulaka ha wona ku tirha. Rindza ku kondza mininjhere a va yexe leswaku u ta burisana na yena. U nga lehisi.
4. Hi nga ku yini loko hi chumayela etindhawini ta mabindzu?
4 Xana Ndzi Fanele Ndzi Ku Yini? Loko ku ri ni vatirhi vo tala, vulavula ni mininjhere. U nga ha ku: “A swi olovi ku kuma vanhu lava tirhaka emakaya, hi yo mhaka hi mi endzeleke laha ntirhweni. Ndza swi tiva leswaku u le ntirhweni, hikwalaho ndzi ta komisa.” Leswaku hi papalata ku pfilunganya vaxavisi, swi nga va swinene leswaku hi nga vulavuli hi minyikelo, handle ka loko hi vutisiwile leswaku ntirho wa hina wu seketeriwa njhani hi tlhelo ra timali. Hi ku ya hi muxaka wa bindzu ra kona, u nga ha kombela mpfumelelo eka mininjhere leswaku u vulavula ni vatirhi swa xinkarhana. Phindha leswi u swi vuleke eka mininjhere. Loko swi tikomba onge mutirhi u khomekile, komisa kutani u n’wi siyela xiphephana. Loko swi nga koteki ku bula ni vatirhi, kumbexana u nga ha pfumeleriwa ku siya minkandziyiso yo karhi ekamareni leri vatirhi va wiselaka eka rona kumbe endhawini yin’wana laha va nga ta yi kuma kona.
5. Hi swihi swivangelo leswi hi nga na swona swo chumayela hi xivindzi etindhawini ta mabindzu?
5 Yesu na Pawulo a va chumayela vanhu etindhawini ta mabindzu hi xivindzi, na wena u nga endla tano. (Mat. 4:18-21; 9:9; Mint. 17:17) Kombela Yehovha a ku pfuna leswaku u va ni mbilu yo rhula ni vurhena. (Mint. 4:29) Tanihi leswi etindhawini ta mabindzu u nga ta kuma vanhu lava nga kumekiki emakaya, ha yini u nga ringeti endlelo leri ro chumayela?