Hi November Ku Ta Fambisiwa Kingdom News No. 38!
1. Hi swihi swivutiso leswi vanhu va nga na swona malunghana ni vafi, naswona swivutiso sweswo swi ta hlamuriwa njhani hi November?
1 Rifu i nala wa vanhu hinkwavo, ku nga khathariseki vupfumeri bya vona. (1 Kor. 15:26) Vo tala va tivutisa leswaku vafi va kwihi nileswaku va nga tlhela va va vona. Hikokwalaho, mavandlha emisaveni hinkwayo ma ta hlanganyela eka tsima leri nga ta teka n’hweti ra ku fambisa Kingdom News No. 38, leyi nga ni xihloko lexi nge, “Xana Vafi Va Ta Tlhela Va Hanya Hakunene?” Tsima leri ro hlawuleka ri ta sungula hi November 1. Endzhaku ka tsima ro hlawuleka, Kingdom News No. 38 yi ta fambisiwa ku fana ni swiphephana swin’wana ensin’wini.
2. Xana Kingdom News No. 38 yi endliwe njhani?
2 Ndlela Leyi Yi Endliweke Ha Yona: Kingdom News No. 38 yi endliwe hi ndlela ya leswaku yi kota ku petseka leswaku emahlweni ka yona ku vonaka xihloko lexi kokaka mahlo swin’we ni marito lama nge, “Xana u nga vula u ku . . . ina? nikatsongo? kumbexana?” Loko muhlayi a pfula Kingdom News, u ta vona leswi Bibele yi swi vulaka leswaku hlamulaka xivutiso xa xihloko ni leswi xitshembiso xa Bibele xi nga vulaka swona eka yena. U ta tlhela a vona swivangelo swa leswaku ha yini a fanele a tshemba Bibele. Endzhaku ka Kingdom News ku na xivutiso lexi nga ta n’wi koka rinoko leswaku a ehleketa hi xona ni ku n’wi rhamba leswaku a dyondza leswi engetelekeke.
3. Xana Kingdom News No. 38 yi ta fambisiwa njhani?
3 Ndlela Leyi Yi Nga Ta Fambisiwa Ha Yona: Tsima leri ri ta fana ni matsima yo fambisa swirhambo swa Xitsundzuxo ni swa mintsombano ya muganga. Vakulu va ta nyikela nkongomiso wa ndlela leyi nsimu ya vandlha yi nga ta hlanganisiwa ha yona, hi ku ya hi papila leri va ri kumeke ra April 1, 2013. Mavandlha lama nga ni nsimu leyitsongo ma nga ha pfuna mavandlha ya le kusuhi lama nga ni nsimu leyikulu. Loko u teka swiphephana swa wena swa Kingdom News No. 38, tsundzuka ku teka ntsena leswi u nga ta kota ku swi fambisa hi vhiki. Hi nkarhi wa tsima, swiphephana swi nga ha fambisiwa etindhawini ta mani na mani endzhaku ka loko nsimu hinkwayo yi tirhiwile. Loko tikopi hinkwato to hela ku nga si hela n’hweti, ku nga ha fambisiwa minkandziyiso yin’wana. Hi Mugqivela wo sungula wa n’hweti, hi ta dzika ngopfu eka tsima leri ro hlawuleka ematshan’weni yo sungula tidyondzo ta Bibele. Hi mahelo-vhiki, hi nga ha fambisa timagazini loko swi fanerile. Xana u endla malunghiselelo leswaku u ta hlanganyela hi xitalo eka tsima leri ro hlawuleka?