Va Amukeleni!
1. Hi xihi xiendlakalo lexi hi nyikaka nkarhi lowunene ngopfu wo nyikela vumbhoni naswona ha yini?
1 A ku na xiendlakalo xin’wana lexi hi nyikaka nkarhi lowunene wo nyikela vumbhoni ku fana ni Xitsundzuxo xa lembe ni lembe. Anakanya: Lembe leri ku languteriwe vaendzi lava tlulaka timiliyoni ta khume leswaku va va kona eXitsundzuxweni, va tlhela va twa hi swiendlo swimbirhi leswikulu swa rirhandzu leswi nkutsulo wu endleke leswaku swi koteka. (Yoh. 3:16; 15:13) Va ta dyondza hi mikateko leyi va nga yi kumaka hikwalaho ka nyiko ya Yehovha. (Esa. 65:21-23) Kambe, a hi xivulavuri ntsena lexi nga ta nyikela vumbhoni eka xiendlakalo lexi. Hinkwavo lava nga ta va kona va ta va ni lunghelo ro nyikela vumbhoni bya matimba hi ku amukela vaendzi hi rirhandzu.—Rhom. 15:7.
2. Hi nga va amukela njhani vaendzi hi malwandla?
2 Ematshan’weni yo tshama ehansi u rindzela leswaku xiyimiso xi sungula, ha yini u nga kombisi malwandla hi ku titivisa eka vaendzi? Vaendzi va nga ha va va chuhile naswona va nga tiyiseki leswaku va ta langutela yini. Ku n’wayitela ka hina ni ku va pfuxela hi ndlela ya xinghana swi ta va endla va ntshunxeka ni ku titwa va amukelekile. Leswaku u kota ku kuma loko munhu wo karhi a tile hileswi a nga lo rhambiwa, u nga ha n’wi vutisa loko a sungula ku va kona eminhlanganweni ya hina kumbe loko a tiva un’wana evandlheni. Kumbexana u nga ha n’wi kombela leswaku a tshama ekusuhi na wena ivi u yimbelela na yena u tlhela u hlaya Bibele na yena. Loko mi tirhisa Holo ya Mfumo, u nga ha n’wi valangisa yona. Endzhaku ka nkulumo, n’wi hlamule swivutiso swa yena. Loko vandlha ra n’wina ri fanele ri huma hi ku hatlisa leswaku vandlha rin’wana ri ta nghena, u nga ha ku: “Ndzi nga tsakela ku tiva leswaku u titwe njhani hi nhlangano lowu. Xana hi nga tlhela hi hlangana njhani?” Kutani endla malunghiselelo ya leswaku mi tlhela mi hlangana siku rin’wana. Vakulu va fanele va xalamukela ku khutaza vahuweleri lava holeke lava a va ri kona.
3. Ha yini swi ri swa nkoka leswaku hi tikarhatela ku amukela vaendzi eXitsundzuxweni?
3 Vaendzi vo tala va ta va vo sungula ku vona ntsako, ku rhula ni vun’we leswi hina vanhu va Yehovha hi nga na swona eparadeyisini ya moya. (Ps. 29:11; Esa. 11:6-9; 65:13, 14) I yini leswi vaendzi va nga ta swi tsundzuka endzhaku ko va kona eka xiendlakalo lexi? Swo tala swi titshege hi leswi hi nga ta swi endla leswaku hi va pfuna.