Swilo Leswi Xidzedze Xa Andrew Xi Nga Tsandzeka Ku Swi Onha

KU NI swidzedze, ku tlhela ku va ni madyidzedze.a Swin’wana ko va moya wa matimba ntsena, lowu tisaka mpfula leyikulu, wu simula ni mirhi. Kutani a ku ri ni Xidzedze xa Andrew le dzongeni wa Florida (August 24, 1992) ni le Louisiana (August 26, 1992), Xidzedze xa Iniki le Kauai, Hawaii (September 12, 1992) ni Xihuhuri xa Omar le Guam (August 28, 1992).

Swidzedze leswi swi onhe nhundzu leyi yi fikaka eka tibiliyoni ta tirhandhi. Ku nyamalale vanhu vo tala le Florida. Magidi ya mindyangu ma sale ma nga ri na makaya. Vanhu lava hlayisaka mali ya ndzindza-khombo a va tsutsuma-tsutsuma ni makaya lama onhakeke va lava vini va wona, va va tsalela ticheke.

Xiviko lexi humaka eka Komiti ya Xilamulela-mhangu ya Timbhoni ta Yehovha le Fort Lauderdale xi vule leswaku makaya ya 518 eka makaya ya 1 033 ya Timbhoni ta Yehovha exifundzheni xexo ma nga pfuxiwa. Loko ku hlanganisiwa makaya hinkwawo, leswi swi vula leswaku 50 wa tiphesente ta makaya hinkwawo lama kumiweke hi xidzedze xa Andrew ma onhiwile. Endzhaku ka sweswo, lava va nga va ni nkateko wa ku kuma kaya ra ha ri rinene leswaku va tshama ka rona a va ringeta ku omisa nhundzu ya vona ni tinguvu ni ku susa tshepu yo basa leyi endliweke hi silingi leyi cheriweke hi mati lama nga nghena hi lwangu leri onhakeke. Vo tala a va nga ma languti marhumbi ya makaya ya vona. Lava kumbexana va nga lahlekeriwa ngopfu hi lava va tshamaka etindlwini leti nga tiyangiki, leti rhwalekaka kumbe leti kokiwaka hi movha.

Xidzedze Xa Andrew A Xi Tsetselelanga Munhu

Mpatswa wun’wana a ku ri Leonard na Terry Kieffer. Loko va tlhela va ya endzela kaya ra vona leri rhwalekaka le Dorobeni ra Florida, a va fanele va tivula mavito ya vona eka masocha lama rindzeke, leswaku va nghena eka ndhawu yoleyo. Va fike va vona kaya leri a ri vonaka onge ri biwe hi madzana ya tibomo letikulu ngopfu—ti nga siyi ni migodi. Mirhi a yi simukile. Mazinki lama onhakeke ya aluminiyamu, lawa eku sunguleni a ma ri makhumbi ni malwangu ya makaya, a ma hakamele emirhini, ma lengalenga emarhavini onge i swisasekisi swa nkarhi wa nkhuvo. Tintambhu ta ghezi a ti wile hinkwako, timhandzi ti tshoveke ku fana ni tinhi ta mecisi. Timovha a ti wile, ti fayeka.

Bob van Dyk, loyi kaya rakwe lerintshwa ku nga vuriwa leswaku a va fanelanga va tshama ka rona, u hlamusele xiyimo xa yindlu yakwe: “Silingi yi we hi le henhla, yi faya leswi fayekaka, yi penya leswi penyekaka ni ku chavisa hina va rhumbu lerikulu.”

Swilo swa hina, swilo swo tlangisa, swiambalo, swifaniso, tibuku, a swi hangalakile, swi ri switsundzuxo leswi vavaka swa vutomi bya nkarhi lowu nga hundza. Ximanga xa ntima lexi nga xoxe a xi pepetseka ehenhla ka maribye. Xi langute va ka Kieffer hi ku hlamala. Minkolombyana a yi tsutsuma-tsutsuma ehenhla ka swilo leswi eku sunguleni a swi ri swa risima. Risema ra swakudya swo bola, leswi halakeke eka swigwitsirisi leswi nga tshoveka, a ri twala hinkwako! Ematlhelweni hinkwawo a ku vonaka ku onhaka lokukulu—hinkwaswo swi vangiwe hi moya lowukulu, moya wa matimba, lowu a wu famba 260 wa tikhilomitara hi awara.

