Ku Va Ni Ntsako Ku Nga Khathariseki Makhombo Lama Ndzi Weleke—Ndlela Leyi Bibele Yi Ndzi Pfuneke Ha Yona Ku Tiyisela

Hi Ku Vula Ka Enrique Caravaca Acosta

A ku ri hi April 15, 1971. A ndzi ri endleleni yo ya endzela ndyangu wa ka hina lowu a wu tshama epurasini ra ka hina. Leswi se a ndzi ri ni nkarhi wo leha ndzi sukile ekaya, a ndzi swi langutele hi mahlo-ngati ku va vona hinkwavo. A ndzi tivutisa loko hinkwavo ndzi ta va kuma va ri kona ekaya nileswaku i mani loyi ndzi nga ta n’wi vona ku sungula. Loko ndzi fika, ndzi tsemeke nhlana loko ndzi kuma vanhu va mune va dlayiwile, ku katsa na Manana!

SWESWO swi ndzi tseme nhlana hakunene! A ku endleke yini? Xana a ndzi ta endla yini? A ku ri hava munhu kwalaho naswona ndzi pfilunganyekile ndzi nga swi tivi leswaku ndzi nga endla yini. Ndzi nga si ya emahlweni ni mhaka leyi, mi nge ndzi mi chumbutelanyana hi ta vutomi bya mina. Kutani sweswo swi ta endla leswaku mi yi twisisa kahle ndlela leyi ndzi titweke ha yona hi mhaka leyi swin’we ni makhombo man’wana lama ndzi weleke evuton’wini bya mina.

Hi Kuma Ntiyiso

Ndzi velekiwe eQuirimán, ekusuhi ni doroba ra Nicoya le Costa Rica. Hi 1953, loko ndza ha ri na malembe ya 37 a ndzi tshama ni vatswari va mina epurasini ra ka hina. Hambileswi a hi nghena kereke ya Khatoliki, a hi nga ti tsakeli tidyondzo tin’wana ta yona naswona a hi ri ni swivutiso swo tala leswi hi nga kumangiki tinhlamulo ta swona.

Siku rin’wana ni mixo, wanuna loyi a vuriwaka Anatolio Alfaro u te ekaya kutani a hi khutaza leswaku hi dyondza Bibele. U hi hlayele matsalwa yo tala ni ku hi dyondzisa tidyondzo ta le Bibeleni. Tatana, Manana, un’wana wa tindzisana ta mina wa mufana ni wa nhwanyana ni munghana wakwe loyi a a tshama na hina swin’we na mina, hinkwerhu hi tshame ehansi hi yingisela. Bulo rolero ri hele nivusiku. A hi ri ni swivutiso swo tala.

Anatolio u etlele ekaya vusiku byebyo naswona siku leri landzeleke u ri hete a ri ekaya. Swi hi tsakise ngopfu leswi hi swi tweke ngopfu-ngopfu loko swivutiso leswi a hi ri na swona swi hlamuriwe hi ku kongoma ku suka eBibeleni. Bulo rolero ri byi khumbe ngopfu vutomi bya hina. Hi anakanyisise hi leswi hi swi dyondzeke kutani hi xiya leswaku hi kume ntiyiso. Anatolio u hi siyele timagazini ni tibuku tin’wana leti vulavulaka hi Bibele. Nimadyambu a hi hlaya tibuku teto hi ri ndyangu. Sweswo a swi tika tanihi leswi a hi nga ri na gezi. Loko hi nga si tshama ehansi leswaku hi sungula ku dyondza, ha un’we wa hina a a teka saka ra mazambhana kutani hi ti funengeta milenge leswaku hi nga lumiwi hi tinsuna.

