Swingheniso Leswi Hi Nga Swi Tirhisaka

Ku Sungula Tidyondzo Ta Bibele Hi Mugqivela Wo Sungula Wa April

“Hi khutaza vaakelani va hina leswaku va hlaya Tibibele ta vona. Kambe vanhu vo tala va vona onge swa tika ku twisisa Bibele. Xana na wena u anakanya tano? [Yimela nhlamulo.] Xiya leswi magazini lowu wu swi vulaka.” N’wi kombe xifunengeto xa le ndzhaku xa Xihondzo xo Rindza xa April 1, kutani mi bula hi rungula leri nga ehansi ka xivutiso xo sungula mi tlhela mi hlaya ni tsalwa rin’we eka lawa ma kombisiweke. N’wi nyike magazini kutani u endla malunghiselelo yo tlhela u vuya leswaku u ta hlamula xivutiso lexi landzelaka.

Xihondzo xo Rindza April 1

“Munhu un’wana ni un’wana loyi hi vulavulaka na yena u ni swiphiqo. Leswi swi endla leswaku vanhu van’wana va tivutisa hi xikongomelo xa vutomi. Xana u vona onge hi xihi xihinga lexikulu lexi endlaka hi nga vi na ntsako namuntlha? [Yimela nhlamulo.] Bibele yi tshembisa leswaku ku nga ri khale Xikwembu xi ta herisa swiphiqo leswi hi langutanaka na swona sweswi. [Hlaya Nhlavutelo 21:4.] Magazini lowu wu hlamusela swilo leswi hi swi languteleke enkarhini lowu taka ni leswaku hi nga xi kuma njhani xikongomelo xa vutomi sweswi.”

Xalamuka! April

“Madzolonga ya le mindyangwini i xiphiqo lexi nga kona emisaveni hinkwayo. Van’wana va vula leswaku leswi swi vangelaka sweswo i ndhavuko wa munhu, ndlela leyi a kurisiweke ha yona ni vuhungasi lebyi nga ni madzolonga. Wena u anakanya leswaku i yini lexi vangelaka leswaku ku va ni madzolonga ekaya? [Yimela nhlamulo.] Bibele yi kombisa leswaku i vuxaka byihi lebyinene lebyi wanuna ni wansati va faneleke va va na byona. [Hlaya Vaefesa 5:33.] Magazini lowu wu hlamusela leswaku vukati byin’wana byi ponisiwe njhani hi ku tirhisa milawu ya le Bibeleni.”