Ku Sungula Ni Ku Herisiwa Ka Vugandzeri Bya Sathana

Mihivahivana ya vusathana leyi endliwaka emakamareni ya le hansi emunyameni hi vaprista lava ambaleke swiambalo swa ntima, va yimbelelela vahlaseriwa lava bohiweke ealtarini, va khome makhandlela lama voningaka, va hayeka swifaniso leswi chavisaka emakhumbini loko vugandzeri lebyi yaka eka xikwembu xa vona, Sathana, byi ya emahlweni. Loko va ri karhi va hlanganisiwa hi vutivi lebyi tumbeleke bya mihlolo lebyi va nga na byona tanihi ntlawa, lebyi fambisanaka ni vungoma, vantshwa lava hlanganyelaka eswiendlweni leswi swa vungoma va nyanyuriwa swinene hi swilo leswi va swi twaka. Va yi vandzamela va ri karhi va ngheniwa hi moya lowu ngo fikela vona ntsena.

Xana ko va fexeni leyi nga riki na khombo, leyi hundzaka? Kumbe xana i moya wa vudemona lowu funengetaka vanhu va namuntlha?

KU TSARIWE swo tala eka maphepha-hungu, timagazini ni le tibukwini mayelana ni swiendlo leswi tsemaka nhlana swa vugandzeri bya vusathana. Timhaka leti hangalakeke ta madzolonga lama endliwaka hi mintlawa ya vusathana ti haxiwile eka tithelevhixini ni le ka swiya-ni-moya. Byi ve xiphiqo lexikulu emaphoriseni ya le madorobeni lamatsongo ni le madorobeni lamakulu ya le Amerika, Canada na le Yuropa.

Vugandzeri bya Sathana byi phasa ngopfu-ngopfu vantshwa va namuntlha. Musunguri wa Kereke ya Sathana u nyika xivangelo xa kona, hi laha swi vikiweke ha kona eka magazini lowu nge ’Teen wa June 1993: “Ematshan’weni yo byela swirho swa kereke ya hina leswaku swi sivela ku navela ka swona ka ntumbuluko, hi swi byela leswaku swi fanele swi enerisa ku navela ka swona. Leswi swi katsa ku navela ka miri, ku navela ku rihisela ni ku navela ku kuma swilo leswi vonakaka.”

Sathana u fanele a tsakisiwa swinene hi mianakanyo leyi yi kucetelaka ya vudiyavulosi, tanihi leswi yi lwisanaka ni minsinya ya nawu ya Vukreste leyi huhuteriweke hi Xikwembu!

Vugandzeri bya Sathana bya andza. I khombo leri kulaka, kambe ku herisiwa ka byona ku kwala nyongeni. Xikwembu xa byona xi avanyiseriwe rifu. Swi tano ni hi misava ya Sathana ni vaseketeri va yona, hikuva “misava hinkwayo yi le hansi ka matimba ya Lowo biha.” (1 Yohane 5:19; Varhoma 6:16) Eka vagandzeri va Sathana ni le ka van’wana hinkwavo lava va swi tivaka kumbe lava nga swi tiviki leswaku va endla ku rhandza ka Sathana, rungula ra Yehovha hi leri: “Xikwembu lexi nyikaka ku rhula, xi ta hatla xi pfotlosela Sathana ehansi ka milenge ya n’wina.”—Varhoma 16:20.

Kutani hi byihi vumundzuku lebyi humaka eka “Xikwembu lexi nyikaka ku rhula” lebyi nga ta fikela vanhu lava xanisekaka? Swihloko swinharhu leswi landzelaka swi ta kombisa ku andza ni ku herisiwa ka vugandzeri bya Sathana ni swiyimo leswi nga ta byi siva emisaveni.