A swi twisa ku vava eka vini va miti ni lava tshamaka eka makaya lawa. Endzhaku ka malembe yo tala ya ku kurisa ndyangu ni ku tshama emakaya ya vona yo hlawuleka, va vuye ekaya endzhaku ka xidzedze va kuma swilo hinkwaswo swi fayekile, swi hangalakile. Va ka Kieffer va ponise nhundzu ya vona loko va ta ro sungula, kambe a swi vava ngopfu loko va lava-lava swilo swa le kaya leswi a swi sele. Hambi swi ri tano, va khense mhaka ya leswaku va ha hanya ni ku kota ku tirhela Xikwembu.

Xidzedze xa Andrew a xi tshikanga nchumu. Switolo, tifektri, tindlu ta mpahla—hinkwaswo swi onheteriwe hi ntumbuluko. Miako ya vanhu leyikulu a yi ponanga.

Timfanelo Letinene Ni To Biha Leti Nga Kona Eka Munhu

Mpfuno wu sungule ku ta eFlorida wu huma etikweni hinkwaro loko ku ri karhi ku hleriwa mavandlha yo hambana-hambana ya xilamulela-mhangu. Huvo leyi Fumaka ya Timbhoni ta Yehovha le Brooklyn, eNew York, yi hatlise yi teka goza kutani yi hlawula komiti ya xilamulela-mhangu leswaku yi pfuna yi ri le Holweni ya Nhlengeletano ya Fort Lauderdale. Nakambe va humese mali yo vonaka, ya ku xava nhundzu, swakudya ni swilo leswi lavekaka hi ku hatlisa. Hikwalaho ka sweswo, Timbhoni hi tona ti nga sungula ku teka goza eka xiyimo lexi ivi ti sungula ku kombela vapfuni. Entiyisweni van’wana va te va nga vitaniwanga.

Vatirhi lava nga Timbhoni va fike va huma le California, eN’walungwini wa Carolina, Oregon, Washington State, Pennsylvania, Missouri ni le tindhawini tin’wana to tala. Komiti yo Aka ya Xifundzha ya le Virginia leyi hambaka yi aka Tiholo ta Mfumo yi rhume ntlawa wa Timbhoni ta 18 leswaku ti lunghisa malwangu. Swi teke tiawara ta 18 ku ya fika kona. Vatirhi va xilamulela-mhangu va tirhise nkarhi wo wisa, va nga yi entirhweni kutani va famba madzana ni magidi ya tikhilomitara, leswaku va fikelela Timbhoni-kulobye leti karhatekeke.

Ntlawa lowu nga pfuna swinene a ku ri lowu a wu huma eCharleston le Carolina Dzonga. Va tshame va hlaseriwa hi Xidzedze xa Hugo le ndzhaku hi 1989. A va swi tiva leswi a swi ta laveka kutani va hatlise va lunghiselela swilo swa xilamulela-mhangu, ku katsa ni tinjhini ta ghezi ni swilo swo aka. Ku nga si hela mavhiki mambirhi mintlawa ya ku pfuna a yi omise mati eka makaya ya 800 naswona a yi lunghise malwangu yo tala.

Vunyingi bya lava tekaneke ni loyi a nga Mbhoni ni vaakelani va pfunekile hi mpfuno lowu nyikiweke hi mintlawa ya vapfuxeti ya Timbhoni. Ron Clarke la humaka eHomestead Vupela-dyambu u vikile: “Vanghana va vukati lava nga pfumeriki va tsakisiwe ngopfu hi leswi. A va rila, va nga tikoti hi leswi Timbhoni ti va endleleke swona.” Malunghana ni nuna la nga pfumeriki wa Mbhoni yin’wana, u te: “A nga tikoti—sweswi Timbhoni ti n’wi nghenisela lwangu.”

Mbhoni yin’wana yi vulavule hi vaakelani va yona lava nga riki Timbhoni lava a yi va kamba vusiku byin’wana ni byin’wana. Va te, va lulamile. Hi siku ra vuntlhanu, nsati wa kona u ririle. “Hi pfumala ni manapukeni ya n’wana. Swakudya swa n’wana switsongo. A hi na swona swakudya ni mati yo ringanela.” Nuna a a lava makume-mbirhi wa tilitara ta petirolo, kambe a a nga ti kumanga. Hi siku rero, Mbhoni yi fike ni swilo hinkwaswo leswi a va swi pfumala, a yi swi teka eHolweni ya Mfumo laha ku nga ni swilo swa xilamulela-mhangu. Nsati yoloye u rile mihloti hi ku khensa. Nuna yena u nyikerile ku seketela ntirho wa xilamulela-mhangu.

