Ti Tirhise Kahle Timagazini Ta Khale

Leswi timagazini ta khale ti nga pfuniki munhu loko ti vekiwile kumbe loko ti cukumetiwa, hi fanele hi ringeta ku ti fambisela vanhu. Magazini wun’we wu nga endla leswaku munhu a tsakela ntiyiso wu tlhela wu n’wi susumetela ku sungula ku vitana vito ra Yehovha. (Rhom. 10:13, 14) Hi leswi swiringanyeto swin’wana swo ti tirhisa kahle timagazini ta khale.

• Loko u chumayela ensin’wini leyi nga tirhiwiki nkarhi na nkarhi, kumbexana u nga ha siya magazini wun’we endhawini leyi vanhu van’wana va nga taka va nga wu voni emitini leyi ku nga riki na vanhu.

• Loko u chumayela etindhawini leti vanhu va rindzeke eka tona, to tanihi le switichini swa mabazi kumbe swa switimela, vutisa vanhu lava nga kwalaho loko va tsakela magazini wo hlaya kutani u va komba timagazini to hambana-hambana ta khale ivi u va pfumelela va hlawula lowu va wu tsakelaka.

• Loko u endzela tindhawu to hlantswa swiambalo laha ku hakeriwaka, makaya ya vadyuhari, titliliniki kumbe tindhawu to fana ni teto leti nga le nsin’wini ya vandlha ra n’wina, siya timagazini ti nga ri tingani ta khale laha vanhu va rindzaka kona. Hakanyingi i swinene ku rhanga hi kuma mpfumelelo eka munhu loyi a langutelaka ndhawu yoleyo loko a ri kona. Loko u vona ku ri ni timagazini endhawini yoleyo, u nga siyi tin’wana.

• Loko u lunghiselela ku endla maendzo yo vuyela, rhanga hi ku kambisisa leswi munhu ha un’we eka lava u nga ta va endzela a swi tsakelaka. Xana u ni ndyangu? Xana wa swi tsakela ku teka maendzo? Xana u tsakela ku tirha entangeni? Kambisisa eka timagazini ta khale ku vona loko ku ri ni xihloko lexi a nga ha tsakelaka ku xi hlaya kutani u n’wi komba xona loko u tlhelela.

• Loko u tlhela u kuma munhu la tsakelaka endzhaku ko n’wi endzela minkarhi yo hlaya u nga n’wi kumi, n’wi kombe timagazini tin’wana ta khale leti a nga ti kumangiki.