Swikombo Swa Mikandziyiso Leyi Nga Eka Xiyimiso Xa Mihlangano Xa Mahanyelo Ni Ntirho Wa Hina Wo Chumayela
DECEMBER 7-13
LESWI HI SWI DYONDZAKA EBIBELENI | LEVHITIKA 10-11
“Rhandza Yehovha Ku Tlula Maxaka Ya Wena”
(Levhitika 10:1, 2) Endzhaku ka sweswo, Nadabu na Abihu vana va Aroni, va teka swo khoma ndzilo va chela ndzilo eka swona va chela ni murhi wo nun’hwela eka swona. Kutani va sungula ku endla gandzelo leri nga amukelekiki emahlweni ka Yehovha, leri a nga va lerisangiki leswaku va ri endla. 2 Hiloko Yehovha a rhumela ndzilo kutani wu va hisa va fela emahlweni ka Yehovha.
it-1-E 1174
Gandzelo Leri Nga Amukelekiki
Ndzilo Ni Murhi Wo Nun’hwela Lowu Nga Amukelekiki. Eka Levhitika 10:1 rito ra Xiheveru zar ri tirhisiwe ku vula “ndzilo lowu nga amukelekiki, lowu [Xikwembu] xi nga va lerisangiki ku wu endla” ku nga ndzilo lowu vana va Aroni Nadabu na Abihu va wu nyikeleke eka Yehovha naswona leswi swi endle leswaku a va hisa hi ndzilo va fa. (Lv 10:2; Tin 3:4; 26:61) Endzhaku ka sweswo, Yehovha u byele Aroni a ku: “Wena ni vana va wena mi nga nwi vhinyo kumbe swakunwa leswi pyopyaka loko mi ta etendeni ra nhlengeletano, leswaku mi nga fi. I nawu wa hilaha ku nga heriki eka vatukulu va n’wina. Leswi swi ta endla leswaku ku va ni ku hambana exikarhi ka nchumu wo kwetsima ni lowu nyameke ni le xikarhi ka nchumu lowu nga basangiki ni lowu baseke ni ku dyondzisa Vaisrayele swileriso hinkwaswo leswi Yehovha a va byeleke swona hi ku tirhisa Muxe.” (Lv 10:8-11) Leswi swi nga ha va swi kombisa leswaku Nadabu na Abihu a va dakwile, kumbexana hi swona leswi va nyikeke xivindzi xo endla ndzilo lowu a va nga lerisiwanga leswaku va wu endla. Ndzilo wolowo a wu nga amukeleki kumbexana hikwalaho ka nkarhi lowu endliweke ha wona, ndhawu leyi wu endliweke eka yona kumbe hi leswi ku nga landzeleriwangiki milawu yo nyikela magandzelo kumbexana a va swi landzelanga swipimelo swo endla murhi wo nun’hwela leswi boxiweke eka Eksoda 30:34, 35. Ku dakwa ka vona a ku xi vevukisanga xidyoho lexi va xi endleke.
(Levhitika 10:4, 5) Hiloko Muxe a vitana Mixayele na Elizafani vana va Uziyele, makwavo wa tata wa Aroni a ku eka vona: “Tanani mi ta tlakula vamakwenu mi va susa emahlweni ka ndhawu yo kwetsima mi va yisa ehandle ka nxaxa.” 5 Kutani va ta ivi va tlakula vavanuna volavo lava a va ha ambale swiambalo swa vona swo leha va va yisa ehandle ka nxaxa, hilaha Muxe a va byeleke hakona.
(Levhitika 10:6, 7) Hiloko Muxe a byela Aroni ni vana vakwe lavan’wana, ku nga Eliyazara na Ithamara a ku: “Mi nga tshiki misisi ya tinhloko ta n’wina mi nga vi na mhaka na yona kumbe mi handzula swiambalo swa n’wina, leswaku mi nga fi nileswaku Xikwembu xi nga hlundzukeli ntshungu hinkwawo. Vamakwenu va yindlu hinkwayo ya Israyele va ta rilela lava Yehovha a va dlayeke hi ndzilo. 7 A mi fanelanga mi huma enyangweni ya tende ra nhlengeletano hikuva mi ta fa leswi mafurha yo kwetsima ya Yehovha ma nga le henhla ka n’wina.” Kutani va endla hilaha Muxe a va byeleke hakona.
Xana U Nghenile Eku Wiseni Ka Xikwembu?
Aroni, makwavo wa Muxe, a a ri exiyin’weni xo tika hikwalaho ka vana vakwe van’wana vambirhi. Ehleketa ndlela leyi a titweke ha yona loko vana vakwe, Nadabu na Abihu, va endle gandzelo leri a ri nga amukeleki kutani Yehovha a va dlaya. Kutani a a nga ha ta swi kota ku vulavula na vona. Kambe ku endleke swin’wana. Yehovha u lerise Aroni ni vana vakwe lavan’wana vo tshembeka a ku: “Mi nga tshuki mi tshika tinhloko ta n’wina ti nga lunghisiwanga naswona mi nga tshuki mi handzula tinguvu ta n’wina [hikwalaho ka gome], leswaku mi nga fi nileswaku [Yehovha] a nga hlundzukeli ntshungu hinkwawo.” (Lev. 10:1-6) Dyondzo leyi hi yi kumaka laha yi le rivaleni. Ndlela leyi hi rhandzaka Yehovha ha yona yi fanele yi va yikulu swinene ku tlula ndlela leyi hi rhandzaka swirho swa mindyangu ya hina leswi nga tshembekiki eka Yehovha.
Endla Ndzavisiso
(Levhitika 10:8-11) Kutani Yehovha a byela Aroni a ku: 9 “Wena ni vana va wena mi nga nwi vhinyo kumbe swakunwa leswi pyopyaka loko mi ta etendeni ra nhlengeletano, leswaku mi nga fi. I nawu wa hilaha ku nga heriki eka vatukulu va n’wina. 10 Leswi swi ta endla leswaku ku va ni ku hambana exikarhi ka nchumu wo kwetsima ni lowu nyameke ni le xikarhi ka nchumu lowu nga basangiki ni lowu baseke 11 ni ku dyondzisa Vaisrayele swileriso hinkwaswo leswi Yehovha a va byeleke swona hi ku tirhisa Muxe.”
