NDLELA YO HLULA RIVENGO

4 | Xikwembu Xi Nga Ku Pfuna U Tshika Rivengo

Leswi Bibele Yi Swi Dyondzisaka:

“Mihandzu ya moya lowo kwetsima i rirhandzu, ntsako, ku rhula, ku lehisa mbilu, musa, vunene, ripfumelo, ku olova ni ku tikhoma.”—VAGALATIYA 5:22, 23.

Leswi Swi Vulaka Swona:

Xikwembu xi nga ku pfuna u hlula rivengo. Moya wa xona lowo kwetsima wu nga hi pfuna hi va ni vumunhu lebyi a hi nga ta swi kota ku va na byona hi hexe. Hikwalaho, ematshan’weni yo lava ku hlula rivengo hi hexe, hi ta va hi endla kahle loko hi kombela mpfuno wa Xikwembu. Loko hi endla tano, hi ta titwa ku fana na muapostola Pawulo loyi a tsaleke a ku: “Eka hinkwaswo ndzi ni matimba hikwalaho ka loyi a ndzi nyikaka matimba.” (Vafilipiya 4:13) Nakambe hi ta ku: ‘Ndzi pfuniwa hi Yehovha.’—Pisalema 121:2.

Leswi U Nga Swi Endlaka:

“Yehovha u cince vutomi bya mina ku suka eka ku va ni madzolonga ivi ndzi va munhu wo rhula.”—WALDO

Khongela eka Yehovha u kombela moya wakwe lowo kwetsima. (Luka 11:13) N’wi kombeli a ku pfuna u va ni vumunhu lebyinene. Dyondza hi vumunhu lebyinene bya le Bibeleni lebyi nga ta ku pfuna u hlula rivengo byo tanihi hi rirhandzu, ku rhula, ku lehisa mbilu ni ku tikhoma. Lava tindlela to kombisa vumunhu byebyo evuton’wini bya wena. Nakambe tshama u ri ni vanhu lava nga ni vumunhu byo tano. Va ta ku pfuna ni ku ku khutaza leswaku u “endla mitirho leyinene.”—Vaheveru 10:24.

Swikombiso Swa Manguva Lawa—WALDO

U Hlule Rivengo Ni Madzolonga

Waldo u kule ku vava, leswi n’wi endleke a va ni rivengo. U ri: “Mikarhi yo tala a ndzi tshamela ku lwa ni va xavisi va swidzidziharisi eswitarateni . . . Siku rin’wana, ntlawa wa swigevenga wu ndzi xavele tsotsi leswaku yi ta ndzi dlaya kambe ndzi kote ku yi baleka naswona a yi lo ndzi tlhava kan’we ntsena hi mukwana.”

Waldo a nga swi tsakeli loko a vona nsati wakwe a sungula ku dyondza Bibele ni Timbhoni ta Yehovha. U ri: “A ndzi ti venga swinene Timbhoni naswona mikarhi yo tala a ndzi ti holovela ni ku ti rhukana. Kambe a ti tshamela ku ndzi hlamula hi ndlela yo rhula.”

Hi ku famba ka nkarhi, Waldo na yena u sungule ku dyondza Bibele. U ri: “A swi tika ku hanya hileswi a ndzi swi dyondza. A ndzi ti byela leswaku a ndzi nge swi koti ku tshika ndlela leyi a ndzi kwata hayona ni madzolonga.” Kambe leswi a swi dyondzeke eBibeleni swi cince vutomi byakwe.

Waldo u ya emahlweni a ku: “Siku rin’wana, Alejandro loyi a ndzi dyondzisa Bibele u ndzi kombele ku hlaya Vagalatiya 5:22, 23. . . . U ndzi byele leswaku a swi nga ri ematimbeni ya mina ku va ni vumunhu byebyo kambe a swi ri ematimbeni ya moya lowo kwetsima wa Xikwembu. Sweswo swi cince mavonelo ya mina!”

Leswi a a titshega hi mpfuno wa Xikwembu, Waldo u swi kotile ku hlula rivengo leri a ri na rona. U ri: “Maxaka ni vanghana va mina va khale, a va nge tshembi ndlela leyi ndzi cinceke hayona.” U engeta a ku: “Yehovha u cince vutomi bya mina ku suka eka ku va ni madzolonga ivi ndzi va munhu wo rhula.”