Ku Endla Tiprojeke Leti Nga Ta Vuyerisa Vamakwerhu Swin’we Ni Pulanete Ya Hina

Tanihi Timbhoni ta Yehovha ha swi tiva leswaku ku nga ri khale Yehovha u ta ponisa planete ya hina eka ku onhaka loku vangiweke hi vanhu. (Nhlavutelo 11:18) Nilokoswiritano, na hina hi endla swo karhi ku va hi khathalela planete ya hina. Hi xikombiso, hi endle miako leyi hi gandzelaka Yehovha eka yona hi ndlela leyi nga onhiki mbango.

Xikongomelo xa tiprojeke leti i ku endla swilo leswi nga ta ka swi nga onhi mbango hilaha hi nga kotaka hakona. I tiprojeke ta njhani leti hi ti endleke? Ti hi pfune njhani leswaku hi tirhisa minyikelo hi ndlela ya vutlhari?

Ku Endla Leswaku Tiholo Ta Hina Ta Tinhlengeletano Ti Nga Hisi

Eku sunguleni, muako wa Holo ya Tinhlengeletano ya le Matola eMozambique a wu akiwe wu nga ri ni makhumbi naswona a wu fuleriwe hi mazenge. Mazenge wolawo a ma koka ku hisa ka dyambu leswi a swi endla leswaku endzeni ka holo ku hisa swinene. Makwerhu un’wana loyi a tshamaka kwalaho u te: “Ku hisa koloko a ku endla leswaku hi dzuka nyuku! Loko nongonoko wu hela, vamakwerhu a va tsutsumela ehandle leswaku va ya bela hi moya.” Xana a hi ta endla yini leswaku vamakwerhu va va ni ndhawu ya kahle yo dyondzela eka yona?

Hi kunguhate ku endla leswi a swi nga ta onha mbango, swo fana ni ku hoxa tifene leti tirhaka hi moya ni ku hoxa swiponci emazengeni. Swiponci swoleswo swi hunguta ku hisa loku nghenaka endzeni ka muako naswona tifene ti hunga moya wa kahle. Tifene toleto a ti tirhisi gezi kambe ti tirhisa moya leswaku ti humesa moya wo hisa lowu vaka kona endzeni ka muako. Fene yin’we yi koxa kwalomu ka 50 wa tidolara.a

Xitshunxo lexi xi hi pfunile swinene hikuva sweswi ku hunga moya wa kahle endzeni ka Holo ya Tinhlengeletano. Leswi moya wu tshamaka wu hunga a ku vi ni nkahelo wo tala endzeni ka Holo ku fana ni khale. A ku vi ni moya wo tala lowu thyakeke naswona ku va ni okisijini yo tala. Sweswi vamakwerhu va vuyeriwa. Makwerhu loyi ku vulavuriweke ha yena eku sunguleni u ri: “Sweswi a ha ha tsutsumeli ehandle loko nongonoko wu hela. Ematshan’weni ya sweswo, hi tshama eHolweni hi nkarhi wa ku wisa hi bula ni vanghana. Loko hi tshame endzeni ka Holo leyintshwa hi titwa onge hi tshame ehansi ka murhi lowukulu lowu nga ni ndzhuti wo nandziha!”

Xitirhisiwa Lexi Endlaka Gezi Hi Ku Tirhisa Dyambu

Eka miako ya hina yo tala ya vugandzeri emisaveni hinkwayo, ku hoxiwe tiphanele ta tisolar ta photovoltaic (PV). Tiphanele leti ti koka dyambu ivi ti ri cinca ri va gezi. Hikwalaho ka sweswo, a hi tirhisi ngopfu gezi leri endliwaka hi swicelwa swo fana ni malahla, oyili ni gasi. Tiphanele leti ta PV ti humesa moya wutsongo lowu thyakeke naswona ti hi pfuna leswaku hi hlayisa minyikelo.

Hi 2022, ku hoxiwe tiphanele ta PV etihofisini ta rhavi ra le Slovenia. Ti endla kwalomu ka tiphesente ta 30 ta gezi leri lavekaka eka muako hinkwawo. Loko tiphanele teto to endla gezi leri tlulaka leri lavekaka, leri salaka ri hundziseriwa eka vanhu lava tshamaka kwalaho. Tiphanele teto ta PV ti koxa ntsengo wa tidolara ta 360 000. Nilokoswiritano, eka malembe ya mune lama landzelaka hi ta va hi hlayise mali eka ku xava gezi ku tlula leyi hi yi tirhiseke eka ku xava tiphanele leti.

