‘Tshama U Ri Ni Vun’we Lebyi Vaka Kona Hikwalaho Ka Moya Lowo Kwetsima’

Hikwalaho ka “moya lowo kwetsima” hi tiphina hi “vun’we.” Leswi swi vula leswaku hi ni vun’we hikwalaho ka matimba ya Xikwembu lama tirhaka. Hambiswiritano, hilaha Pawulo a vuleke hakona, a swo tiendlekela leswaku hi tshama hi ri ni vun’we. Hikwalahokayini? Hikuva Mukreste ha un’we u fanele a hoxa xandla leswaku hi ‘tshama hi ri ni vun’we lebyi vaka kona hikwalaho ka moya lowo kwetsima.’

Hi lexi xikombiso, a hi nge munhu wo karhi u ku nyike movha lowuntshwa. Kambe i mani loyi a faneleke a tiyiseka leswaku wu tshama wu ri exiyin’weni lexinene? Nhlamulo yi le rivaleni. Hikwalaho, loko wu onhaka a wu nge soli loyi a ku nyikeke wona hileswi u nga wu khathalelangiki.

Hilaha ku fanaka, hambileswi vun’we bya hina tanihi Vakreste ku nga nyiko leyi hi nyikiweke yona hi Xikwembu, hinkwerhu hi fanele hi tirha hi matimba leswaku hi tshama hi ri ni vun’we. Hikwalaho loko hi nga ri na vuxaka lebyinene na makwerhu wo karhi, hi fanele hi tivutisa leswi, ‘Xana ndzi hoxa xandla leswaku hi tshama hi ri ni vun’we hi ku va ndzi lunghisa timhaka?’

‘TIYIMISELE KU TSHAMA U RI NI VUN’WE’ NI VAN’WANA

Hilaha Pawulo a vuleke hakona, mikarhi yin’wana swi nga lava hi tirha hi matimba leswaku hi tshama hi ri ni vun’we lebyi vaka kona hikwalaho ka moya wo kwetsima. Leswi swi nga va tano ngopfungopfu loko makwerhu a hi khunguvanyisile. Xana ku tirha hi matimba leswaku hi va na vun’we swi vula leswaku mikarhi hinkwayo hi fanele hi ya eka munhu loyi a hi khunguvanyiseke leswaku hi ya lulamisa timhaka? A hi mikarhi hinkwayo swi vulaka sweswo. Tivutise, ‘Xana ku endla mhaka leyi yi va ntshava swi ta endla leswaku ku va ni vun’we kumbe swi to nyanyisa timhaka?’ Mikarhi yin’wana ku ta va ku ri vutlhari ku yi ba hi makatla mhaka yoleyo kumbe hi rivalela munhu la hi khunguvanyiseke.—Swiv. 19:11; Mar. 11:25.

Hilaha muapostola Pawulo a tsaleke hakona, a hi yeni emahlweni hi “tiyiselelana hi rirhandzu.” (Efe. 4:2) Buku yin’wana yi vula leswaku xiga lexi xi nga tlhela xi hundzuluxeriwa hi ndlela leyi, “va amukeleni hilaha va nga hakona.” Leswi swi vula leswaku ha pfumela ku vamakwerhu va dyoha ku fana na hina. I ntiyiso leswaku hi ringeta ku ambala “vumunhu lebyintshwa.” (Efe. 4:​23, 24) Hambiswiritano, a nga kona loyi a nga endlaka tano kwatsaa! (Rhom. 3:23) Loko hi tsundzuka sweswo, swi ta hi olovela ku tiyiselelana ni ku rivalelana. Hi ndlela yoleyo hi ta ‘tshama hi ri ni vun’we lebyi vaka kona hikwalaho ka moya lowo kwetsima.’

Loko hi rivalela vanhu lava hi twiseke ku vava hambiloko hi nga yanga eka vona leswaku hi ya lulamisa timhaka, hi ta ya emahlweni hi tiphina hi “ku rhula.” Rito ra Xigriki leri hundzuluxeriweke ri va “ku rhula” eka Vaefesa 4:3 ri hundzuluxeriwe ri va “misiha” eka Vakolosa 2:19. Misiha i tinyama to tsindziyela leti hlanganisaka marhambu. Hilaha ku fanaka, loko hi ri ni ku rhula ni vamakwerhu hi tlhela hi va rhandza, swi ta hi pfuna leswaku hi tshama hi ri ekusuhi na vona hambiloko mikarhi yin’wana hi tlulana milenge.

Hikwalaho, loko makwerhu a ku pfuka, a ku khunguvanyisa kumbe a ku nyangatsa, ringeta ku languta leswinene eka yena ematshan’weni ya ku languta swo biha. (Kol. 3:12) Leswi hinkwerhu hi dyohaka, swi nga endleka na wena u tshame u twisa un’wana ku vava. Loko u tsundzuka sweswo, swi ta ku pfuna leswaku u endla leswi u faneleke u swi endla leswaku hi ‘tshama hi ri ni vun’we lebyi vaka kona hikwalaho ka moya lowo kwetsima.’