Xiphemu xa nkoka xi endliwe hi vakulu va vandlha ni malandza ya vutirheli lava nga tirha swin’we eku hleleni ka xilamulela-mhangu eka Tiholo ta Mfumo to hambana leti pfuxetiweke endhawini leyi weriweke hi mhangu. Va tirhe handle ko karhala leswaku va kuma Timbhoni hinkwato ni ku tiva leswi va swi pfumalaka. Ku hambana ni sweswo, mutirhi wa Vuthu ra le Moyeni ku vuriwe leswaku u vule marito lawa mayelana ni matshalatshala ya xilamulela-mhangu endhawini yin’wana: “Valawuri hinkwavo va lava ku va valawuri, kambe a ku na munhu loyi a lava ku tirha, a tirha ntirho lowu wa ku basisa ni ku pfuxeta miako.”

Timhangu ti nga endla swilo leswinene ni swo biha evanhwini. Xikombiso xa swilo leswo biha i ku phanga. Ndyangu wun’wana wa Timbhoni wu kunguhate leswaku swi nga antswa ku yisa xigwitsirisi ni muchini wa wona wa ku hlantswa leswaku swi tirhisiwa endhawini ya xilamulela-mhangu eHolweni ya Mfumo ya kwalaho. Va ye eholweni va ya landza lori. Loko va nga si vuya, vaphangi se a va swi yive hinkwaswo swilo leswi!

Mbhoni yo swi vona hi mahlo yi vikile: “Loko hi ri karhi hi famba eswitarateni leswi onhakeke, hi vone makaya ma ri ni mimfungho leyi tsundzuxaka vaphangi leswaku va nga ngheni. Mimfungho yin’wana a yi ku, ‘Vaphangi A Va Dlayiwe’ ni leyi nge, ‘Vaphangi Va Ta Duvuriwa.’ Wun’wana wu te, ‘Ku duvuriwe vaphangi vambirhi. Un’wana u file.’ Switolo swi phangeriwile.” Hi ku ya hi phorisa ra Airborne Division ya vu-82, ku khomiwe muphangi wun’we a bukuteriwa hi vanhu.

Vo tala va khomiwile. Swi tikomba onge eka mhangu yin’wana ni yin’wana vayivi va rhandza ku tumbela ku kota makoti. Naswona hambi ku ri vanhu lava nga taliki ku yiva va kumeka va hlanganyela eka phangeni. Vukhongeri, milawu ya mahanyelo ni ku tikhoma swi vonaka swi nyamalala, hikwalaho ka ndzingo wo lava ku kuma nchumu u nga wu hakelelanga.

Magazini wa Xalamuka! wu byeriwe leswaku eku sunguleni masocha ma nga ri mangani ma yiveriwe ni swibalesa swa wona leswi a swi nga ri na tikulu, swi yiviwe hi vaphangi lava hlomeke. Masocha man’wana ma vule leswaku Holo ya Mfumo ya ndhawu ya xilamulela-mhangu a va yi fanisa ni xihlovo xa le mananga “hikuva,” hi laha va nga vula ha kona, “n’wina a mi swi khomi swibamu.”

“Mi Nga Tshami Hi Mavoko”

Xana Timbhoni ta Yehovha ti dyondze yini eka mintokoto ya tona ya mhangu ya ntumbuluko? Ti pfuxete mintirho ya moya hi ku hatlisa hi laha swi kotekeke ha kona. Ed Rumsey, mulanguteri wa le Homestead, u byele magazini wa Xalamuka! leswaku Holo ya Mfumo yin’wana ya swithezi swimbirhi, se a yi lunghisiwile hi Ravunharhu, leswaku ku khomiwa minhlangano endzhaku ka xidzedze lexi veke kona hi Musumbunuku. Lwangu rin’wana a ri hahlukile, silingi a yi wile ni mati a ma nghenile. Vatirhi vo tirhandzela va tirhe hi ku hatlisa leswaku va pfuxa Tiholo ta Mfumo leswaku ku khomiwa minhlangano ni ku ti tirhisa ti va ndhawu ya ku fambisa ntirho wa xilamulela-mhangu endhawini leyi hlaseriweke. Ku yimisiwe ni switanga leswaku ku phameriwa swakudya swa lava hlaseriweke ni vatirhi va xilamulela-mhangu.