Hi Fanele Hi Kwetsima Eku Tikhomeni Ka Hina Hinkwako
Leswaku hi va lava kwetsimaka, hi fanele hi swi kambisisa hi vukheta leswi Matsalwa ma swi vulaka kutani hi endla leswi Xikwembu xi swi languteleke eka hina. Anakanya hi Nadabu na Abihu vana va Aroni, lava dlayiweke hikwalaho ko humesa gandzelo “hi ndzilo lowu nga riki enawini,” kumbexana va ri karhi va dakwile. (Lev. 10:1, 2) Xiya leswi Xikwembu xi swi byeleke Aroni endzhaku ka sweswo. (Hlaya Levhitika 10:8-11.) Xana tindzimana toleto ti vula leswaku a hi fanelanga hi nwa swakunwa leswi nga ni xihoko loko hi nga si ya eminhlanganweni ya Vukreste? Anakanya hi tinhla leti: A hi le hansi ka Nawu. (Rhom. 10:4) Ematikweni man’wana, vapfumeri-kulorhi va nwa swakunwa leswi nga ni xihoko hi ndlela leyi ringaniseriweke loko va ri karhi va dya loko va nga si ya eminhlanganweni. Hi nkarhi wa Paseka ku tirhisiwe swinwelo swa mune swa vhinyo. Loko Yesu a simeka Xitsundzuxo, u nyike vaapostola va yena vhinyo leswaku va nwa, leyi a yi fanekisela ngati ya yena. (Mat. 26:27) Bibele yi sola ku nwa ku tlula mpimo ni ku dakwa. (1 Kor. 6:10; 1 Tim. 3:8) Naswona Vakreste vo tala mapfalo ya vona ma ta va susumetela ku papalata swakunwa swa xihoko hi ku helela loko va nga si endla ntirho wun’wana ni wun’wana wo kwetsima. Hambiswiritano, swiyimo swa hambana hi ku ya hi matiko, naswona xilo xa nkoka hi leswaku Vakreste va ‘hambanisa exikarhi ka nchumu wo kwetsima ni nchumu lowu nyameke,’ leswaku va ta tshama va ri karhi va kwetsima naswona va tsakisa Xikwembu.
(Levhitika 11:8) A mi fanelanga mi dya nyama ya swona kumbe mi khumba mitsumbu ya swona. A swi tenganga eka n’wina.
it-1-E 111 ¶5
Swiharhi
Swipimelo leswi a swi tirha ntsena eka vanhu lava a va ri ehansi ka Nawu wa Muxe hikuva Levhitika 11:8 yi ri: “A swi tenganga eka n’wina,” ku nga eka Vaisrayele. Loko Nawu wa Muxe wu siviwe hi gandzelo ra Yesu Kreste, sweswo a swi vula leswaku se vanhu va nga dya nyama ya xiharhi xin’wana ni xin’wana hi ku landza xileriso lexi Nowa a byeriweke xona endzhaku ka Ndhambhi.—Kl 2:13-17; Gn 9:3, 4.
Ku Hlayiwa Ka Bibele
(Levhitika 10:1-15) Endzhaku ka sweswo, Nadabu na Abihu vana va Aroni, va teka swo khoma ndzilo va chela ndzilo eka swona va chela ni murhi wo nun’hwela eka swona. Kutani va sungula ku endla gandzelo leri nga amukelekiki emahlweni ka Yehovha, leri a nga va lerisangiki leswaku va ri endla. 2 Hiloko Yehovha a rhumela ndzilo kutani wu va hisa va fela emahlweni ka Yehovha. 3 Kutani Muxe a byela Aroni a ku: “Yehovha u te, ‘Lava nga ekusuhi na mina va fanele va tsundzuka leswaku ndza kwetsima naswona ndzi ta vangamisiwa emahlweni ka vanhu hinkwavo.’” Aroni a miyela. 4 Hiloko Muxe a vitana Mixayele na Elizafani vana va Uziyele, makwavo wa tata wa Aroni a ku eka vona: “Tanani mi ta tlakula vamakwenu mi va susa emahlweni ka ndhawu yo kwetsima mi va yisa ehandle ka nxaxa.” 5 Kutani va ta ivi va tlakula vavanuna volavo lava a va ha ambale swiambalo swa vona swo leha va va yisa ehandle ka nxaxa, hilaha Muxe a va byeleke hakona. 6 Hiloko Muxe a byela Aroni ni vana vakwe lavan’wana, ku nga Eliyazara na Ithamara a ku: “Mi nga tshiki misisi ya tinhloko ta n’wina mi nga vi na mhaka na yona kumbe mi handzula swiambalo swa n’wina, leswaku mi nga fi nileswaku Xikwembu xi nga hlundzukeli ntshungu hinkwawo. Vamakwenu va yindlu hinkwayo ya Israyele va ta rilela lava Yehovha a va dlayeke hi ndzilo. 7 A mi fanelanga mi huma enyangweni ya tende ra nhlengeletano hikuva mi ta fa leswi mafurha yo kwetsima ya Yehovha ma nga le henhla ka n’wina.” Kutani va endla hilaha Muxe a va byeleke hakona. 8 Kutani Yehovha a byela Aroni a ku: 9 “Wena ni vana va wena mi nga nwi vhinyo kumbe swakunwa leswi pyopyaka loko mi ta etendeni ra nhlengeletano, leswaku mi nga fi. I nawu wa hilaha ku nga heriki eka vatukulu va n’wina. 10 Leswi swi ta endla leswaku ku va ni ku hambana exikarhi ka nchumu wo kwetsima ni lowu nyameke ni le xikarhi ka nchumu lowu nga basangiki ni lowu baseke 11 ni ku dyondzisa Vaisrayele swileriso hinkwaswo leswi Yehovha a va byeleke swona hi ku tirhisa Muxe.” 12 Hiloko Muxe a vulavula na Aroni swin’we ni vana vakwe lava saleke, ku nga Eliyazara na Ithamara a ku: “Tekani gandzelo ra mavele leri siyiweke eka magandzelo ya Yehovha lama endliweke hi ndzilo, mi ri dya tanihi xinkwa lexi nga riki na comela ekusuhi ni altari hikuva i nchumu wo kwetsima ngopfu. 13 Mi fanele mi ri dyela endhawini yo kwetsima hikuva i xiavelo xa wena ni vana va wena lexi humaka eka magandzelo ya Yehovha lama endliweke hi ndzilo, hikuva ndzi lerisiwe tano. 14 Nakambe mi ta dya xifuva xa gandzelo leri ndziwitiwaka ni nenge wa gandzelo ro kwetsima endhawini leyi baseke, n’wina ni vana va n’wina va majaha ni va vanhwanyana hikuva swilo leswi mi nyikiwe swona leswaku swi va xiavelo xa n’wina ni xa vana va n’wina, xi huma eka magandzelo yo kombela ku rhula ya Vaisrayele. 15 Va ta tisa nenge wa gandzelo ro kwetsima ni xifuva xa gandzelo leri ndziwitiwaka swin’we ni magandzelo ya mafurha lama endliweke hi ndzilo, leswaku ku ta ndziwitiwa gandzelo leri ndziwitiwaka emahlweni ka Yehovha; kutani ri ta va xiavelo xa wena ni vana va wena hilaha ku nga heriki hilaha Yehovha a leriseke hakona.”