Endzhaku ka tin’hweti ta tsevu, swirho swa ntlhanu swa ndyangu wa ka hina, ku katsa na mina swin’we ni vatswari va mina, hi khuvuriwile. Hi sungule ku famba hi yindlu ni yindlu hi chumayela van’wana hi leswi hi swi dyondzeke. A hi famba tiawara ta kwalomu ka timbirhi hi milenge naswona minkarhi yin’wana a hi famba hi hanci hi ya edorobeni ra Carrillo leswaku hi ya hlangana ni ntlawa wa Timbhoni ta Yehovha. Anatolio u hambete a ta ekaya leswaku a ta dyondza Bibele na hina. Kutani ku hleriwe leswaku minhlangano yi khomeriwa ekaya leyi eka yona a ku ta vanhu va kwalomu ka nhungu. Hinkwavo ka vona va hetelele va khuvuriwile. Hi ku hatlisa ntlawa wolowo wu kurile wu va vandlha leritsongo leri nga ni vanhu va kwalomu ka 20.

Ku Endla Ntirho Wo Chumayela

Hi ku famba ka nkarhi, rhavi ra Timbhoni ta Yehovha ra le Costa Rica ri rhambe lava nga swi kotaka ku heta nkarhi wo tala entirhweni wo chumayela. Hi 1957, ndzi amukele xirhambo xexo kutani ndzi sungula ku heta nkarhi wo tala entirhweni wo chumayela. Ntirho wolowo a wu tsakisa ngopfu. Hakanyingi a ndzi famba ndzi ri ndzexe ku ringana tiawara to tala leswaku ndzi ya chumayela vanhu lava a va tshama etindhawini ta le makaya. Minkarhi yin’wana vanhu a va nga ndzi amukeli emakaya ya vona. Ndzi tsundzuka minkarhi yin’wana yinharhu laha vavanuna lava khomeke mabanga va ndzi chaviseke, va lava ku tiva leswaku ndzi mani nileswaku a ndzi endla yini.

Hi va-1950, magondzo yo tala a ko va swindledyana leswi tsemakanyaka makhwati naswona a swi tika ku fika laha vanhu va tshamaka kona. A ndzi boheka ku famba hi hanci leswaku ndzi fika etindhawini tin’wana. A ndzi tsemakanya milambu naswona minkarhi yin’wana a ndzi etlela enhoveni. Tinsuna a ti ndzi tikisela vutomi. Naswona a ndzi fanele ndzi tshama ndzi xalamukile hikuva a ku ri ni tinyoka ni tingwenya. Ku nga khathariseki swilo sweswo hinkwaswo, ndzi tiphine swinene hi ku pfuna vanhu leswaku va dyondza hi Yehovha Xikwembu. Loko ndzi fike ekaya, a ndzi titwa ndzi tsakile hileswi ndzi koteke ku dyondzisa van’wana ntiyiso wa le Bibeleni. Loko ndzi ri karhi ndzi chumayela ni ku dyondza Bibele siku na siku, ndzi ye ndzi n’wi rhandza swinene Yehovha Xikwembu naswona ndzi titwe ndzi ri kusuhi swinene na yena.

Hi ku famba ka nkarhi, ndzi nyikiwe swiavelo swin’wana swo tala. Ndzi hete malembe yo tlula khume ndzi ri karhi ndzi endzela vandlha ha rin’we vhiki na vhiki endhawini yo karhi leswaku ndzi ri khutaza. Hambileswi ndzi bohekeke ku tshika ntirho lowu hikwalaho ka mavabyi, ndzi ye emahlweni ndzi heta nkarhi wo tala ndzi chumayela vanhu.

Ndzi Weriwa Hi Khombo

Kutani loko ndzi ri eNicoya hi 1971, ndzi endzele ndyangu wa ka hina. Loko ndzi nghena endlwini, ndzi kume Manana loyi a nga ni malembe ya 80 a etlele ehansi. A a duvuriwile a tlhela a tlhaviwa. Loko ndzi korhama leswaku ndzi ta n’wi khoma, a a ha hefemula. Endzhakunyana u fele emavokweni ya mina. Loko ndzi rhalarhala ndzi vone mutirhi wo sweka a etlele ehansi ekhixini, loyi a a ri ni tin’hweti ta nhungu a tikile. Na yena a a file. Loko ndza ha hlamale sweswo, ndzi kume swirho swa vandlha swi file ephasejini naswona xifanyetana xa mutirhi luya a xi file endhawini yo hlambela eka yona. Hinkwavo ka vona a va tlhaveteriwile va tlhela va duvuriwa. Xana i mani loyi a nga vaka a endle swilo swo chavisa swonghasi naswona a a swi endlela yini?