Fermín Pastrana, nkulu la humaka eVandlheni ra Princeton leri tirhisaka Xipaniya, u vike leswaku mindyangu ya nkombo evandlheni leri a nga eka rona leri nga ni Timbhoni ta 80 yi onhakeriwe hi makaya ya wona hinkwayo. Xana i yini lexi a nga vula leswaku Timbhoni-kulobye ti xi endla? “Rilani loko swi mi vava. Kambe mi nga tshami hi mavoko. Yimani mi pfuna van’wana, naswona yanani evutirhelini hi laha swi kotekaka ha kona. Mi va kona eminhlanganweni ya hina ya Vukreste. Lulamisani leswi lulamisekaka, kambe mi nga tikarhati hi leswi swi nga lulamisekiki.” Hikwalaho ka sweswo, Timbhoni ku nga ri khale se a ti chumayela, ti famba ni mabokisi ya xilamulela-mhangu hi yindlu na yindlu. Xidzedze xa Andrew a xi ku hetanga ku hiseka ka tona.

‘Nkarhi Lowu Taka, Hi Ta Baleka!’

Sharon Castro, wansati wa malembe ya 37 hi vukhale la humaka eCutler Ridge, u byele magazini wa Xalamuka! xitori xakwe a ku: “Tata wa mina u ehlekete ku tshama, a nga baleki. A ehleketa leswaku tanihi leswi xidzedze lexi hundzeke xi nga fikangiki eribuweni ra Florida, xidzedze xa Andrew a xi ta endla leswi fanaka. A nga ta ma pfala ni mafasitere hi mapulango. Nkateko wa kona, makwerhu wa mina u tile, a sindzisa leswaku hi pfala mafasitere hi mapulango. Leswi a nga swi endla swi hi ponisile hakunene. Mafasitere ya hina a ma ta va ma fayekile, naswona a hi ta tsemeleriwa.

“Hi nkarhi wa kwalomu ka 4:30 ni mpundzu, gezi yi timekile. Huwa ya le handle a yi tsuvula ni misisi. A yi twakala tanihi mpfumawulo wa xitimela lexikulu. A ku ri ni ku fayeka loko mirhi ni miako swi simuka ni ku tshoveka. Hi swi vone endzhaku ka nkarhi leswaku mpfumawulo lowu chavisaka lowu a hi wu twa a ku ri huwa ya swipikiri swo leha elwangwini ra hina leswi a swi hlomuka. Kamara ra le henhla ri sukile ni xiphemu xa lwangu xi hahluka. Hina va 12 hi hetelele hi tumbele ekamareni ra le xikarhi leri nga riki na mafasitere, ku katsa ni mana wa mina la vabyaka swin’we ni kokwa wa mina wa malembe ya 90 hi vukhale. A hi vona onge hi ta fela kona.”

Xana u dyondze yini eka ntokoto lowu? “Nkarhi lowu taka loko va ku hi baleka, hi ta baleka—a hi nge vutisi. Hi ta yingisa switsundzuxo. Nakambe ndzi dyondze ku hanana ni ku hanya hi swilo switsongo. Naswona ndza swi tiva leswaku ku rila a swi bihanga, u rila, kambe u va ni xivindzi xo langutana ni xiyimo xa kona.”

N’wangulo Wa Maphepha-hungu

Hambi ku ri vatsari va yi vonile ndlela leyi Timbhoni a ti hleleke ha yona. Savannah Evening Press a yi ri ni nhloko-mhaka-nkulu leyi nge “Timbhoni Ta Yehovha Ti Kuma Leswaku Ta Amukeleka eFlorida Dzonga,” naswona The Miami Herald yi te: “Timbhoni Ta Khathalelana—Ni Ku Khathalela Van’wana.” Yi te: “Vhiki leri a nga kona loyi a pfalelaka Timbhoni ta Yehovha tinyangwa le Homestead—hambi loko va ha ri na tona tinyangwa to ti pfala. Vatirhi vo tirhandzela va Timbhoni va kwalomu ka 3 000 lava humaka etikweni hinkwaro va fike endhawini leyi weriweke hi mhangu, va sungula hi ku pfuna vapfumeri-kulobye, kutani va pfuna van’wana. . . . Nhlangano wihi na wihi wa mavuthu wu nga wu navela nkhathalelo, ku landza nawu ni nhleleko ni ku humelela ka Timbhoni.”

Timbhoni ti swi toloverile ku hlela mintirho ya ku phamela ntshungu etinhlengeletanweni ni le mintsombanweni ya tona. Ku tlula kwalaho, ti hlela madzana ya Tikomiti to Aka ta Xifundzha emisaveni hinkwayo leswaku ti aka Tiholo ta Mfumo ni Tiholo letikulu ta Tinhlengeletano. Xisweswo, ti ni vatirhi lava lunghekeleke ku pfuna hi ku hatlisa loko va laveka.

Hambi swi ri tano, ku ni yinhla yin’wana—langutelo ra tona. Xiviko lexi fanaka xi te: “A ku na ku avana ka mintlawa. A ku na vutikurisi. Ematshan’wini ya sweswo, vatirhi va vonaka va tsake ngopfu naswona va ni ntirhisano ku nga khathariseki ku hisa, ku thyaka ni ku karhala ka vona.” Xana sweswo swi hlamuseriwe njhani? Mbhoni yin’wana yi hlamurile: “Leswi swi vangiwa hi vuxaka ni Xikwembu lebyi hi susumetelaka ku komba rirhandzu ra hina eka van’wana.” Sweswo a ku ri swin’wana leswi xidzedze xa Andrew xi nga kotangiki ku swi herisa, rirhandzu ra Vukreste ra Timbhoni.—Yohane 13:34, 35.

Ku fananisa kun’wana loku tsakisaka, hi leswaku Timbhoni ti vonaka ti dyondze swin’wana, eka mirhi. Mbhoni yin’wana leyi nga tivonela hi mahlo yi swi phofula hi ndlela leyi: “Loko ndzi famba-famba, ndzi xiye leswaku madzana ya mirhi leyikulu a yi simukile, yi wa. Hikwalaho ka yini? A yi khoma ngopfu moya hi vukulu bya yona naswona a yi ri ni timitsu leti hangalakeke kambe ti nga entangi. Hi hala tlhelo, mincindzu yo tala ya ku lala yi sale yi yimile. A yi voyama ni moya, yin’wana yi suke matluka ya yona, kambe yo tala a yi simukanga.”

Timbhoni a ti ri ni timitsu to enta ta ku pfumela eRitweni ra Xikwembu naswona a ti pfumelelana ni swiyimo eka leswi a ti swi endla. Nhundzu ni makaya a ku nga ri swilo swa nkoka eka tona. Kambe a ta ha hanya naswona a ti ta swi kota ku hambeta ti tirhela Yehovha handle ko kavanyetiwa. Xidzedze xa Andrew a xi va tekelanga vutomi.

Xana Swi Endlisiwa Ku Yini?

Khampani ya Anheuser Busch yi nyikele hi lori leyi taleke hi mati. Loko yi fika muchayeri u vutise vatirhela-mfumo leswaku xana mati u ta ma yisa kwihi. U byeriwe leswaku vanhu lava hlelekeke i Timbhoni ntsena. Entiyisweni, ku nga si hela vhiki, endzhaku ka loko xidzedze xa Andrew xi hlaserile, ku fike 70 wa tigolonyi to kokiwa leti a ti ri ni mimphakelo, le Holweni ya Nhlengeletano ya Fort Lauderdale ya Timbhoni ta Yehovha.

Mutirhi wo tirhandzela kwalaho wa vika: “Kutani ku fike lori leyi a yi rhwale mati. Hi hatlise hi ma hlanganisa ni swakudya leswin’wana leswi a swi ri endhawini leyi a swi aviwa ka yona eTiholweni ta Mfumo. Ma averiwe vamakwerhu ni vaakelani va ndhawu yoleyo lava a va pfumala.” Khampani ya maphepha le Mfun’weni wa Washington yi nyikele hi tipuleti ta maphepha ta 250 000.

Eku sunguleni valawuri va doroba a va rhumela vatirhi vo tinyiketa lava nga riki Timbhoni eTiholweni ta Mfumo, va ku, ‘Hi vona ntsena vanhu lava hlelekeke kahle.’ Eku heteleleni masocha ma nghenile ivi ma sungula ku yimisa tindhawu ta mphalalo wa swakudya ni mati ni ku yimisa matende.

Ndhawu yo sungula leyi Timbhoni a ti ava xilamulela-mhangu eka yona, yi sunguriwe hi komiti ya xilamulela-mhangu eHolweni ya Nhlengeletano ya Fort Lauderdale, leyi nga ekule hi 60 wa tikhilomitara ku suka endhawini leyi nga weriwa hi mhangu le Homestead. Leswaku ku hungutiwa ntirho wun’wana, ndhawu ya nkarhinyana ya ku ava xilamulela-mhangu yi simekiwile eHolweni ya Nhlengeletano ya Doroba ra Plant ekusuhi na Orlando, kwalomu ka tikhilomitara ta 400 en’walungu-vupela-dyambu bya ndhawu leyi weriweke hi mhangu. Swilo swo tala swa xilamulela-mhangu swi yisiwe kona leswaku swi ya hleriwa ni ku pakiwa. Komiti a yi kombela leswi yi swi lavaka le Dorobeni ra Plant siku na siku, naswona ku tirhisiwe tigolonyi to tala leti kokiwaka leswaku ti famba mpfhuka wa tiawara ta ntlhanu ku ya eFort Lauderdale.

Nakambe xitichi lexi xa ku ava xilamulela-mhangu xi humese swakudya, nhundzu, mati, tijanaretara ni swilaveko swin’wana swi ya eka Tiholo ta Mfumo tinharhu leti pfuxiweke exikarhi ka ndhawu leyi weriweke hi mhangu. Kona, Timbhoni leti nga ni vutihlamuleri ti hlele mintlawa ya ku aka ni ya ku basisa leswaku yi ya eka makaya ya madzana lawa a ma lava ku pfuniwa. Ku tlhele ku pfuriwa ni switanga ni vuphamelelo bya swakudya eswivandleni swa Tiholo ta Mfumo, naswona un’wana ni un’wana a amukelekile ku kuma mpfuno. Hambi ku ri masocha man’wana ma dyele kona swakudya kutani loko ma heta ma hoxe minyikelo emabokisini ya kona.

Loko vavanuna va ri karhi va lunghisa tiyindlu, vavasati van’wana a va pfa va sweka swakudya. Van’wana a va endzela vanhu vahi ni vahi lava va nga va kumaka leswaku va va byela leswi Bibele yi swi vulaka malunghana ni timhangu ta ntumbuluko ni ku yisa mabokisi ya xilamulela-mhangu eka lava pfumalaka. Un’wana wa vona a ku ri Teresa Pereda. Kaya rakwe a ri onhakile, naswona mafasitere ya movha ya yena a ma fayekile—kambe movha leyi a yi rhwele mabokisi ya xilamulela-mhangu leswaku a famba na wona eka vaakelani. Nuna wakwe, Lazaro, a a tirha eka yin’wana ya Tiholo ta Mfumo.—Eklesiasta 9:11; Luka 21:11, 25.

Vunyingi bya lava nga riki na makaya, byi kume byetlelo byin’wana emakaya ya Timbhoni lama nga khumbiwangiki hi xidzedze xa Andrew. Van’wana a va tshama eka tikharavhani leti va nga ti lomba kumbe leti lunghiseleriweke ku pfuna. Van’wana va ye ematendeni lawa a ma dzimiwe hi masocha. Van’wana va tshike makaya ya vona kutani va ya tshama ni vanghana ni maxaka ya le ka swiphemu swin’wana swa tiko rero. A va nga ri na makaya ni mintirho. A ku nga ri na gezi, mati ni fambiselo xa nkululo—kutani va va pfunile swinene.

Dyondzo yin’wana leyi va yi dyondzeke yi hlamuseriwe kahle hi Mbhoni leyi vulavulaka Xipaniya: “Hi khensa swinene hi dyondzo leyi hi nga yi dyondza malunghana ni tipakani ta hina evuton’wini. Hikuva u nga tirha malembe ya 15 kumbe ya 20 u aka kaya ra wena, u hlengeleta swilo leswi vonakaka, kutani hi awara yin’we swi nga va swi herile hinkwaswo. Leswi swi hi pfuna leswaku hi tiva tipakani ta hina ta moya, leswaku hi olovisa vutomi, hi ehleketa hi ku tirhela Yehovha ntsena.”

Swi fana ni leswi muapostola Pawulo a nga swi vula: “Kambe leswi a ndzi tiseketela ngopfu hi swona, ndzi swi langutile swi ri leswi swi nga pfuniki nchumu eka mina hikwalaho ka Kriste. Ku nga ri swona ntsena: Ndzi tekile hinkwaswo swi ri leswi nga pfuniki nchumu, loko swi ringanisiwa ni risima leri tlulaka hinkwaswo ra ku tiva Kriste Yesu Hosi ya mina. Hikwalaho ka yena, ndzi fularhele hinkwaswo ndzi swi vona swi ri thyaka ntsena, leswaku ndzi ta kuma Kriste.”—Vafilipiya 3:7, 8.

Timhangu ta ntumbuluko i xiphemu xa vutomi bya misava ya hina ya sweswi. Loko hi yingisa switsundzuxo swa valawuri, hi nga byi ponisanyana vutomi bya hina. Kumbexana hi nga lahlekeriwa hi makaya ni nhundzu, kambe vuxaka bya Vukreste ni “Xikwembu [xa] ku chavelela hinkwako” byi fanele ku tiyisiwa. Hambi loko van’wana va fa emhangwini, Yesu u tshembise leswaku va ta pfuxiwa emisaveni leyintshwa ya Xikwembu, eka misava leyi pfuxetiweke—misava leyi nga ta pfumala vusiwana ni ku fa loku vangiwaka hi timhangu ta ntumbuluko.—2 Vakorinto 1:3, 4; Esaya 11:9; Yohane 5:28, 29; Nhlavutelo 21:3, 4.

[Nhlamuselo ya le hansi]

[Bokisi leri nga eka tluka 19]

A Va Hlamale Ngopfu

Ntlawa wa Timbhoni ta 11 ta valungu wu fambe ku suka le Tampa, eFlorida, wu ya pfuna entirhweni wa xilamulela-mhangu. Va kume nhundzu ya ku tirha ha yona kutani va sungula ku pfuxeta lwangu ra Mbhoni yin’wana ya muntima. Loko ku fika ntukulu wakwe la nga riki Mbhoni, a vona onge wo lorha hi leswi a a swi vona—a hlamale ngopfu hi ku vona leswaku ku fike ntlawa wa Timbhoni ta valungu yena a nga si fika, naswona a wu pfuxa kaya ra malume wakwe. A nyanyuke ngopfu lerova a pfuneta eku akeni.

U vule leswaku nkarhi lowu landzelaka loko Timbhoni ti fika ekaya rakwe, u ta kombela dyondzo ya Bibele. Loko a ri karhi a vulavula ni ntlawa wa le Tampa, ku kumeke leswaku va huma eka ndhawu yin’we. Handle ko hlwela un’wana wa vakulu eka ntlawa wolowo u endle malunghiselelo ya dyondzo ya Bibele vhiki leri tlhandlameke! Hi laha Mbhoni yin’wana yi nga vula ha kona, leswi swi komba leswaku a hi xikolokolo ku gongondza enyangweni leswaku hi veka vumbhoni—hi nga gogondza ni le lwangwini!

[Swifaniso leswi nga eka tluka 15]

Xidzedze xa Andrew a xi tshikanga nchumu, i miako yitsongo leyi nga yima yi tiyile

Yindlu ya ka Kieffer leyi kokekaka—ni swilo leswi saleke

[Swifaniso leswi nga eka tluka 16]

Rebecca Pérez, vanhwanyana vakwe ni van’wana va 11 va ponele eka ndhawu leyi leyitsongo

Masocha ma pfunetile leswaku ma sivela ku phanga (ehenhla exineneni); switolo leswi phangeriweke (exineneni)

Xidzedze xi hahlule malwangu, ni timovha ti wile

[Swifaniso leswi nga eka tluka 17]

Mphalalo a wu hleriwa eTiholweni ta Mfumo

Tindlu leti kokekaka a ti hakamele eswihlahleni; swilo swo tlangisa swa n’wana swi sale swoxe emubedweni; tibuku ta Bibele exikarhi ka makhukhumba; Timbhoni to tanihi Teresa Pereda, ti yise swilo eka vaakelani

Swilo swo aka leswi ku hlengiweke ha swona. Ku ava swiambalo

[Xifaniso lexi nga eka tluka 18]

Vatirhi vo tirhandzela lava humaka eUnited States hinkwaro va pfunetile entirhweni wa xilamulela-mhangu