DECEMBER 14-20
LESWI HI SWI DYONDZAKA EBIBELENI | LEVHITIKA 12-13
“Leswi Hi Swi Dyondzaka Eka Milawu Ya Nhlokonho”
(Levhitika 13:4, 5) Kambe loko mafelangati lama nga enhlongeni yakwe ma ri yo basa naswona ma languteka ma nga nghenanga enhlongeni ni misisi yi nga hundzukanga yo basa, muprista u ta n’wi tshamisa a ri yexe munhu la vabyaka ku ringana masiku ya nkombo. 5 Muprista u ta n’wi kambela hi siku ra vunkombo, kutani loko vuvabyi byi tikomba byi yimile byi nga hangalakanga ni miri, muprista u ta n’wi tshamisa a ri yexe masiku man’wana ya nkombo.
Xana Yi Hundzeriwe Hi Nkarhi Kumbe Ya Ha Pfuna Ninamuntlha?
• Ku hambanisa vanhu lava vabyaka ni van’wana.
Eka Nawu lowu a wu nyikiwe Muxe, a swi nga pfumeleriwi leswaku vanhu lava nga ni nhlokonho va tshama ni vanhu van’wana. Kambe ku sukela loko ku ve ni mintungu emalembeni ya va 500-1500 C.E, madokodela ma dyondze ku tirhisa nawu lowu, lowu wa ha tirhaka ni namuntlha.—Levhitika tindzima 13 na 14.
(Levhitika 13:45, 46) Swiambalo swa munhu la nga ni vuvabyi bya nhlokonho swi fanele swi handzuriwa, nhloko yakwe yi fanele yi nga kamiwi naswona u fanele a funengeta malepfu yakwe ya le henhla ka nomu kutani a huwelela a ku, ‘A ndzi tenganga, a ndzi tenganga!’ 46 Loko a ha ri ni vuvabyi lebyi u ta va a nga tenganga. Leswi a nga tengangiki, u fanele a tshama a ri yexe. U ta tshama ehandle ka nxaxa.
Xana A Wu Swi Tiva?
Vayuda va khale a va chava vuvabyi bya nhlokonho lebyi a byi tolovelekile eminkarhini ya Bibele. Vuvabyi byebyo byo chavisa a byi hlasela misiha ya munhu byi n’wi siya a lamarile. Vuvabyi lebyi a byi nga tshunguleki. Hikwalaho ka sweswo, lava nga ni nhlokonho a va hambanisiwa ni vanhu van’wana naswona a va boheka ku lemukisa van’wana hi ta vuvabyi bya vona.—Levhitika 13:45, 46.
(Levhitika 13:52) U fanele a hisa xiambalo kumbe harani leyi nga eka voya kumbe lapi kumbe xilo xin’wana ni xin’wana xa dzovo lexi vuvabyi byi kumekeke eka xona, hikuva i nhlokonho leyi dlayaka. Xi fanele xi hisiwa hi ndzilo.
(Levhitika 13:57) Hambiswiritano, loko bya ha humelela eka xiphemu xin’wana xa xiambalo kumbe eka harani kumbe eka xilo xin’wana ni xin’wana xa dzovo, byi le ku hangalakeni kutani u fanele u xi hisa hi ndzilo xilo xin’wana ni xin’wana lexi tluleriweke hi vuvabyi.
it-2-E 238 ¶3
Nhlokonho
Eka mpahla kumbe endlwini. Vuvabyi bya nhlokonho a byi kota ku tlulela ni le ka voya, lapi kumbe dzovo. Swipatsu swa vuvabyi lebyi a swi suka loko xiambalo xi hlantswiwa kumbe xi vekiwa endhawini yo karhi ku ringana masiku ya nkombo. Kambe loko ku kumeka leswaku xipatsu xa rihlaza ra xitshopana kumbe xo tshwuka xa ha ri kona a swi vula leswaku i nhlokonho leyi dlayaka naswona nchumu wolowo a wu fanele wu hisiwa. (Lv 13:47-59) Loko xipatsu xa rihlaza ra xitshopana kumbe xo tshwuka xi ri kona na le khumbini ra yindlu, muprista a a ta pfala yindlu yoleyo leswaku yi nga tirhisiwi. A ku fanele ku xokoriwa maribye lama nga ni xipatsu kumbe ku khwayiwa misava leyi ku phamiweke ha yona endzeni, maribye lama xokoriweke ni misava leyi khwayiweke a swi fanele swi ya cukumetiwa ehandle ka muti, endhawini leyi nga basangiki. Loko ko tlhela ku huma xipatsu endlwini yoleyo a swi vula leswaku yindlu yoleyo a yi tenganga naswona a yi fanele yi hirimuxiwa, maribye ya yona, timhandzi ni misava hinkwayo ya yindlu, a swi ta cukumetiwa ehandle ka muti endhawini leyi nga basangiki. Kambe loko yindlu yi nga ha ri na xipatsu xa nhlokonho a yi fanele yi basisiwa. (Lv 14:33-57) Van’wana va ringanyeta leswaku nhlokonho leyi a yi humelela eka swiambalo kumbe emakhumbini a yi vula leswi namuntlha swi vuriwaka mfurhe kumbe ku vhunda, hambiswiritano, leswi a hi tiyiseki ha swona.
Endla Ndzavisiso
(Levhitika 12:2) “Byela Vaisrayele u ku, ‘Loko wansati a tika kutani a veleka n’wana waxinuna, u ta va a nga tenganga ku ringana masiku ya nkombo, tanihi leswi a nga tengangiki loko a ri enkarhini.
(Levhitika 12:5) “‘Loko o veleka n’wana wa nhwanyana, u ta va a nga tenganga ku ringana masiku ya 14, ku fana ni loko a ri enkarhini. U ta ya emahlweni a tibasisa ku ringana masiku ya 66 hikwalaho ka ngati leyi humeke.
Tinhla-nkulu Ta Buku Ya Levhitika
12:2, 5—Ha yini ku tswala n’wana a ku endla wansati a va “la nga tengangiki”? Swirho swa mbeleko a swi endleriwe ku humesa vutomi bya munhu la hetisekeke. Hambiswiritano, hikwalaho ka xidyoho lexi hi xi kumeke tanihi ndzhaka, n’wana u velekiwa a nga hetisekanga naswona a ri ni xidyoho. Nkarhi lowu wo koma wa ‘ku nga tengi’ lowu a wu fambisana ni ku tswala n’wana, swin’we ni timhaka tin’wana, to tanihi ku ya enkarhini ni ku humesa mbewu, a wu endla va tsundzuka vudyoho lebyi va byi kumeke tanihi ndzhaka. (Levhitika 15:16-24; Pisalema 51:5; Varhoma 5:12) Milawu ya ku tibasisa loku a ku fanele ku endliwa a yi ta pfuna Vaisrayele leswaku va vona xilaveko xa gandzelo ra nkutsulo, leri a ri ta herisa vudyoho bya vanhu, ri vuyisela vanhu eku hetisekeni. Hikwalaho Nawu wu ve “mukongomisi wa [vona] la yisaka eka Kreste.”—Vagalatiya 3:24.
