Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g95 1/8 matl. 3-4
  • Vuhlakari—Xana Bya Ku Tshinelela?

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Vuhlakari—Xana Bya Ku Tshinelela?
  • Xalamuka!—1995
  • Swihloko
  • Tinhlokomhaka Tin'wana Leti Yelana Na Yona
  • Vuhlakari I Yini?
  • Vuhlakari—Xana U Nga Langutana Njhani Na Byona?
    Xalamuka!—1995
  • Vuhlakari—I Mani A Nga Le Khombyeni Naswona Ha Yini?
    Xalamuka!—1995
  • Ndlela Yo Langutana Ni Ntshikilelo Lowu Vangiwaka Hi Ntirho
    Xalamuka!—2014
  • Swingheniso Leswi Hi Nga Swi Tirhisaka
    Vutirheli Bya Hina Bya Mfumo—2014
Vona Swo Tala
Xalamuka!—1995
g95 1/8 matl. 3-4

Vuhlakari—Xana Bya Ku Tshinelela?

HI MUYIMERI WA XALAMUKA! WA LE JAPANI

“Vaphameri va xisati eSweden, vadyondzisi eJapani, vatirhi va le posweni eAmerika, vachayeri va mabazi eYuropa ni vatirhi vo hlengeleta swilo, hinkwako va vonaka va tshikileriwa hi ntirho.”—MAINICHI DAILY NEWS.

NOBUAKI a a karhele. U tirhe vusiku na nhlekanhi, a thola vatirhi va 130 hi tin’hweti ta mune ntsena. A a ri mulanguteri wa rhavi lerintshwa ra nxaxamelo wa mavhengele lamakulu eJapani, naswona eka matshalatshala yakwe ya ku hiteka, u thole vanhu lava a va tsandzeka ku fikelela mimpimanyeto leyi a yi languterile. A va lwa ni ku vilela hi xiyimo xa ntirho wa vona. Ku tlula kwalaho mutirhi un’wana wa xinuna u tlhake ni mutirhi wa xisati. Nobuaki a a pandziwa hi nhloko masiku hinkwawo. Ku nga ri khale a nga ha swi koti ku ya entirhweni, naswona loko a tisindzisa ku ya entirhweni, a hatla a vuya ekaya. A a hlakarile ku fana ni mencisi lowu tshweke wu hela.

Vamanana va mindyangu va nkarhi hinkwawo na vona va hlakala. Endzhaku ka malembe mambirhi a ri ekaya ka yena ni vana va yena vanharhu, Sarah u sungule ku ka a nga ha swi koti ku lehisela vana va yena mbilu. U te: “A ndzi vona onge ndzo tshamela ku endla swilo ndzi nga heti.” Loko manana a tirhela ku kuma mali a tlhela a kurisa vana, swa olova leswaku a khomiwa hi vuhlakari. Loko a ri ni malembe ya 40, Betty u tikume a ri eka xiyimo xo lwela ku va manana ni ku hetisisa ntirho-vutomi, a a ringeta ku endla mintirho hayimbirhi hi ku hetiseka. U ringete ku tsakisa un’wana ni un’wana—nuna wa yena, vana va yena, muthori wa yena ni vatirhi-kulobye. Nsunsumeto wa ngati a wu tlakukile swinene lerova a a nyenyetsiwa hi swilonyana switsongo. U khomiwe hi vuhlakari.

Ku hlakala ku hlasela ni vanhu lava ku nga ehleketiwiki leswaku ku nga va hlasela. Shinzo mutirheli wa Vukreste la nga ni vuswikoti a a ri ni migingiriko ni vuswikoti byo anakanya. U ye a ya pfuna endhawini leyi a ku ri ni xilaveko lexikulu xa vadyondzisi va Vakreste. Hambi swi ri tano, ku nga si hela tin’hweti ti nga ri tingani u titwe a karhele, ivi a tipfalela ekamareni ra yena ro etlela ka rona siku hinkwaro. U titwe onge u le muhochweni lowu swi nga kotekiki ku huma eka wona. A swi n’wi nonon’hwela ku ehleketa, hambi ku ri ku ehleketa leswi a nga ta swi dya ni nhlikanhi. A a nga naveli ku endla nchumu. A a hlakarile hi ku helela.

Vuhlakari I Yini?

Kutani ke, vuhlakari i yini? Herbert Freudenberger ni valavisisi van’wana va sungule ku tirhisa rito leri exikarhi ka va-1970, ivi ri va rito leri hlamuselaka “xiyimo xa ku karhala lexi vangiwaka hi ku tirhisana ni vanhu eka swiyimo leswi karharisaka mintlhaveko.” Ni “ku karhala ka miri kumbe ka mintlhaveko ngopfu-ngopfu loku vangiwaka hi ntshikilelo wa nkarhi wo leha kumbe ku hanya hi vusopfa.” (American Heritage Dictionary) Hambi swi ri tano, ku ni ku hambananyana kutsongo eka nhlamuselo ya rito leri hi ku ya hi mulavisisi wa kona.

Hambi leswi vuhlakari byi nga riki na nhlamuselo leyi kongomeke ya vutshunguri, vahlaseriwa va voniwa hi swikombiso swo tanihi matshimbi, ku nga hiseki, ku nga pfuni nchumu, ku pfumala ntshembo ni ku nga hanyi kahle emirini. Muhlaseriwa u titwa a karhele ngopfu naswona u nyenyetsiwa hi swilonyana switsongo. Ku hava lexi nga n’wi susumetelaka leswaku a endla xo karhi. Xin’wana ni xin’wana eka yena xi vonaka xi tika, naswona a nga ha lava mpfuno hi mbilu ya yena hinkwayo eka un’wana ni un’wana loyi a hlanganaka na yena. Ku tikarhata entirhweni ni le kaya swi nga ha vonaka swi nga pfuni nchumu. Kutani ku pfumala ntshembo ka sungula. Loko u ri ni swikombiso leswi fambisanaka ni ku titwa u nga hanyanga kahle, u nga tsakisiwi hi nchumu, swi nga endleka u khomiwa hi vuhlakari.

Vuhlakari byi nga ha khumba vutomi bya le ntirhweni ni bya ndyangu. U fanele ku byi papalata. Kambe u nga byi papalata hi ndlela yihi? Leswaku u swi kumisisa kahle a hi rhange hi vona leswaku i vamani lava talaka ku hlaseriwa hi vuhlakari ni xivangelo xa kona.

[Bokisi leri nga eka tluka 4]

Swikombiso Swa Ku Hlakala

“Ku hlakata hi ntirho swi vula xiyimo xa mianakanyo lexi hetaka munhu matimba, lexi vangiwaka hi ntshikilelo wa ku tirha u nga wisi, leswi vangaka:

1. Ku va ni matimba lamatsongo

2. Ku tsana ka nsivela mavabyi

3. Ku engeteleka ka ku nga eneriseki ni ku pfumala ntshembo

4. Ku engeteleka ka ku xwa ngopfu entirhweni ni ku tsandzeka ku tirha entirhweni.

“Xiyimo lexi xi heta matimba hikuva xa swi kota ku tsanisa, hambi ku ri ku onha, minkarhi yin’wana xi onha rihanyo lerinene, matimba, ni le ka vanhu lava nga ni vuswikoti. Xivangelo-nkulu i ntshikilelo wa nkarhi wo leha, wa siku na siku, n’hweti na n’hweti na lembe na lembe.”—The Work/Stress Connection: How to Cope With Job Burnout, hi Robert L. Veninga na James P. Spradley.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela