Loyi A Nga Ta Sirhelela Swiharhi Swa Hina
EKU sunguleni ka matimu ya vanhu, munhu u tsakele ku dyondza swiharhi. Kambe lexi khomisaka gome, endzhaku ka loko Xikwembu xi nyike munhu mpfumelelo wo dya nyama, ku rhandziwa ka swiharhi ku hungutekile ivi va sungula ku swi dlaya handle ka xivangelo ni ku lava swirho swo karhi swa swiharhi.—Genesa 2:19, 20; 9:2; 10:9; 25:27.
Kambe vanhu van’wana va ye emahlweni va hlamarisiwa hi swiharhi swa misava. Kwalomu ka malembe ya 3 000 lama hundzeke, marito ya Pisalema 104 ma tsariwe hi murhandzi wa swiharhi. U vule mavito ya swivumbiwa swo hambana-hambana swo tanihi timangwa, tinghala, tintshembe ta le tintshaveni, timbila na magumba. Loko a dyondze tinyanyana, miloti ya tinyanyana na swivandzana, mupisalema u susumeteleke ku dzunisa a ku: ‘[Yehovha u] swi endlile hinkwaswo hi vutlharhi.’—Pisalema 104:10-12, 17-21, 24.
Hakunene Yehovha Xikwembu wa tsakisiwa hi mintirho yakwe yo saseka yo tumbuluxa. (Genesa 1:31) Xisweswo, hi nga tiyiseka leswaku a nge pfumeleli leswaku swiharhi leswi saleke la misaveni swi lovisiwa hinkwaswo. Mayelana ni sweswo, Xikwembu xi huhutele mupisalema leswaku a rhekhoda marungula lama nga ta va mahungu lamanene eka varhandzi va swiharhi hinkwavo. Hi byeriwa leswaku “misav̌a . . . yi nga ka yi nga ṭekaṭeki ni siku riṅwe.” (Pisalema 104:5) Entiyisweni, nkhathalelo wolowo wa ku hlayiseka ka pulanete leyi wu katsa ni swivumbiwa leswi hanyaka eka yona. (Esaya 45:18) Yesu Kreste u tiyisekise ku khumbeka ka Xikwembu hi swivumbiwa loko a te: “Xana swidzingiri swa ntlhanu a swi xaviwi hi tisente timbirhi xana? Kasi a ku na xin’we xa swona lexi rivariweke emahlweni ka Xikwembu.” (Luka 12:6) Nakambe ku khathalela ka Xikwembu swivumbiwa ku kombisiwe eka Pisalema 104, ndzimana 14, leyi nge: “O mirisela tihomu e byanyi, ni v̌anhu e timbewu le’ti v̌a lulamelaka. O humesa ŝeŝo e v̌uša e misav̌eni.”
Ku pfumelelana na tinhla leti, Yehovha Xikwembu a nge va pfumeleli hi laha ku nga heriki vanhu lava n’wi kanetaka ni lava xungetaka vumundzuku bya misava na swiharhi swa yona. Loko yi kandziyisa mhaka leyi, Pisalema 104 yi gimeta hi marito lawa lama khutazaka: “V̌adyohi a v̌a lov̌ele misav̌eni, la’v̌o biha . . . v̌a nga ha v̌i kona!”—Pisalema 104:35.
Mawaku nchavelelo wa ku tiva leswaku Xikwembu xi vule ku tiyimisela ka xona ko “herisa lava herisaka misava.” (Nhlavutelo 11:18) Enkarhini wolowo vuprofeta lebyi sweswi byi hetisekaka hi ndlela yo fanekisela byi ta hetiseka hi xiviri. Hi xikombiso hi ku tirhisa muprofeta wakwe Hosiya, Yehova Xikwembu u ri: “Kambe hi siku lero, nḍi ta v̌a endlela ntwanano ni ŝihari ŝa nhov̌a, ni tinyanana ta tilo, ni le’ŝi kokovaka e misav̌eni, kutani nḍi ta ṭhov̌a v̌ura ni tlhari, nḍi v̌a nḍi herisa ku lwa e misav̌eni, kutani nḍi v̌a akisa hi ku rula.”—Hosiya 2:18; Esaya 11:6-9.
Anakanya u ri eParadeyisini yoleyo leyi taka laha misaveni. Mawaku ndlela leyi yi nga ta tsakisa ha yona! U nga ha tivutisa: ‘Kambe ku laveka yini leswaku ndzi ta kuma mikateko yo tano?’ Xo sungula, ku laveka leswaku u dyondza Rito ra Xikwembu. Kutani, eka lava yingisaka swiletelo swa Bibele, Yehovha Xikwembu u va nyika xitshembiso lexi xo hlamarisa: “La’v̌o lulama v̌a ta fuma misav̌a, v̌a ta ṭhama ka yona hi masiku.”—Pisalema 37:29.