Xana Xikwembu Xi Ni Lava Xi Va Seketelaka eMintlangweni?

XITSUTSUMI lexi humeleleke xi khinsama hi matsolo ivi xi khongela, xi nkhensa hi leswi xi hluleke. Hambi swi ri tano, hi fanele hi tsundzuka leswaku switsutsumi swin’wana emphikizanweni naswona swi khongele eka Xikwembu leswaku swi hlula—kambe swi hluriwile.

Vabi va xibakele vambirhi va khinsama etikhonweni timbirhi leti langutaneke ta dada ra xibakela, rhengu ro sungula ra nyimpi ya vona ri nga si sungula. Havambirhi va tiba xihambano, ku nga ku khongela u miyerile eka Xikwembu leswaku u hlula. Kutani lon’wana a hlula luya un’wana. Eka nyimpi yin’wana, ku nga ha va mulwi un’we loyi a kombelaka eka Xikwembu leswaku a hlula, kambe ku kumeka leswaku hi yena a hluriwaka ko tala.

Eswipanweni swa mintlango, mintlawa ya vatlangi yi nga ha khongela ku nga si sungula ntlango, kumbe exikarhi ka ntlango, kumbe loko ntlango wu herile. Hi xikombiso, eka tisekene to hetelela ta ntlango wa bolo wa American Super Bowl, mutlangi a lulamele ku raha bolo leyi a yi ta endla leswaku xipano xakwe xi humelela loko a yi howisa, kumbe xi hluriwa loko a nga yi howisi. Endzhakunyana mutlangi u te: “A ndzi khongelela leswaku yi nghena.” Kambe vatlangi van’wana va xipano lexi a va tlanga na xona a va khongelela—leswaku yi nga ngheni.

Hambi loko swipano haswimbirhi swi nga khongela, xin’we xi fanele xi hluriwa. Hambi ku ri xipano lexi humeleleke lexi vatlangi va xona va khongeleleke ku hlula xi nga ha lahlekeriwa hi ntlango lowu landzelaka. Hakunene, eku heteleleni, loko nkarhi lowu vekeriweke mintlango wu hela, swipano swin’wana hinkwaswo swi fanele swi hluriwa, hikuva ku fanele ku va na nghwazi yin’we eka swipano hinkwaswo leswi nga le ka xiyenge xin’we. Kambe, swo tala swa swipano leswo swi hluriweke swi na vatlangi lava khongeleleke ku hlula.

Eka xihloko lexi nga ni nhloko-mhaka leyi nge “Ponisa Lava Ku Khongelaka, Ha Kombela,” mutsari wa phepha-hungu ra mintlango u tsale a ku: “Manyunyu ni vuhawu bya wena bya leswaku u nakulobye lonkulu wa Xikwembu a swi vuli swona leswaku u yena hakunene. . . . ENyimpini ya Vumbirhi ya Misava, masocha ya Jarimani a ma ri na xivulwa lexi tsariweke eswikhweketweni swa mavamba ya wona, lexi nge: Gott mit uns. Ku hundzuluxela: ‘Xikwembu xi na hina.’” Mutsari un’wana wa maphepha-hungu ya mintlango wa xiya: “Xikwembu a xi yi seketeli mintlango ya bolo. Timhaka ta misava to fana ni leti ti ahluriwa hi vavanuna ni vavasati, hayi N’wini wa Matimba Hinkwawo.”

Muapostola Petro u tsarile: “Xikwembu a xi yi hi nghohe; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.” Ku hlanganyela eka madzolonga ya mintlango a hi ku “endla leswi lulameke.” (Mintirho 10:34, 35; Varhoma 14:19) Loko Xikwembu a xi yingisela swikhongelo swa lava kombelaka ku hlula ivi un’wana wa lava va phikizanaka na vona a vavisiwa kumbe hambi ku ri ku dlayiwa, xana Xikwembu a xi ta vekiwa nandzu?

Rito ra Xikwembu ri ri: “Loko hi kombela leŝi ranḍiwaka hi šona, xa hi yingisa.” (1 Yohane 5:14) Leswaku swikhongelo swa hina swi ta hlamuriwa, hi fanele hi tiva ku rhandza ka Xikwembu ni swikongomelo swa xona, naswona mintirho ya hina yi fanele yi fambisana na swona.—Ringanisa Matewu 6:9, 10.

E-e, swikongomelo swa Xikwembu ni ku rhandza ka xona a swi fambisani ni swiendlakalo swa le mintlangweni. Xisweswo, loko ku endliwa swikhongelo swa ku hlula emintlangweni, xana Xikwembu xa yingisela? Handle ko kanakana a xi yingiseli.

[Laha Xifaniso Xi Humaka Kona eka tluka 31]

UPI/Bettmann