Swiharhi Swi Hunguteke Hi 73 Wa Tiphesente Hi Malembe Ya 50 Ntsena—⁠Xana Bibele Yi Ri Yini Hi Mhaka Leyi?

Hi October 9 2024, ndzawulo ya World Wildlife Fund yi humese xiviko xo vava hi vuyelo lebyi tisiweke hi swiendlo swa vanhu eka swiharhi swa nhova. Xiviko xexo xi vule leswaku “emalembeni ya 50 lama hundzeke (1970-2020), nhlayo ya swiharhi yi hunguteke hi 73 wa tiphesente.” Xiviko xi ri: “A hi hundzeleti loko hi vula leswaku leswi nga ta endleka emalembeni ya ntlhanu lama taka, swi ta kombisa ndlela leyi vumundzuku byi nga va xiswona laha misaveni.”

Swiviko swo tano swi tsema vanhu vo tala nhlana. Hi yi rhandza swinene pulanete ya hina yo xonga naswona a hi swi lavi ku vona swiharhi swi xaniseka. Hi titwa tano hikuva Xikwembu xi lava leswaku hi khathalela swiharhi.—Genesa 1:27, 28; Swivuriso 12:10.

Sweswo swi nga endla u tivutisa leswi, ‘Xana hi ta kala hi swi kota ku sirhelela swiharhi? Bibele yi ri yini hi mhaka leyi?’

Ntshembo hi vumundzuku

Swi nga ri na mhaka leswaku hi ringeta ku fikela kwihi ku sirhelela swiharhi, vumundzuku bya swona byi le mavokweni ya Xikwembu, ku nga ri ya hina. Bibele yi vule ka ha ri emahlweni eka Nhlavutelo 11:18 leswaku Xikwembu xi ta “lovisa lava onhaka misava.” Tsalwa rero ri hi dyondzisa swilo swimbirhi:

1. 1. Xikwembu xi ta sivela vanhu leswaku va nga yi onhi misava hi ku helela.

2. 2. Xikwembu xi ta teka goza ku nga ri khale. Hi swi tiva njhani sweswo? Sweswi swiharhi swi le khombyeni ro herisiwa hi vanhu ku tlula enkarhini lowu nga hundza.

Xikwembu xi ta xi tlhantlha njhani xiphiqo lexi? Xi ta tirhisa Mfumo wa xona lowu ku nga hulumendhe ya le tilweni leswaku wu fuma misava hinkwayo. (Matewu 6:10) Mfumo wolowo wu ta dyondzisa vanhu ni ku tlhela wu va letela tindlela to hlayisa swiharhi laha misaveni.—Esaya 11:9.