Ku Tsundzuka Matsalwa

Xana swi tshame swi ku tikela ku tsundzuka tsalwa ra Bibele leri u ri rhandzaka? Ku nga ha va tsalwa leri ku chavelelaka, leri ku pfunaka u tshika ku ehleketa hi swilo swo biha kumbe leri u lavaka ku ri hlayela un’wana. (Ps. 119:​11, 111) Hi leswi swiringanyeto leswi nga ku pfunaka u tsundzuka matsalwa.

• Tirhisa JW Library^® app. Loko u hlaya Bibele eka JW Library^®, kutani u kuma tsalwa leri u lavaka ku ri tsundzuka, u nga ri hlayisa leswaku swi ta ku olovela ku hatla u ri kuma enkarhini lowu taka.

• Veka tsalwa endhawini leyi u nga ta ri vona. Ri tsale ehansi tsalwa leri u lavaka ku ri tsundzuka kutani u ri veka endhawini leyi u nga ta hamba u ri vona. Van’wana va ri namarheta exivonini kasi van’wana efirijini. Nakambe van’wana va ri veka ri va xifaniso lexi humelelaka loko u layita khompyuta kumbe foni.

• Endla makhadi. Tsala ndzimana ekhadini eka tlhelo rin’we ivi u ri hundzuluxa u tsala marito ya tsalwa eka tlhelo lerin’wana. Eka tlhelo leri u tsaleke ndzimana, ringeta ku vula marito ya ndzimana yoleyo kasi eka tlhelo leri u tsaleke marito ringeta ku vula ndzimana ya kona.