Vantswa Va Vutisa . . .

Ku Vuriwa Yini Hi Loko Ndzi Rhandza La Nga Riki Mupfumeri?

“Ndzi ni xiphiqo,” ku pfumela nhwanyana un’wana wa Mukreste. “Ndzi kokiwa hi muakelani wa mina. U ni tintswalo, u ni mahanyelo lamanene naswona wa anakanyela, kambe ku na nchumu lowu a nga riki wona—murhandzi wa Yehovha. Ndza swi tiva leswaku a swi fanelanga leswaku ndzi n’wi rhandza hi ndlela leyi, kambe a ndzi tiyiseki kahle leswaku ndzi nga yi lawurisa ku yini mintlhaveko ya mina hi yena.”

Mark a ri na 14 wa malembe loko a tikuma a ri eka xiyimo lexi fanaka.a U sungule ku kokiwa hi nhwanyana loyi a nga ri na mintshembo ya vukhongeri lebyi fanaka ni bya yena. U ri: “Hakanyingi a ndzi tikuma ndzi lorha ri lo hosi, hi ndlela leyi swi nga ta va ha yona loko hi tekanile. Kambe a ndzi swi tiva leswaku swi hoxile.”

KU KOKEKA swi tolovelekile, emalembeni ya kondlo-a-ndzi-dyi, hi nkarhi lowu minsusumeto ya rirhandzu yi nga yikulu swinene. (Ringanisa 1 Vakorinto 7:36.) Hikwalaho ka leswi va nga riki na laha va nga humeselaka mintlhaveko yoleyo kona, vantshwa va ni mboyamelo wo kokiwa hi vadyondzisi lava va va rhandzaka, vahungasi, ni van’wana vo kota volavo. Tanihi leswi vuxaka byo tala bya munhu ni vanhu vo tano lavakulu, byi nga kotekiki, ku kokeka loku a ku heti nkarhi wo leha naswona a ku na khombo ro karhi.b Hambi swi ri tano, ku vuriwa yini hi loko u ri ni mintlhaveko leyikulu hi ntangha ya wena—munhu loyi a swi lavaka naswona u swi kotaka ku endla xinghana na yena—kambe ntsena munhu yoloye a nga na mimpimanyeto leyi fanaka ni ya wena ya vukhongeri?

Van’wana va nga ha swi vona swi nga ri na xihoxo. Ntiyiso hi leswaku, vantshwa vo tala va nga ha tsakela vukhongeri switsongo. Naswona hambi ku ri eka lava byi tsakelaka, ku gangisana ni un’wana wa ripfumelo leri hambaneke swi nga ha va swi nga langutiwi swi bihile minkarhi hinkwayo. Lava va nge tiendlele leswi laviwaka hi wena va nga ha swi amukela. Hambi leswi vanhu vo tala lavakulu va vonaka swiphiqo leswi nga ha vaka kona eka vuxaka byo tano, tanihi leswi hakanyingi byi hetelelaka hi vukati. Xisweswo mutsari Andrea Eagan u tsundzuxe vantshwa: “Ku va mi kurisiwe evukhongerini byin’we a hi swa nkoka loko exikarhi ka n’wina ku ri hava la rhandzaka vukhongeri. Kambe loko vukhongeri byi ri bya nkoka eka un’we kumbe hinkwenu ka n’wina, kutani ku hambana hi vukhongeri swi fanele swi tekeriwa enhlokweni. . . . A swi bohi leswaku mi fana etimhakeni ta vukhongeri . . . , kambe mi fanele mi kota ku hanyisana.”

Xitsundzuxo xo tano xi nga ha vonaka xi twala. Kambe entiyisweni xi komba “vutlhari bya misava leyi.” (1 Vakorinto 3:19) Bibele yi kombisa leswaku ku rhandzana ka mupfumeri ni la nga riki mupfumeri ku katsa timhaka leti nga ta nkoka swinene ku tlula ku fanelana evukatini. Vantshwa va Timbhoni ta Yehovha va swi tiva leswaku leswi i ku nga yingisi Rito ra Xikwembu, leri khutazaka Vakreste ku tekana “ntsena . . . hilaha Hosi yi swi rhandzaka hakona.” (1 Vakorinto 7:39) Tanihi leswi ku gangisana ku nga riki mhaka ya ku hungasa ntsena kambe ku nga masungulo lama yisaka evukatini, swi nge xi tsakisi Xikwembu loko un’wana wa malandza ya xona a rhandzana ni un’wana loyi a nga nyiketelangiki vutomi bya yena eka Yehovha.

