Hi Nga Yi Tirhisa Njhani Broxara Leyi Nge, I Vamani Lava Endlaka Ku Rhandza Ka Yehovha Namuntlha?
Broxara Leyintshwa Leyi Endleriweke Ku Kongomisa Swichudeni Swa Bibele eNhlengeletanweni
1. Hi swihi swikongomelo swinharhu swa broxara leyi nge, Ku Rhandza Ka Yehovha?
1 Xana se u sungurile ku tirhisa broxara leyintshwa leyi nge, I Vamani Lava Endlaka Ku Rhandza Ka Yehovha Namuntlha? Xikongomelo xa yona i (1) ku endla leswaku swichudeni swa Bibele swi tolovelana na hina Timbhoni ta Yehovha, (2) ku swi pfuna leswaku swi dyondza hi mintirho ya hina ni (3) ku swi komba ndlela leyi nhlengeletano ya hina yi tirhaka ha yona. Broxara leyi nge, Ku Rhandza Ka Yehovha yi ni tidyondzo leti nga tluleliki eka tluka rin’wana, leswi endlaka swi olova ku yi dyondza hi timinete ta ntlhanu ku ya eka ta khume emakumu ka dyondzo yin’wana ni yin’wana.
2. Hlamusela leswaku broxara leyi yi endliwe njhani ni leswaku i yini swin’wana leswi kumekaka eka yona.
2 Ndlela Leyi Yi Endliweke Ha Yona: Broxara leyi yi avanyisiwe hi swiyenge swinharhu, xin’wana ni xin’wana xi hlamusela mintirho yo hambana-hambana ya nhlengeletano ya Yehovha hilaha swi hlamuseriweke hakona laha henhla. Tinhloko-mhaka ta tidyondzo hinkwato ta 28 i swivutiso, naswona swihlokwana leswi tsariweke hi marito yo dzwihala swi hlamula swivutiso swa kona. Yi ni swifaniso leswi tekiweke ematikweni yo tlula 50 leswi kombisaka leswaku ntirho wa hina wu endliwa emisaveni hinkwayo. Tidyondzo to tala ti ni mabokisi lama nge, “Kuma Leswi Engetelekeke” lama nga ni swiringanyeto leswi u nga khutazaka xichudeni xa wena leswaku xi swi landzela.
3. Hi nga yi tirhisa njhani broxara leyi nge, Ku Rhandza Ka Yehovha?
3 Ndlela Leyi U Nga Yi Tirhisaka Ha Yona: Rhanga hi ku n’wi komba xivutiso lexi nga nhloko-mhaka ya dyondzo. Kutani, loko mi ri karhi mi hlaya dyondzo ya kona swin’we, kandziyisa swihlokwana leswi tsariweke hi marito yo dzwihala. Eku heteleleni, hlayani swivutiso swa mpfuxeto emakumu ka tluka. Mi nga hlaya dyondzo hinkwayo kumbe mi hlaya swiyenge swo hambana-hambana swa dyondzo yoleyo mi tlhela mi bula ha swona. Tirhisa vutlhari ku vona leswaku hi wahi matsalwa lama kombisiweke lawa mi nga ma hlayaka. Mi nga rivali ku bula hi swifaniso ni hi bokisi leri nge, “Kuma Leswi Engetelekeke.” Hakanyingi, i swinene leswaku tidyondzo ti dyondziwa hi ku landzelelana ka tona. Kambe, titwe u ntshunxekile ku ya eka dyondzo leyi swi lavaka mi bula ha yona hi nkarhi wolowo. Hi xikombiso, loko ku ta va ni nhlengeletano kumbe ntsombano, mi nga ha tlula mi ya bula hi dyondzo 11.
4. Ha yini u tsakile hi ku va ni xitirhisiwa lexi lexintshwa?
4 Loko hi dyondza Bibele ni munhu wo karhi, hi n’wi pfuna leswaku a tolovelana ni Tata wa hina wa le tilweni. Kambe hi fanele hi tlhela hi n’wi dyondzisa hi nhlengeletano ya Yehovha. (Swiv. 6:20) Hi tsake swinene leswi hi nga ni xitirhisiwa lexi lexintshwa lexi endlaka swi hi olovela ku endla tano!