Loko ndzi humela ehandle ndzi kume Tatana. A a duvuriwe enhlokweni kambe a a ha hanya! Ndzi tsutsumele emutini wa ndzisana ya mina laha swi tekaka timinete ta 15 ku ya kona, kambe ndzi twe leswaku ku dlayiwe ni wansati un’wana swin’we ni n’wana wakwe wa mufana. Ndzi tsemeke nhlana loko ndzi twa leswaku mudlayi wa kona a ku ri muzala wa mina loyi a nga ni malembe ya 17, loyi a a nga ri Mbhoni ya Yehovha naswona a a hlanya! Kambe u balekile. Hiloko maphorisa ma sungula ku n’wi hlota bya xiharhi. Ematin’wini hinkwawo ya Costa Rica, a ku si tshama ku hlotiwa xigevenga hi ndlela yoleyo.

Mhaka ya kona ku vulavuriwe ha yona eka mahungu ya tiko hinkwaro. Endzhaku ka masiku ya nkombo, maphorisa ma n’wi kumile mudlayi yoloye, loyi a a hlome hi mukwana wo leha ni xibamu lexi a a xaviseriwe xona hi munhu un’wana hambileswi a a swi tiva leswaku a a ri ni vuvabyi bya mianakanyo naswona a a ri ni ntshikilelo wa mianakanyo. Muzala wa mina u duvuriwe a fa loko maphorisa ma ringeta ku n’wi khoma.

Loko muzala wa mina a ri karhi a hlotiwa, vanhu vo tala va ndzi khutaze leswaku ndzi baleka endhawini yoleyo hileswi a va chava leswaku a nga tlhela a vuya a ta ndzi vavisa. Ndzi khongele hi yona mhaka yoleyo hikuva a ndzi lava ku tshama ni swirho swa ndyangu wa ka hina leswi poneke swin’we ni swirho swa vandlha. Kutani a ndzi balekanga.

Ndzi Weriwa Hi Makhombo Man’wana

Lexi vavisaka, Tatana u hanye lembe rin’we ntsena. Lembe leri landzeleke, ndzisana ya mina leyi a yi ri nandza loyi a tshembekaka wa Yehovha Xikwembu, yi dlayiwile eka xiendlakalo xin’wana lexi a xi nga fambelani ni lexiya xo sungula. Maxaka ya mina hinkwawo ma tlhele ma tsemeka nhlana loko ma feriwa hi xirho xin’wana xa ndyangu. Gome leri hi veke na rona swin’we ni vanghana va hina a ri nga hlamuseleki nikatsongo. Eka makhombo wolawo hinkwawo, a ndzi titshege swinene hi Yehovha naswona ndzi hambete ndzi kombela leswaku a ndzi tiyisa.

Hi 1985, ndzi ye exikolweni xa ndzetelo lexi tekaka masiku manharhu xa vakulu lava nga Vakreste entsindza wa tiko, ku nga San José. Loko xikolo xexo xi hela, ndzi xiye leswaku vuxaka bya mina na Yehovha a byi tiyile. Hi Musumbhunuku nimixo, ndzi khandziye bazi ndzi tlhelela ekaya. Loko ndzi ri karhi ndzi ya exitichini xa mabazi, ndzi hlaseriwe hi tinsula-voya, leti ndzi tlimbeke kutani ti ndzi tekela leswi a ndzi ri na swona. Sweswo swi endleke hi ku tsopeta ka tihlo lerova a ndzi swi kotaka ku vona swikandza swa tona. Leswi swi endle leswaku ndzi nga ha swi koti ku vulavula hi ndlela ya xintu ya le Costa Rica. Exifundzheni xa Guanacaste, loko vavanuna va hlangana va xewetana hi ku huwelela kumbe va huwelela leswaku vanhu va swi tiva leswaku va kona. A ndzi famba emahlweni hi ku huwelela kambe sweswi a ndza ha swi koti.