Hambi swi ri tano, vantshwa van’wana va Timbhoni va tikume va kokiwa hi lava nga riki vapfumeri. Xana leswi swi endlekisa ku yini? Xana u fanele u endla yini loko u tikuma u ri eka xiyimo xo tano?

Ndlela Leyi Swi Endlekaka Ha Yona

Xo sungula, xiya leswaku vanhu hinkwavo va ni mboyamelo wo endla swihoxo. “I mani l’a tiv̌aka ku hoša ka yena šana?” ku vutise mupisalema. (Pisalema 19:12) Vantshwa kahle-kahle va ni mboyamelo wo endla swihoxo etimhakeni ta ku rhandzana. Ha yini? Hikwalaho ka xivangelo xo olova xa leswaku a va na vutlhari lebyi kumiwaka hi ntokoto ni ku kula. (Swivuriso 1:4) Hikwalaho ko va ni ntokoto wutsongo hi ku hanyisana ni va rimbewu leri hambaneke, muntshwa wa Mukreste a nga ha va a nga yi tivi ndlela yo langutana ni ku kokiwa hi tlhelo ra rirhandzu—kumbe ku laviwa.

Leswi swi ve tano eka Sheila loko a xiye leswaku mudyondzi-kulobye exikolweni a kokiwa hi yena. “A ndzi swi vona leswaku wa ndzi rhandza,” ku vula Sheila. “Hi nkarhi wa swakudya a ta a ta dya na mina. Hi nkarhi wa ku hlaya le layiburari, a ndzi lava-lava.” Mintlhaveko ya Sheila hi mufana loyi yi sungule ku kula. Mark, la boxiweke eku sunguleni, na yena hi ku fanana wa tsundzuka: “Minkarhi hinkwayo a ndzi hamba ndzi vona nhwanyana loyi hi nkarhi wa vutiolori. A a endla matshalatshala leswaku a ta laha ndzi nga kona a ta vulavula na mina. Vunghana a byi hlwelanga.” Emhakeni ya Pam wa malembe ya 14, mufana wa laha a tshamaka kona u kale a n’wi nyika ni xingwavila tanihi xikombiso xa rirhandzu rakwe.

Entiyisweni, a hi minkarhi hinkwayo laha Mbhoni yi teriwaka hi munhu ntsena. Nhwanyana un’wana yena a a tlherisela ku tsakela loku nge rivaleni loku kombisiweke hi mufana wa Mukreste la vitaniwaka Jim. Hambi swi ri tano, u boheke ku pfumela leswi a swi endleke loko siku rin’wana nhwanyana loyi a te eHolweni ya Mfumo ya Timbhoni ta Yehovha, a n’wi lava!

Ku nga khathariseki leswaku swiyimo hi swihi, u nga ha va u swi tiva leswaku a swi hoxile ku endla sweswo. Kambe minkarhi yin’wana swa tika ku ala ndlela leyi va rimbewu leri hambaneke va endlaka ha yona. Xiya Andrew. Hi lembe rakwe ro sungula exikolweni xa le henhla, vatswari va yena a va lunghiselela ku dlaya vukati. “A ndzi lava loyi ndzi nga vulavulaka na yena,” wa tsundzuka. Nhwanyana un’wana exikolweni u tikombe a ri na nhlamulo leyi khutazaka nkarhi hinkwawo. Hi ku hatlisa mintlhaveko ya rirhandzu yi sungurile.

Makhombo

Loko mintlhaveko yo tano yi tshikiwa yi nga endliwi nchumu, yi nga ku hoxa ekhombyeni. Swivuriso 6:27 yi ri: “Šana munhu a nga okela makala e šifuv̌eni, tinguv̌u ta yena ti nga tŝhi-ke?” Hi xikombiso, xiya mhaka ya nhwanyana la vitaniwaka Kim. Hambi leswi a kurisiweke tanihi Mukreste, u tipfumelele ku rhandza mufana wa le xikolweni. “A a ri un’wana wa vafana lava dumeke ni lava nyanyulaka swinene exikolweni,” Kim wa tsundzuka. Hi ku hatlisa u sungule ku nyenga a ya eswinkhubyanini leswi ku tirhisiwaka swidzidzirisi hi ku tshunxeka. “A swi ndzi chavisa swinene, kambe a ndzi n’wi rhandza swinene. Ndzi ve ni nyimba.” Kim u tekane ni xigangu xakwe, kambe xi hetelele xi ri ekhotsweni hikwalaho ka vukhamba ni ku va xi hlomile. Nakambe xitsundzuxo xa Bibele xi tikombe xi tiyisile: “Vanghana lavo biha, va borisa mikhuva leyinene.”—1 Vakorinto 15:33.