Hi 2024, hi hoxe tiphanele ta PV ni betri leyikulu etihofisini ta rhavi ra le Sri Lanka. Projeke yoleyo yi koxe kwalomu ka tidolara ta 3 miliyoni naswona tiphanele teto ta tisolar ti endla kwalomu ka tiphesente ta 70 ta gezi leri lavekaka erhavini. Eka malembe manharhu lama landzelaka hi ta va hi hlayise mali yo tala hi ku tirhisa tiphanele leti ku tlula leyi hi yi tirhiseke ku ti xava. Hi lembe leri fanaka, hi tlhele hi hoxa tiphanele ta PV etihofisini ta rhavi ra le Netherlands. Tiphanele teto ti koxe kwalomu ka tidolara ta 1,1 wa timiliyoni naswona ti endla tiphesente ta 35 ta gezi leri lavekaka erhavini. Eka malembe ya kaye lama landzelaka, hi ta va hi hlayise mali yo tala leyi tlulaka leyi hi tirhiseke ku xava tiphanele leti.

Hi tlhele hi hoxa tiphanele ta PV eka tindhawu to tala ta tihofisi ta vuhundzuluxeri (RTO) eMexico. A hi kambisiseni xikombiso xa le Tarahumara (Central) RTO leyi kumekaka eChihuahua. Hi xixika, maxelo ya kona ma fika ehansi ka 0 wa tidigri kasi hi ximumu ku hisa kwalomu ka 40 wa tidigri! Kambe leswi gezi ri durhaka, vamakwerhu va papalate ku tirhisa switirhisiwa leswi titimerisaka kumbe ku hisisa ndhawu. Jonathan, makwerhu loyi a tirhaka eRTO, u ri: “Hi xixika a hi tirhisa minkumba ni swiambalo swo kufumela naswona hi ximumu a hi pfula mafasitere.”

Hi 2024, hi hoxe tiphanele ta PV eka RTO yoleyo. Tiphanele leti ti koxe mali leyi ringanaka tidolara ta 21 480 kambe eka malembe ya ntlhanu lama landzelaka hi ta va hi hlayise mali yo tala ku tlula leyi hi yi tirhiseke ku ti xava. Sweswi vamakwerhu va kota ku tirhisa switirhisiwa swo titimerisa kumbe ku hisisa ndhawu mikarhi yo tala. Jonathan u ri: “Sweswi ha tiphina swinene hi swiavelo swa hina naswona hi swi endla kahle. Hilaha ku fanaka, ha tsaka ku tiva leswaku switirhisiwa swa nhlangano swi tirhisiwa hi ndlela leyinene leyi nga onhiki mbango.”

Ku Tirhisa Mati Ya Mpfula

EAfrika, Tiholo tin’wana ta Mfumo a ti na mati. Hikwalaho ka sweswo, vamakwerhu a va boheka ku rhwala mati va famba mpfhuka wo leha ku ya eHolweni ya Mfumo. Eka tiholo tin’wana, vamakwerhu va xava mati lama tisiwaka hi tilori kambe leswi swa durha naswona swi onha mbango.

Leswaku vamakwerhu va kuma mati, hi hoxe tigutter ni mathangi lamakulu ya mati eka Tiholo to hlaya ta Mfumo eAfrika. Loko vamakwerhu va nga si hoxa switirhisiwa, va kambela maxelo ya ndhawu leswaku va ta kota ku hoxa switirhisiwa leswi faneleke. Ku hoxa switirhisiwa leswi eka Holo ya Mfumo, swi koxa kwalomu ka 600 ni 3 000 wa tidolara. Hambiswiritano, switirhisiwa leswi swi hunguta mali leyi a yi fanele yi tirhisiwa eTiholweni ta Mfumo tanihi leswi vamakwerhu va nga ha xaviki mati.

Mati lawa ya mpfula ma va vuyerisa swinene vamakwerhu. Noemia, makwerhu wa xisati wa le Mozambique, u ri: “Khale a hi boheka ku famba mpfhuka wo leha leswaku hi kuma mati. A hi ta fika etidyondzweni hi karhele naswona hi nga ha lavi nchumu. Leswi mati a ma kala a swi hi tikela ku tshama hi basile. Sweswi hinkwerhu hi kota ku hlamba mavoko. Hi kota ku tiphina hi tinhlengeletano ta vandlha hi nga karhalanga ngopfu. Ha khensa swinene!”

Xana nhlangano wu ti hakelela njhani tiprojeke leti? Hi ku tirhisa minyikelo ya ntirho wa misava hinkwayo leyi nyikeriwa hi ku tirhisa tindlela to hambanahambana leti kumekaka eka donate.jw.org. Ha yi tlangela minyikelo ya n’wina ya ku tirhandzela!