(Levhitika 12:3) Hi siku ra vunhungu n’wana u ta yimbisiwa.
Xana Yi Hundzeriwe Hi Nkarhi Kumbe Ya Ha Pfuna Ninamuntlha?
• Nkarhi lowu faneleke wa ku yimba.
Nawu wa Xikwembu wu vule leswaku n’wana wa mufana a a fanele a yimbisiwa loko a ri ni masiku ya nhungu. (Levhitika 12:3) Eka vana lava ha ku velekiwaka, ngati yi kota ku mpfempfa kahle endzhaku ka masiku ya nkombo va velekiwile. Eminkarhini ya Bibele ku nga si va ni matshungulelo ya manguva lawa, a ku ri vutlhari ku yimbisa n’wana endzhaku ka masiku ya nkombo.
Ku Hlayiwa Ka Bibele
(Levhitika 13:9-28) “Loko munhu o va ni vuvabyi bya nhlokonho, u fanele a yisiwa eka muprista, 10 kutani muprista u ta n’wi kambela. Loko ku ri ni swirhumbana swo basa emirini naswona swi hundzule misisi yi va yo basa naswona swirhumbana swi boxekile, 11 i nhlokonho leyi nga ta tshama nkarhi wo leha enhlongeni yakwe naswona muprista u ta n’wi vula loyi a nga tengangiki. A nga fanelanga a n’wi tshamisa a ri yexe leswaku a ta kamberiwa hikuva a nga tenganga. 12 Loko nhlokonho yo hangalaka ni nhlonge hinkwayo ya munhu yoloye kutani yi n’wi funengeta ku suka enhlokweni ku ya emilengeni laha muprista a nga kotaka ku vona kona 13 naswona loko muprista a n’wi kamberile kutani a kuma leswaku nhlokonho yi funengete nhlonge yakwe hinkwayo, u ta vula leswaku munhu yoloye u tengile. Nhlonge yakwe hinkwayo yi hundzuke yo basa, u tengile. 14 Kambe loko yo tshuka yi huma swirhumbana leswi boxekeke, u ta va a nga tenganga. 15 Loko muprista a vona swirhumbana leswi boxekeke, u ta n’wi vula loyi a nga tengangiki. Swirhumbana leswi boxekeke a swi tenganga. I nhlokonho. 16 Kambe loko swirhumbana leswi boxekeke swo tlhela swi va swo basa, u ta ya eka muprista. 17 Muprista u ta n’wi kambela naswona loko swirhumbana swi hundzuke swo basa, muprista u ta vula leswaku munhu yoloye u tengile. U ta va a tengile. 18 “Loko munhu o huma rhumba enhlongeni yakwe kutani ri hola, 19 kambe laha a ku ri ni rhumba ku huma swirhumbana swo basa kumbe mafelangati, u fanele a ya eka muprista. 20 Muprista u ta ma kambela, kutani loko ma vonaka ma nghene enhlongeni naswona misisi ya kona yi hundzuke yo basa, muprista u ta n’wi vula la nga tengangiki. I vuvabyi bya nhlokonho lebyi humeke eka rhumba. 21 Kambe loko muprista a ma kambela kutani a kuma leswaku a ku na misisi yo basa eka wona naswona a ma nghenanga enhlongeni, ma vonaka ma nyamalarile, muprista u ta n’wi tshamisa a ri yexe ku ringana masiku ya nkombo. 22 Loko ma hangalake ni nhlonge, muprista u ta n’wi vula la nga tengangiki. I vuvabyi. 23 Kambe loko mafelangati ma nga hangalakanga ni miri, i vuvabyi lebyi humaka eka rhumba naswona muprista u ta n’wi vula la tengeke. 24 “Kumbe loko munhu o tshwa hi ndzilo kutani xivati xa laha a tshweke kona xi huma mafelangati kumbe xi va xo basa, 25 muprista u ta xi kambela. Loko misisi leyi nga eka mafelangati yi hundzuke yo basa naswona xi vonaka xi nghene enhlongeni, i nhlokonho leyi humaka exivatini kutani muprista u ta n’wi vula la nga tengangiki. I vuvabyi bya nhlokonho. 26 Kambe loko muprista a xi kambela kutani a kuma leswaku a ku na misisi yo basa eka mafelangati naswona a xi nghenanga enhlongeni, mafelangati ma nyamalarile, muprista u ta n’wi tshamisa a ri yexe masiku ya nkombo. 27 Muprista u ta n’wi kambela hi siku ra vunkombo naswona loko mafelangati ma hangalake ni nhlonge, muprista u ta n’wi vula la nga tengangiki. I vuvabyi bya nhlokonho. 28 Kambe loko mafelangati ma nga hangalakanga ni miri ma tlhela ma nyamalala, ku ri xivati lexi nga lo pfimba, muprista u ta n’wi vula la tengeke hikuva i xivati lexi pfimbisiweke hi ku tshwa.
DECEMBER 21-27
LESWI HI SWI DYONDZAKA EBIBELENI | LEVHITIKA 14-15
“Vugandzeri Bya Ntiyiso Byi Lava Leswaku Hi Va Lava Baseke”
(Levhitika 15:13-15) “‘Loko thyaka ri yima, u ta hlayela masiku ya nkombo naswona u fanele a hlantswa swiambalo swakwe, a hlamba hi mati lama khulukaka, kutani u ta va a tengile. 14 Hi siku ra vunhungu u fanele a teka magugurhwana mambirhi kumbe swituvana swimbirhi, a ta emahlweni ka Yehovha enyangweni ya tende ra nhlengeletano, kutani a swi nyika muprista. 15 Muprista u ta swi nyikela, xin’wana xi va gandzelo ra xidyoho kasi lexin’wana xi va gandzelo ro hisiwa, naswona muprista u ta n’wi kombelela ku rivaleriwa emahlweni ka Yehovha mayelana ni thyaka leri humeke eka yena.
it-1-E 263
Ku Tibasisa
Vaisrayele a va fanele va tibasisa hikwalaho ka swivangelo swo hambanahambana. Munhu wun’wana ni un’wana loyi a a ri na nhlokonho kumbe loyi a khumbeke xilo xin’wana ni xin’wana xa munhu loyi a “humaka thyaka,” wanuna loyi a humeseke mbewu ya vununa, wansati loyi a yaka enkarhini kumbe a huma ngati nkarhi wo leha, un’wana ni un’wana loyi a endleke swa masangu a a nga “tenganga” naswona a a fanele a hlamba. (Lv 14:8, 9; 15:4-27) Loyi a tshameke etendeni ni ntsumbu wa munhu kumbe loyi a wu khumbeke a a nga “tenganga” naswona a a fanele a basisiwa hi mati yo tengisa. Un’wana ni un’wana loyi a a nga wu yingisi nawu wolowo, a “ fanele a dlayiwa, hikuva u nyamise ndhawu ya Yehovha yo kwetsima.” (Tin 19:20) Hikwalaho ku hlamba swi tirhisiwa hi ndlela yo fanekisela ku kombisa leswaku munhu u ni vuxaka lebyinene na Yehovha. (Ps 26:6; 73:13; Esa 1:16; Ezk 16:9) Ku tibasisa hi ku tirhisa rito ra Yehovha leri fanisiwaka ni mati swi endla munhu a va la tengeke.—Ef 5:26.
(Levhitika 15:28-30) “‘Hambiswiritano, loko ngati leyi a yi huma eka yena yi yimile, u fanele a hlayela masiku ya nkombo kutani endzhaku ka sweswo u ta va a tengile. 29 Hi siku ra vunhungu u fanele a teka magugurhwana mambirhi kumbe swituvana swimbirhi, u ta swi tisa eka muprista enyangweni ya tende ra nhlengeletano. 30 Muprista u ta teka xin’we a endla gandzelo ra xidyoho kutani hi lexin’wana a endla gandzelo ro hisiwa, naswona muprista u ta n’wi kombelela ku rivaleriwa emahlweni ka Yehovha hikwalaho ka ngati leyi nga tengangiki leyi humeke eka yena.
it-2-E 372 ¶2
Ku Ya Enkarhini
Loko wansati a huma ngati nkarhi wo leha a a tekiwa a nga tenganga ku ringana nkarhi wolowo kumbe “a huma ngati nkarhi wo leha ku tlula masiku lawa a yaka wona enkarhini,” enkarhini wolowo xilo xin’wana ni xin’wana lexi a a tshama eka xona kumbe lexi a a xi khumba a xi ta va xi nga tenganga naswona vanhu lava a va khumba swilo sweswo na vona a va nga tenganga. Loko ngati yi yima, a a fanele a hlayela masiku ya nkombo kutani endzhaku ka sweswo u ta va a tengile. Hi siku ra vunhungu a a fanele a teka magugurhwana mambirhi kumbe swituvana swimbirhi, a swi yisa eka muprista loyi a a ta n’wi endlela gandzelo ro kombela ku rivaleriwa, xin’wana xa swivumbiwa leswi a xi nyikeriwa tanihi gandzelo ra xidyoho kasi lexin’wana tanihi gandzelo ro hisiwa eka Yehovha.—Lv 15:19-30.
(Levhitika 15:31) “‘Mi fanele mi pfuna Vaisrayele leswaku va va lava tengeke, leswaku va nga fi hikwalaho ko thyakisa tabernakela ya mina leyi nga exikarhi ka vona.
it-1-E 1133
Ndhawu Yo Kwetsima
2. Tende ra nhlengeletano ni tempele. Xivava xa tabernakela ni swivava swa le tempeleni a ku ri ndhawu yo kwetsima. (Eks 38:24; 2Tk 29:5; Mi 21:28) Exivaveni a ku ri ni alitari yo hisela magandzelo ni xihlambelo xa koporo. Leswi a ku ri swilo swo kwetsima. I vanhu lava tengeke ntsena lava a va ta nghena exivaveni xa tabernakela nkarhi wun’wana ni wun’wana; hilaha ku fanaka, eswivaveni swa tempele a ku nghena ntsena vanhu lava tengeke. Hi xikombiso, wansati loyi a nga tengangiki a a nga fanelanga a khumba nchumu wun’wana ni wun’wana wo kwetsima kumbe ku nghena endhawini yo kwetsima. (Lv 12:2-4) Vaisrayele a va nga fanelanga va tshama va nga basanga hikuva sweswo a swi fana ni loko va thyakisa tabernakela. (Lv 15:31) Lava nyikelaka gandzelo ro tibasisa nhlokonho a va fanele va yima ni gandzelo ra vona enyangweni wa xivava. (Lv 14:11) Munhu la nga tengangiki a a nga fanelanga a dya nyama ya gandzelo ro kombela ku rhula etabernakeleni kumbe etempeleni leswaku a nga dlayiwi.—Lv 7:20, 21.
Endla Ndzavisiso
(Levhitika 14:14) “Kutani muprista u ta teka ngati yin’wana ya xifuwo xa gandzelo ra nandzu a yi tota emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene.
(Levhitika 14:17) Kutani muprista u ta teka mafurha man’wana lama saleke exandleni xakwe a ma tota emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene, ehenhla ka ngati ya gandzelo ra nandzu.
(Levhitika 14:25) Endzhaku ka sweswo, muprista u ta tlhava khuna leritsongo ra gandzelo ra nandzu kutani a teka ngati yin’wana ya xifuwo xa gandzelo ra nandzu a yi tota emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene.
(Levhitika 14:28) Kutani muprista u ta tota mafurha man’wana lama nga exandleni xakwe emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene, etindhawini leti a toteke ngati ya gandzelo ra nandzu eka tona.
it-1-E 665 ¶5
Ndleve
Loko ku vekiwa vaprista eIsrayele, Muxe a a lerisiwe leswaku u fanele a teka ngati ya khuna leri nyikeriweke a yi tota emakumu ka ndleve ya xinene ya Aroni ni vana vakwe, ni le vokweni ra xinene ni le nengeni wa xinene, leswi a swi kombisa leswaku leswi a va swi yingisela, ntirho lowu a va wu endla ni ndlela leyi a va famba ha yona a yi kongomisiwa hileswi a swi endleka kwalaho. (Lv 8:22-24) Hilaha ku fanaka loko swi ta emhakeni ya munhu loyi a tibasisaka nhlokonho, Nawu a wu vula leswaku muprista a a fanele a teka ngati ya khuna leri ku endliweke gandzelo ra nandzu ni mafurha lama saleke ya gandzelo leri nyikeriweke a ma tota emakumu ka ndleve ya xinene ya munhu loyi a a ri ni nhlokonho. (Lv 14:14, 17, 25, 28) Rungula rin’wana leri fambisana ni mhaka leyi i ra mpfumelelo lowu a wu nyikiwa munhu loyi a lavaka ku ya emahlweni a va hlonga ra n’wini wakwe vutomi byakwe hinkwabyo. Emhakeni leyi, hlonga a ri fanele ri yimisiwa ri khegetela nyangwa kumbe fureme naswona n’wini wa rona a a ta ri boxa ndleve hi nchumu wo boxa ha wona. Mfungho lowu, lowu a wu endliwa endleveni a wu kombisa leswaku hlonga ri tiyimisele ku ya emahlweni ri yingisa n’wini wa rona.—Eks 21:5, 6.
(Levhitika 14:43-45) “Hambiswiritano, loko ko tlhela ku huma xivati endlwini yoleyo endzhaku ka loko ku xokoriwe maribye naswona yindlu yi khwayiwile yi tlhela yi phamiwa, 44 muprista u ta nghena endzeni ka yona a yi kambela. Loko xivati xi hangalake ni yindlu, i nhlokonho leyi dlayaka. Yindlu a yi tenganga. 45 Kutani u ta lerisa leswaku yindlu yi hirimuxiwa, maribye ya yona, timhandzi ta yona ni misava hinkwayo ya yindlu, swi ta yisiwa ehandle ka muti endhawini leyi nga basangiki.
g 1/06 14, bokisi
Mfurhe—I Munghana Tlhelo I Nala!
XANA BIBELE YA VULAVULA HI MFURHE?
Bibele yi vulavula hi “vuvabyi bya nhlokonho endlwini,” leswi vulaka emuakweni hi woxe. (Levhitika 14:34-48) Ku ringanyetiwe leswaku vuvabyi lebyi, lebyi nakambe a byi vuriwa “nhlokonho leyi dlayaka,” a ku ri mfurhe wo karhi, kambe a hi tiyiseki ha swona. Ku nga khathariseki leswaku a ku ri yini, Nawu wa Xikwembu a wu lerisa vini va tiyindlu ku susa maribye lama nga ni vuvabyi lebyi, va khwaya yindlu hinkwayo endzeni kutani va humesa swilo hinkwaswo leswi swi nga ha endlekaka swi nyamile, va ya swi cukumeta “endhawini leyi nga basangiki.” Loko vuvabyi lebyi byi vuya, yindlu hinkwayo a yi tekiwa yi nga tenganga, a yi hahluriwa, yi ya cukumetiwa. Vuxokoxoko lebyi Yehovha a byi nyikelaka byi kombisa rirhandzu rakwe lerikulu hi vanhu vakwe nileswaku u lava va tshama va hanyile emirini.
Ku Hlayiwa Ka Bibele
(Levhitika 14:1-18) Yehovha a ya emahlweni a vulavula na Muxe a ku: 2 “Lowu wu ta va nawu wa munhu loyi a nga ni nhlokonho hi siku ro tiyisekisa ku tenga kakwe, loko a fanele a tisiwa eka muprista. 3 Muprista u ta ya ehandle ka nxaxa a fika a n’wi kambela. Loko munhu loyi a nga ni nhlokonho a horile eka vuvabyi bya nhlokonho, 4 muprista u ta n’wi lerisa leswaku a tisa swinyenyana swimbirhi leswi hanyaka leswi tengeke, mukedari, lapi ro tshwuka ni hisopa leswaku a ta tengisiwa. 5 Muprista u ta lerisa leswaku xinyenyana xin’we xi dlayeriwa exibyeni xa vumba ematini lama khulukaka. 6 Kambe u fanele a teka xinyenyana lexi hanyaka swin’we ni mukedari, lapi ro tshwuka ni hisopa, a swi peta swin’we engatini ya xinyenyana lexi nga dlayeriwa ematini lama khulukaka. 7 Kutani u ta yi n’wan’wasela ka nkombo eka loyi a tibasisaka nhlokonho naswona u ta n’wi vula loyi a tengeke, kutani u ta tshika xinyenyana lexi hanyaka xi ya enhoveni. 8 “Loyi a tibasisaka u fanele a hlantswa swiambalo swakwe, a byevula misisi yakwe hinkwayo naswona a hlamba ematini kutani u ta va a tengile. Endzhaku ka sweswo a nga nghena enxaxeni, kambe u ta tshama ehandle ka tende rakwe ku ringana masiku ya nkombo. 9 Hi siku ra vunkombo u fanele a byevula misisi hinkwayo leyi nga enhlokweni yakwe, exilepfini xakwe ni tinxiyi takwe. Endzhaku ka loko a byevule misisi yakwe hinkwayo, u ta hlantswa swiambalo swakwe ivi a hlamba hi mati kutani u ta va a tengile. 10 “Hi siku ra vunhungu u ta teka makhuna mambirhi lamatsongo lama hanyeke kahle, xinyimpfana xa ntswele lexi hanyeke kahle lexi nga ni lembe, mapa lama silekeke kahle lama ringanaka tiomere tinharhu lama pfanganisiweke ni mafurha ma va gandzelo ra mavele ni logo yin’we ya mafurha; 11 kutani muprista loyi a vulaka leswaku munhu loyi a tibasisaka u tengile, u ta n’wi yisa swin’we ni magandzelo lawa emahlweni ka Yehovha enyangweni ya tende ra nhlengeletano. 12 Muprista u ta teka khuna rin’we leritsongo a ri humesa ri va gandzelo ra nandzu swin’we ni mpimo wa logo wa mafurha, kutani u ta swi ndziwita swi va gandzelo leri ndziwitiwaka emahlweni ka Yehovha. 13 Kutani u ta tlhava khuna leritsongo laha swifuwo swa gandzelo ra xidyoho ni gandzelo ro hisiwa swi toloveleke ku tlhaveriwa kona, endhawini yo kwetsima, hikuva xifuwo xa gandzelo ra nandzu ku fana ni xa gandzelo ra xidyoho i swa muprista. I nchumu wo kwetsima ngopfu. 14 “Kutani muprista u ta teka ngati yin’wana ya xifuwo xa gandzelo ra nandzu a yi tota emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene. 15 Kutani muprista u ta teka mpimo wun’wana wa logo wa mafurha a ma chela exandleni xakwe xa ximatsi. 16 Muprista u ta peta ritiho rakwe ra xinene emafurheni lama nga exandleni xakwe xa ximatsi kutani a n’wan’wasela mafurha man’wana ka nkombo hi ritiho rakwe emahlweni ka Yehovha. 17 Kutani muprista u ta teka mafurha man’wana lama saleke exandleni xakwe a ma tota emakumu ka ndleve ya xinene ya loyi a tibasisaka ni le khudzwini ra voko rakwe ra xinene ni le khudzwini ra nenge wakwe wa xinene, ehenhla ka ngati ya gandzelo ra nandzu. 18 Muprista u ta teka mafurha lama saleke exandleni xakwe a ma chela enhlokweni ya loyi a tibasisaka, kutani muprista u ta n’wi kombelela ku rivaleriwa emahlweni ka Yehovha.