Leswi a swi vuli leswaku vantshwa hinkwavo lava nga riki Timbhoni ta Yehovha va ni mahanyelo yo biha kumbe va tirhisa swidzidzirisi. Hambi swi ri tano, hinkwavo vantshwa vo tano, a va na mimpimanyeto, mavonelo, kumbe tipakani leti fanaka ni ta vantshwa lava nga Timbhoni. Vakorinto vo Sungula 2:14 yi hlamusela leswaku la nga riki mupfumeri kahle-kahle “a nga amukeri swa Moya wa Xikwembu, hikuva eka yena i vuhunguki; kutani wa hluleka ku swi twisisa, hikuva swi fanele ku avanyisiwa hi Moya.” Anakanya hi ndlela leyi mimpimanyeto ya vukhongeri bya wena yi nga vumba mintlhaveko ya wena ha kona—ntsako lowu u wu kumaka eminhlanganweni ya Vukreste, ntsako wa ku avelana rungula ra Bibele ni munhu la ri amukelaka, ntsako wa ku dyondza Bibele hi yoxe. Xana munhu la nga pfumeriki a nga yi twisisa—hambi ku va na yona—mintlhaveko yo tano? A hi kanyingi.

Hikwalaho Pawulo u khutaze Vakreste: “Mi nga rhwaleni mpingu wun’we ni lava nga riki vapfumeri; hikuva ku tirhisana ku kwihi exikarhi ka ku lulama ni ku homboloka xana? Kumbe ku vonakala ku ni ku yelana kwihi ni munyama ke? Xana Kriste na Lowo biha, va nga hela hi ku twanana xana? Kumbe mupfumeri a nga fambelana hi mukhuva wihi ni loyi a nga riki mupfumeri xana?” (2 Vakorinto 6:14, 15) Sonya lontsongo u dyondze leswi hi xiviri loko a sungule ku rhandza munhu la nga riki mupfumeri. Wa pfumela: “Ku va ni munghana la nga hisekeriki nchumu lowu u wu hisekelaka naswona la nga rhandziki Yehovha i nchumu lowu vangaka xivundza lexikulu swinene. Swa vavisa emintlhavekweni. Loko ntiyiso wu ri nchumu lowu ku susumetaka evuton’wini bya wena, mi boheka ku va eka wona hinkwenu—sweswo swo boha! I nchumu lowu twisaka ku vava swinene loko u nga koti ku avelana wona ni munghana wa wena hikuva u ni munhu la nga pfumeriki.”

Kutani ke, eka vuxaka byo tano, hakanyingi vukhongeri byi hundzuka nchumu lowu mi lwisaka, ematshan’wini yo va nchumu lowu mi hlanganisaka. U nga ha titwa u boheka ku honisa mimpimanyeto ya wena ya moya leswaku ku va ni ku rhula. Kambe ku endla sweswo swi to onha vumoya bya wena ntsena. Wansati un’wana lontshwa wa hlamusela: “Ndzi tolovelane swinene ni jaha leri a ri nga ri Mbhoni. Kambe loko vuxaka byi ya byi kula, ndzi xiye leswaku a ndzi n’wi rhandza. Hakatsongo-tsongo vuxaka bya mina na Yehovha byi sungule ku nga ha vi bya nkoka eka mina; vuxaka bya mina ni jaha leri byi ve nchumu wa nkoka ku tlurisa eka mina. A ndzi nga ha lavi ku ya eminhlanganweni, ku hlanganyela ni vamakwerhu va Vakreste, kumbe ku ya entirhweni wo chumayela. Lexi a ndzi xi lava a ku ri ku tshama na yena. Malembe mambirhi lama landzeleke ndzi ve Mbhoni leyi holeke. Naswona nkarhi wolowo hinkwawo, ‘munghana’ wa mina a nga kalanga a tlherisela rirhandzu ra mina. A ndzi hamba ndzi ehleketa leswaku siku rin’wana u ta kala a ndzi rhandza, kambe sweswo a swi kalanga swi humelela.”

Ina, ku tolovelana ni munhu loyi a nga riki na vukhongeri ni mimpimanyeto leyi fanaka ni ya wena swi ta ku tisela nhlomulo ni maxangu. Ndlela ya vutlharhi i ku tshika ku tolovelana ko tano. Kambe xana u nga swi endlisa ku yini sweswo loko u twa u rhandza munhu swinene? Leyi i mhaka ya xihloko lexi landzelaka eka nongonoko lowu.

[Tinhlamuselo ta le hansi]

[Xifaniso lexi nga eka tluka 27]

Xana munhu la nga pfumeriki a nga hisekela timhaka ta moya ku kota wena?