Ku Tirhisiwa Titriliyoni Ta Mali eNyimpini—Nyimpi Yi Onha Ku Fikela Kwihi?

Nyimpi ya onha swinene.

• “Mali leyi tirhisiwaka etinyimpini ta misava yi fikelele 41,7 wa titriliyoni ta tirhandi etinyimpini ta misava.”—The Washington Post, February 13, 2024.

Nyimpi yi koxa swo tala ku tlula mali. Ehleketa hi xikombiso xin’we ntsena: Nyimpi ya le Ukraine.

• Masocha. Ku ringanyetiwa leswaku masocha yo ringana 500 000 ma dlayiwile kumbe ma vavisiwile ku sukela eka malembe mambirhi lama hundzeke.

• Vaakatiko. Vanhu lava tlulaka 28 000 va file kumbe va vavisiwile hi ku ya hi Nhlangano wa Matiko. Hambiswiritano, mutirhela mfumo la tlakukeke wa UN u te: “Swa tika ku tiva leswaku i vanhu vangani lava vutomi bya vona byi onhiweke hi nyimpi leyi lovisaka.”a

Nhlayo ya vanhu lava xanisekaka hikwalaho ka nyimpi i yikulu swinene.

• 114 wa timiliyoni. Leyi i nhlayo ya vanhu lava rhurhisiweke emakaya ya vona hikwalaho ka nyimpi ni madzolonga emisaveni hinkwayo ku fikela hi September 2023.

• 783 wa timiliyoni. Leyi i nhlayo ya vanhu lava sikaka hikwalaho ko pfumala swakudya. “Nyimpi ka ha ri yona yi vangaka ndlala, 70 wa tiphesente ta vanhu lava sikaka hi ndlala emisaveni hinkwayo va tshama etindhawini leti hlaseriweke hi tinyimpi ni madzolonga.”—World Food Programme.

Xana nyimpi yi ta kala yi hela? Xana ku rhula ku ta va kona? Xana mali yo tala leyi nga kona emisaveni yi ta tirhisiwa leswaku yi herisa ndlala ni vusweti? Xana Bibele yi ri yini hi mhaka leyi?

Nkarhi wa nyimpi

Bibele yi profete leswaku ku ta va ni tinyimpi to tala, yi ti hlamusela hi ndlela yo fanekisela ku fana ni mugadi wa hanci.

• “Hiloko ku landzela hanci yin’wana ya muhlovo wo tshwuka naswona loyi a tshameke ehenhla ka yona a a pfumeleriwe ku susa ku rhula emisaveni leswaku vanhu va dlayana, kutani a nyikiwa banga lerikulu.”—Nhlavutelo 6:4.

Mugadi loyi wa hanci u landzeriwa hi vagadi vambirhi lava fanekiselaka ndlala ni rifu leswi vangiwaka hi ntungu kumbe swivangelo swin’wana. (Nhlavutelo 6:5-8) Leswaku u dyondza leswi engetelekeke hi vuprofeta lebyi bya le Bibele ni leswi endlaka leswaku hi tiyiseka ku bya hetiseka namuntlha, hlaya nhlokomhaka leyi nge “I Vamani Vagadi Va Mune Va Tihanci?”

Vumundzuku lebyi nga ni ku rhula

Ku nga ri khale, timali ta misava a ti nge he tirhiseriwi nyimpi. Hambiswiritano, leswi a swi nge endliwi hi vanhu. Bibele yi ri:

• Xikwembu xi ta “herisa tinyimpi emisaveni hinkwayo.”—Pisalema 46:9.

• Xikwembu xi ta herisa vubihi lebyi vangiwaka hi nyimpi. “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona. Swilo swo sungula swi hundzile.”—Nhlavutelo 21:4.

• Xikwembu xi ta endla leswaku ku va ni ku rhula hilaha ku nga heriki. “Vanhu va mina va ta tshama endhawini yo rhula, etindlwini leti sirhelelekeke laha ku nga riki na pongo.”—Esaya 32:18.

Vuprofeta bya Bibele hi tinyimpi ni swiendlakalo swin’wana leswi hi swi vonaka namuntlha swi kombisa leswaku ku ta va ni ku rhula ku nga ri khale.

Xikwembu xi ta byi tisa njhani vumundzuku lebyi rhuleke? Xi ta tirhisa mfumo wa xona wa le tilweni, kumbe Hulumendhe. (Matewu 6:10) Ku tiva leswaku i yini Mfumo lowu ni leswi wu nga vulaka swona eka wena, hlalela vhidiyo leyi nge Mfumo Wa Xikwembu I Yini?