Vutomi Lebyi Nga Riki Na Switlhavi Byi Le Kusuhi!

XIVUMBEKO xa mafambiselo ya miri lexi rharhanganeke, lexi hi sivelaka ku twa ku vava hakunene xa hlamarisa. Ku dyondza ha wona ku fanele ku hi susumetela ku dzunisa Muvumbi, kukotisa mupisalema wa Bibele la tsaleke a ku: “Nḍa ku nkhensa hikwalaho ka mahlori ya šiv̌umbeko ša mina.” (Pisalema 139:14) Entiyisweni, i Xikwembu ntsena lexi nga endlaka leswaku ku va ni vutomi lebyi nga riki na xitlhavi! Kambe xana swi ta endlisiwa ku yini leswi?

Xiya leswaku emahlweni ka xitshembiso xa ku herisiwa ka ku vaviseka ni mihloti, Bibele yi vulavula hi “tilo lerintshwa ni misava leyintshwa, hikuva tilo lero sungula ni misava leyo sungula a swi hundzile.” (Nhlavutelo 21:1, 4) I ntiyiso, Bibele a yi vulavuli hi leswaku tilo ni misava ya xiviri swi ta hundza. Ku ri na sweswo, hi ku komisa yi vulavula hi leswaku ku ta va ni fambiselo lerintshwa ra swilo hi ku helela leri nga ta siva leri nga kona sweswi. Ina, hulumendhe leyintshwa ya munhu la nga ni matimba yo tlula ya ntumbuluko yi ta endla leswaku swi koteka ku tiphina hi vutomi lebyi nga riki na switlhavi kona kwala misaveni.

Loko Bibele yi hlamusela hi hulumendhe leyi, yi vula leswaku “Šikwembu ša matiko ši ta pfuša ku fuma [kumbe, hulumendhe] lo’ku nga . . . ta seletela ni ku herisa ku fuma kuloku hikwako, kambe kona ku ta v̌a kona hi laha ku nga riki na makumu.” (Daniyele 2:44) Loko Yesu Kreste a ri emisaveni, u hi dyondzise ku khongelela hulumendhe ya Mfumo lowu loko a ku: “N’wina khongelani mi ku: Tata wa hina la nga ematilweni, vito ra wena a ri Hlawulekisiwe. Mfumo wa wena a wu te. Ku rhandza ka wena a ku endliwe emisaveni, tanihi loko ku endliwa etilweni.”—Matewu 6:9, 10, King James Version.

Kutani ke, xana ku hetiseka ka xikhongelo xolexo ku nga vula ku ta ka vutomi lebyi nga riki na switlhavi eka wena hi ndlela yihi?

Mufumi La Nga Ni Matimba Lama Tlulaka Ya Ntumbuluko

Mhaka-nkulu yi le ka vutlharhi ni matimba ya loyi Xikwembu xi nga n’wi hlawula leswaku a rhangela hulumendhe ya xona. Yoloye i Yesu Kreste hi yexe. Vuprofeta bya Bibele loko byi vulavula ha yena byi ri: “Hulumendhe yi ta vekiwa ekatleni ra yena . . . Loko hulumendhe ya yena yi ya yi kula ku rhula ku ta va kona hi laha ku nga heriki.”—Esaya 9:6, 7, KJ.

Vutlharhi bya Yesu, loyi sweswi a nga etilweni, byi tlula kule bya vadokodela va le misaveni hinkwavo. U twisisa matirhelo ya miri wa nyama hi ku helela, ku katsa ni mafambiselo ya wona ya ku tisirhelela eka ku vaviseka. Loko a ha ri munhu emisaveni malembe lama tlulaka 1 900 lama hundzeke, a ku nga ri na vuvabyi kumbe ku vaviseka ko karhi loku a a tsandzeka ku ku horisa. Xisweswo u kombise leswi a nga ta swi endla hi xitalo tanihi Mufumi wa Mfumo wa Xikwembu. Eka khamba rin’wana, Bibele yi ri:

“Mintshungu leyikulu yi ta ka yena, yi ri ni lavo khwita, ni swilema, ni lavo-fe-mahlo, ni timbheveve, ni van’wana lavo tala; yi va veka emilengeni ya Yesu, kutani a va hanyisa. Mintshungu yi hlamala loko yi vona timbheveve ti vulavula, ni swilema swi hanyisiwa, ni lavo khwita va famba, ni lavo-fe-mahlo va vona.” (Matewu 15:30, 31) Eka mavabyi lawa Yesu a nga ta ma horisa hi nkarhi wa ku fuma ka Mfumo wakwe ku katsiwa ni lexi chavisaka swinene, xitlhavi lexi tshamaka hi masiku.

Entiyisweni, vona ndlela leyi swi nga ta va swinene ha yona! Naswona a swi nge endleriwi va nga ri vangani ntsena. Xitshembiso xa Muvumbi xi ri: “A ku nga v̌i na munhu l’a akeke . . . l’a nga ta ku: nḍa v̌abya!” (Esaya 33:24) Kutani loko se ku fuma Mfumo wa Xikwembu, xitshembiso lexi xi ta hetiseka, “ku vaviseka a [ku] nga ha vi kona.”—Nhlavutelo 21:4.

Ehansi ka ku fuma ka Mfumo wa Kreste lowo kwetsima, matirhelo yo tala ya miri wa hina, ku katsa ni lama hi sirheletaka eka ku vaviseka, ya ta tirha hi ku hetiseka hikuva xidyoho lexi kumiweke hi ndzhaka xi ta va xi susiwile. Xitsundzuxo xa xitlhavi xa le mirini wa hina a xi nge he hundzuki muxanisi. Lexi tsakisaka, hi ku ya hi vuprofeta bya Bibele lebyi hetisekaka sweswi, hi le kusuhi swinene ni misava yoleyo leyintshwa, laha ku vaviseka ku nga taka ku nga ha hi xanisi.—Matewu 24:3-14, 36-39; 2 Timotiya 3:1-5; 2 Petro 3:11-13.

U nga tiphina hi vutomi ehansi ka Mfumo wa Xikwembu loko muxaka wa ku vaviseka loku namuntlha ku xanisaka timiliyoni ku ta va ku nga ha ri kona. Kambe u fanele ku endla swin’wana. Yesu Kreste u vulavule hi xilaveko-nkulu loko exikhongelweni xakwe eka Xikwembu a te: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kreste loyi u n’wi rhumeke.”—Yohane 17:3.

Timbhoni ta Yehovha ti ta tsakela ku ku pfuna ku kuma vutivi lebyi bya nkoka. Kombela wun’we wa vona endhawini ya ka n’wina, kumbe u tsalela vakandziyisi va magazini lowu, u hlamusela leswaku u lava dyondzo ya Bibele ekaya ra wena kumbe endhawini yin’wana leyi faneleke. Kutani ku ta endliwa malunghiselelo ya leswaku u dyondza leswi engetelekeke hi swikongomelo swa Xikwembu leswaku vanhu va ta tiphina hi vutomi lebyi nga riki na switlhavi.