DECEMBER 28–JANUARY 3
LESWI HI SWI DYONDZAKA EBIBELENI | LEVHITIKA 16-17
“Siku Ro Kombela Ku Rivaleriwa”
(Levhitika 16:12) “Endzhaku ka sweswo u ta teka xo khoma ndzilo lexi teleke hi makala lama pfurhaka lama humaka ealtarini leyi nga emahlweni ka Yehovha ni mpimo wa mavoko mambirhi ya mapa ya murhi wo nun’hwela kutani u ta swi yisa endzeni ka khetheni.
Leswi Hi Swi Dyondzaka eBukwini Ya Levhitika
Hlaya Levhitika 16:12, 13. Hi mahlo ya mianakanyo vona leswi a swi endleka hi Siku ro Kombela ku Rivaleriwa: Muprista lonkulu u nghena etabernakeleni. Sweswi u nghena ro sungula eka mikarhi yi nharhu leyi a nga ta yi tirhisa ku nghena eNdhawini yo Kwetsima Ngopfu hi siku rero. U tamele murhi wa risuna ni xo tamela ndzilo xa nsuku lexi nga ni makala lama pfurhaka ndzilo. U fika a yimanyana emahlweni ka nguvu leyi funengetaka nyangwa lowu nghenaka eNdhawini yo Kwetsima Ngopfu. Kutani hi xichavo, u nghena eNdhawini yo Kwetsima Ngopfu ivi a yima emahlweni ka areka ya ntwanano. Hi ndlela yo fanekisela, u yime emahlweni ka Yehovha Xikwembu! Hi vukheta muprista u chulula murhi wa risuna wo kwetsima ehenhla ka makala lama pfurhaka ndzilo kutani kamara ri sungula ku tala hi nun’hwelo wo nandziha. Endzhaku, u ta tlhela a nghena eNdhawini yo Kwetsima Ngopfu a tamele ngati ya gandzelo ra swidyoho. Xiya leswaku u sungula hi ku hisa murhi wa risuna a nga si endla xitlhavelo hi ngati ya gandzelo ra swidyoho.
(Levhitika 16:13) U ta tlhela a chela murhi wo nun’hwela ehenhla ka ndzilo emahlweni ka Yehovha, kutani papa ra murhi lowu ri ta funengeta xifunengeto xa Areka ya Vumbhoni leswaku a nga fi.
Leswi Hi Swi Dyondzaka eBukwini Ya Levhitika
Hi nga dyondza yini eka ndlela leyi murhi wa risuna a wu tirhisiwa ha yona hi Siku ro Kombela ku Rivaleriwa? Bibele yi vula leswaku swikhongelo swa malandza yo tshembeka ya Yehovha swi fana ni murhi wa risuna. (Ps. 141:2; Nhlav. 5:8) Tsundzuka leswaku loko muprista lonkulu a hisa murhi wa risuna emahlweni ka Yehovha a swi endla hi xichavo. Hilaha ku fanaka, loko hi khongela eka Yehovha, hi fanele hi kombisa xichavo. Ha swi tlangela swinene leswi Muvumbi wa vuako hinkwabyo a hi pfumelelaka hi tshinela eka yena, ku fana ni n’wana ni tata wakwe. (Yak. 4:8) U hi teka tanihi vanghana vakwe! (Ps. 25:14) Lowu i nkateko lowukulu eka hina naswona a hi swi lavi ku n’wi khomisa tingana ni siku ni rin’we.
(Levhitika 16:14, 15) “U ta teka ngati yin’wana ya nkuzi a yi n’wan’wasela hi ritiho emahlweni ka xifunengeto etlhelo ra le vuxeni, naswona u ta n’wan’wasela ngati yin’wana hi ritiho ka nkombo emahlweni ka xifunengeto. 15 “Endzhaku ka sweswo u ta tlhava xiphongo xa gandzelo ra xidyoho leri nga ra vanhu, kutani a yisa ngati ya xona endzeni ka khetheni, a endla hilaha a endleke hakona hi ngati ya nkuzi; u ta yi n’wan’wasela etlhelo ka xifunengeto ni le mahlweni ka xifunengeto.
Leswi Hi Swi Dyondzaka eBukwini Ya Levhitika
Tsundzuka leswaku muprista lonkulu a a fanele a hisa murhi wa risuna loko a nga si endla switlhavelo. Hi ku endla tano, a a lava leswaku Xikwembu xi n’wi amukela loko a endla switlhavelo. Hi nga dyondza yini emhakeni leyi? Loko Yesu a ha ri laha misaveni, a a fanele a endla swilo swin’wana swa nkoka, swilo swa kona a swi ri swa nkoka swinene ku tlula ku nyikela hi vutomi byakwe leswaku ku ponisiwa vanhu. I yini swilo swa kona? A a fanele a tikarhatela ku tshama a tshembekile vutomi byakwe hinkwabyo leswaku Yehovha a ta amukela xitlhavelo xakwe. Hi ku endla tano, Yesu a ta swi veka erivaleni leswaku ku hanya hi ndlela leyi tsakisaka Yehovha, hi yona ntsena ndlela leyi tisaka ntsako. Yesu a ta kombisa leswaku vuhosi bya Tata wakwe byi lulamile swinene.
Endla Ndzavisiso
(Levhitika 16:10) Kambe xiphongo lexi vuhlolotwana byi xi hlawuleke leswaku xi va xa Azazele xi fanele xi tisiwa xa ha hanya xi yimisiwa emahlweni ka Yehovha, leswaku ku ta komberiwa ku rivaleriwa swidyoho ehenhla ka xona, leswaku xi ta tshikiwa xi famba xi ya emananga xi va xa Azazele.
it-1-E 226 ¶3
Azazele
Hilaha muapostola Pawulo a hlamuseleke hakona, ku va Yesu a nyikele hi vutomi byakwe lebyi nga ri ki na xidyoho leswaku byi va gandzelo ra swidyoho swa vanhu, gandzelo rakwe ri ma tlula ekule magandzelo ya “ngati ya tinkuzi ni ya timbuti.” (Hv 10:4, 11, 12) U tirhe tanihi “xikhomela nandzu,” u ‘rhwale switlhavi swa hina,’ u “tlhaviwile hikwalaho ka swidyoho swa hina.” (Esa 53:4, 5; Mt 8:17; 1Pe 2:24) U ‘rhwale’ swidyoho swa vanhu hinkwavo lava kombisaka ripfumelo eka gandzelo rakwe ra nkutsulo. U kombise ku tiyimisela ka Xikwembu ko lava ku hi rivalela swidyoho swa hina hi ku helela. Hikwalaho mbuti “ya Azazele” a yi fanekisela gandzelo ra Yesu Kreste.
