Ndzi Ta Hambeta Ndzi Va Mbhoni Ya Yehovha

A NDZI byi rhandza swinene vukhongeri naswona a ndzi endla mintirho ya Kereke ya Khatoliki hi ku hiseka. A ndzi yimbelela eka khwayere ya kereke ni ku famba ni vaprista ematikweni, laha a va fika va tlangela nkhuvo wa Xilalelo xa kereke ya Khatoliki. Kutani hi 1955 sesi wa mina u vulavule na mina malunghana ni Paradeyisi leyi taka. U ndzi nyike Bibele ni xibukwana lexi nge, “This Good News of the Kingdom” swin’we ni buku leyi nge “Let God Be True.” A ndzi tsake ngopfu, kutani ndzi vutisa mufundhisi loko ndzi fanele ku hlaya Bibele. U ndzi byele leswaku ndzi ta “hlangana nhloko,” kambe ndzi endle xiboho xo yi hlaya.

Endzhaku ka loko ndzi ye ndzi ya tshama na vakokwana eBoca Chica, mufundhisi u ndzi vutise leswaku ha yini ndzi nga ha yi ekerekeni. Ndzi n’wi hlamusele leswaku tidyondzo to tala ta kereke a ti sekeriwanga eBibeleni. Mufundhisi u ndzi hlundzukerile. Hi rito leri tlakukeke u te: “Yingisa la wena nhwanyana, u nyimpfu leyi lahlekeke entlhambini wa mina.”

Ndzi n’wi hlamule ndzi ku: “Hi wena loyi a lahlekeke entlhambini wa Yehovha, hikuva tinyimpfu i ta Yehovha ku nga ri munhu hambi a ri wihi.”

A ndza ha kalanga ndzi wu veka ekerekeni. Ndzi ye ndzi ya tshama na sesi wa mina naswona endzhaku ka tin’hweti ta tsevu ntsena ndzi twe ntiyiso, ndzi khuvuriwile. Ndzi nambe ndzi va phayona ra nkarhi hinkwawo. Endzhakunyana ka lembe, ndzi tekane na Enrique Glass, loyi a a ri mulanguteri wa xifundzha. Siku rin’wana loko hi ri karhi hi chumayela ephakeni le La Romana, Enrique u khomiwe hi maphorisa. Loko ma ri karhi ma famba na yena, ndzi ma landzelerile kutani ndzi ku: “Na mina ndzi Mbhoni ya Yehovha a ndzi ri eku chumayeleni. Ha yini na mina mi nga ndzi khomi?” Kambe a ma nga lavi ku khoma mina.

Enrique se a a hete malembe ya nkombo ni hafu a gweviwe ku tshama ekhotsweni. Sweswi a gweviwe ku tshama tin’hweti ta 20. Sonto yin’wana ni yin’wana a ndzi endzela Enrique. Eka rin’wana ra maendzo ya mina, mulanguteri wa khotso u ndzi vutise a ku: “U lava yini laha?”

Ndzi hlamule ndzi ku: “Nuna wa mina u khomiwe hikwalaho ka leswi a nga Mbhoni ya Yehovha.”

U hlamule a ku: “Wa ha ri ntsongo naswona u ni vumundzuku lebyinene. Ha yini u tlanga hi nkarhi wa wena hi ku tihlanganisa ni Timbhoni ta Yehovha?”

Ndzi hlamule ndzi ku: “Na mina ndzi Mbhoni ya Yehovha. Hambiloko wo ndzi dlaya ka nkombo kutani u ndzi pfuxa ka nkombo, ndzi ta hambeta ndzi va Mbhoni ya Yehovha.” A kolwe hi yo oxa kutani a ndzi byela leswaku ndzi famba.

Endzhaku ka loko ku yirisiwa ku herisiwile, Enrique u tirhe malembe yo tala na mina entirhweni lowu khale a wu ri wo langutela xifundzha ni muganga. Enrique u fe hi March 8, 2008. Ni sweswi ndza ha ri phayona ra nkarhi hinkwawo.