Hi 1979, ndzi tekane na Celia, Mbhoni-kulorhi leyi humaka evandlheni leri nga endhawini leyi nga ekusuhi ni laha ndzi tshamaka kona. Celia a a yi rhandza swinene Bibele. Siku ni siku a hi hlaya Bibele swin’we. Lexi vavisaka, nsati wa mina u dlayiwe hi khensa hi July 2001. Minkarhi yin’wana ndzi va ni xivundza, kambe ntshembo wa leswaku vafi va ta pfuxiwa wa ndzi tiyisa.—Yohane 5:28, 29.

Ku Va Ni Ntsako Ku Nga Khathariseki Miringo

Hambileswi ndzi nga weriwa hi makhombo yo tala evuton’wini bya mina ku tlula vanhu vo tala, ndzi teka miringo yoleyo ku ri ndlela yo kombisa leswaku ndzi ni ripfumelo naswona ndza n’wi tshemba Yehovha. (Yakobo 1:13) Leswaku ndzi va ni langutelo lerinene hi swilo swo biha leswi ndzi humeleleke, ndzi tshamela ku tibyela leswaku “nkarhi ni xiendlakalo lexi nga languteriwangiki” swa hi wela hinkwerhu. (Eklesiasta 9:11) Naswona ndza swi tiva leswaku leyi i “minkarhi ya mangava leyi swi nonon’hwaka ku langutana na yona,” hikuva vanhu va ta va ni tihanyi, madzolonga tlhelo lava nga tikhomiki. (2 Timotiya 3:1-5) Ndzi tlhela ndzi tsundzuka mhaka ya Yobo. Ku nga khathariseki maxangu hinkwawo ya Yobo—ku feriwa hi vana, ku khomiwa hi vuvabyi ni ku lahlekeriwa hi ntlhambi wakwe—u vule hi ku tiyiseka a ku: “Vito ra Yehovha a ri ye emahlweni ri dzunisiwa.” Kutani Yehovha u n’wi katekise swinene Yobo hileswi a tshameke a tshembekile. (Yobo 1:13-22; 42:12-15) Timhaka leti leti humaka eBibeleni ti ndzi pfune leswaku ndzi tshama ndzi tsakile ku nga khathariseki miringo yo tala leyi ndzi weleke.

Yehovha u ndzi pfunile minkarhi hinkwayo leswaku ndzi hambeta ndzi rhangisa yena evuton’wini bya mina. Ku hlaya Bibele siku na siku swi ndzi chavelela swinene naswona swi ndzi nyika matimba yo tiyisela. Ku khongela eka Yehovha swi endla leswaku ndzi va ni “ku rhula ka Xikwembu loku tlulaka miehleketo hinkwayo.” (Vafilipiya 4:6, 7) Leswi swi endla leswaku ndzi va ni ku rhula emianakanyweni ya mina. Nakambe ku va kona eminhlanganweni ya Vukreste ni ku nyikela tinhlamulo na swona swi tiyisa ripfumelo ra mina.—Vaheveru 10:24, 25.

Hambileswi se ndzi khalabyeke, ndza n’wi nkhensa Yehovha hileswi ndza ha swi kotaka ku tirha ni Vakreste-kulorhi, ku dyondza Bibele ni van’wana ni ku chumayela. Ku tirhela van’wana hi tindlela leti swi ndzi nyika matimba yo tiyisela gome. Ndzi nkhensa Yehovha hi mbilu ya mina hinkwayo ku nga khathariseki makhombo yo tala lama ndzi weleke evuton’wini.a

[Nhlamuselo ya le hansi]

[Marito lama tshahiweke exihlokweni lama nga eka tluka 20]

Ku hlaya Bibele siku na siku swi ndzi chavelela swinene naswona swi ndzi nyika matimba yo tiyisela

[Xifaniso lexi nga eka tluka 19]

Ndzi ri karhi ndzi nyikela nkulumo

[Xifaniso lexi nga eka tluka 20]

Ndzi ri ensin’wini