(Levhitika 17:10, 11) “‘Loko munhu un’wana ni un’wana wa yindlu ya Israyele kumbe loyi a humaka etikweni rin’wana loyi a tshamaka exikarhi ka n’wina o dya ngati ya muxaka wun’wana ni wun’wana, munhu yoloye loyi a dyaka ngati ndzi ta n’wi fularhela naswona ndzi ta n’wi dlaya exikarhi ka varikwavo. 11 Hikuva vutomi bya nyama byi le ngatini, kutani mina ndzi mi vekele yona ealtarini leswaku mi tikombelela ku rivaleriwa hikuva i ngati leyi kombelelaka ku rivaleriwa hi vutomi lebyi nga eka yona.
Ha Yini Hi Fanele Hi Va Lava Kwetsimaka?
Hlaya Levhitika 17:10. Yehovha u lerise Vaisrayele leswaku va nga dyi ‘ngati ya muxaka hambi wu ri wihi.’ Vakreste na vona va fanele va papalata ngati ya xiharhi kumbe ya munhu. (Mint. 15:28, 29) Mhaka ya ku va ‘xikandza xa Xikwembu xi lwisana na hina’ ni ku va xi hi hlongola evandlheni ra xona ya hi chavisa. Ha xi rhandza naswona hi lava ku xi yingisa. Hambiloko vutomi bya hina byi ri ekhombyeni, hi tiyimiserile ku nga pfumeli loko lava va nga n’wi tiviki Yehovha naswona va nga riki na mhaka ni ku n’wi yingisa va hi sindzisa leswaku hi nga n’wi yingisi. Ha swi tiva leswaku hi ta hlekuriwa hikwalaho ko papalata ngati, kambe hi hlawula ku yingisa Xikwembu. (Yudha 17, 18) I yini lexi nga ta hi pfuna ku “tiyimisela hilaha ku tiyeke” ku nga dyi ngati kumbe ku nga pfumeli ku pomperiwa ngati?—Det. 12:23.
Ku Hlayiwa Ka Bibele
(Levhitika 16:1-17) Yehovha a vulavula na Muxe endzhaku ka rifu ra vana vambirhi va Aroni lava nga fa hikwalaho ka ku tshinela eka Yehovha hi ndlela leyi nga amukelekiki. 2 Yehovha a ku eka Muxe: “Byela Aroni makwenu leswaku a nga fanelanga a nghena nkarhi wun’wana ni wun’wana endhawini yo kwetsima, endzhaku ka khetheni leri pfalaka, emahlweni ka xifunengeto xa Areka leswaku a nga fi, hikuva ndzi ta humelela ehenhla ka xifunengeto ndzi ri epapeni. 3 “Aroni u fanele a ta ni leswi landzelaka loko a ta endhawini yo kwetsima: xinkuzana xa gandzelo ra xidyoho ni khuna ra gandzelo ro hisiwa. 4 U fanele a ambala xiambalo xa lapi xo leha xo kwetsima naswona xiburukwana lexi endliweke hi lapi xi fanele xi funengeta miri wakwe, u fanele a tiboha hi bandhi leri endliweke hi lapi naswona a boha duku ra lapi. I swiambalo swo kwetsima. U ta hlamba hi mati kutani a swi ambala. 5 “U fanele a teka swiphongo swimbirhi leswitsongo eka Vaisrayele swi va gandzelo ra xidyoho ni khuna ri va gandzelo ro hisiwa. 6 “Kutani Aroni u fanele a tisa nkuzi ya gandzelo ra xidyoho leri nga ra yena, ivi a tikombelela ku rivaleriwa, yena ni ndyangu wakwe. 7 “Kutani u ta teka swiphongo swimbirhi a swi yimisa emahlweni ka Yehovha enyangweni ya tende ra nhlengeletano. 8 Aroni u ta hoxa vuhlolotwana eka swiphongo haswimbirhi, vuhlolotwana byin’wana byi va bya Yehovha kasi lebyin’wana byi va bya Azazele. 9 Aroni u ta nyikela xiphongo lexi vuhlolotwana byi xi hlawuleke leswaku xi va xa Yehovha, u ta endla gandzelo ra xidyoho hi xona. 10 Kambe xiphongo lexi vuhlolotwana byi xi hlawuleke leswaku xi va xa Azazele xi fanele xi tisiwa xa ha hanya xi yimisiwa emahlweni ka Yehovha, leswaku ku ta komberiwa ku rivaleriwa swidyoho ehenhla ka xona, leswaku xi ta tshikiwa xi famba xi ya emananga xi va xa Azazele. 11 “Aroni u ta tisa nkuzi ya gandzelo ra xidyoho leri nga ra yena ivi a tikombelela ku rivaleriwa, yena ni ndyangu wakwe; endzhaku ka sweswo u ta tlhava nkuzi ya gandzelo ra xidyoho leri nga ra yena. 12 “Endzhaku ka sweswo u ta teka xo khoma ndzilo lexi teleke hi makala lama pfurhaka lama humaka ealtarini leyi nga emahlweni ka Yehovha ni mpimo wa mavoko mambirhi ya mapa ya murhi wo nun’hwela kutani u ta swi yisa endzeni ka khetheni. 13 U ta tlhela a chela murhi wo nun’hwela ehenhla ka ndzilo emahlweni ka Yehovha, kutani papa ra murhi lowu ri ta funengeta xifunengeto xa Areka ya Vumbhoni leswaku a nga fi. 14 “U ta teka ngati yin’wana ya nkuzi a yi n’wan’wasela hi ritiho emahlweni ka xifunengeto etlhelo ra le vuxeni, naswona u ta n’wan’wasela ngati yin’wana hi ritiho ka nkombo emahlweni ka xifunengeto. 15 “Endzhaku ka sweswo u ta tlhava xiphongo xa gandzelo ra xidyoho leri nga ra vanhu, kutani a yisa ngati ya xona endzeni ka khetheni, a endla hilaha a endleke hakona hi ngati ya nkuzi; u ta yi n’wan’wasela etlhelo ka xifunengeto ni le mahlweni ka xifunengeto. 16 “U fanele a kombela leswaku ndhawu yo kwetsima yi rivaleriwa mayelana ni swilo leswi nga tengangiki leswi endliweke hi Vaisrayele ni swidyoho swa vona, sweswo hi leswi a faneleke a swi endla eka tende ra nhlengeletano, leri nga exikarhi ka vona hikwalaho ka leswi va endlaka swilo leswi nga tengangiki. 17 “A ku fanelanga ku va ni munhu un’wana etendeni ra nhlengeletano loko a nghena a ya kombela ku rivaleriwa endhawini yo kwetsima kukondza a huma. U ta kombelela yena ni ndyangu wakwe ku rivaleriwa swin’we ni Vaisrayele hinkwavo.