Tibuku Ta Bibele Ta Tlangeriwa Le Khale Ka Soviet Union

Hi muyimeri wa Xalamuka! eRussia

EKU sunguleni ka 1991, khale ka tiko leri a ri vitaniwa Soviet Union, a ri vumbiwe hi Russia ni tiriphabliki tin’wana ta 14. Ku sukela kwalaho, tiriphabliki ti ve matiko lama tifumaka. Hambi swi ri tano, Russia ri ni vaaki vo tala ku tlula va matiko laman’wana ya 14 va hlanganile naswona, yi na ndhawu yo tlula ya wona hi makhamba manharhu. Hi September 1994, a ku ri na 117 276 wa Timbhoni ta Yehovha ekhale ka Soviet Union leti a ti avelana ni vaakelani va tona mintiyiso ya Bibele.

Namuntlha nhlayo leyikulu ya timagazini ta Xihondzo xo Rindza na Xalamuka! ta kandziyisiwa le Russia n’hweti yin’wana ni yin’wana leswaku ti tirhisiwa le khale ka Soviet Union. Ku engetela kwalaho, swiphephana ni tibuku leti rhungiweke to tala ta karhi ta hangalasiwa kwalaho. Leswaku tibuku leti ta Bibele ti tlangeriwe hi vuenti swi vonaka kahle eka mapapila lama amukeriweke hi hofisi ya le Russia ya Timbhoni ta Yehovha ekusuhi na St. Petersburg.

Timagazini Ta Mivala Ta Tlangeriwa

Wanuna wa le Siberia-xikarhi u tsarile: “Ndzi lo tshika ndzo vona Xihondzo xo Rindza xi khomiwe hi mutirhi-kulorhi. Ndzi n’wi kombele leswaku a ndzi komba xona. Eku sunguleni ndzi lo hundzisa mahlo ntsena eswifanisweni leswi kokaka mahlo swa mivala-vala. Ivi ndzi xi hlayisisa . . . Loko ndzi ku phapha, a ndzi hlaye magazini hinkwawo. Swivutiso swa kona swi vutisiwe hi ndlela leyi tsakisaka, leyi hanyaka ni yo burisana.”

Wanuna un’wana wa le Siberia wa hlamusela: “Ndzi lo tshika ndzi kume nkandziyiso wa magazini wa n’wina hi xiwelo. A ndzi lavi ku hundzeleta ku mi bumabumela, kambe leri i rungula lerinene ku tlurisa leri ndzi tshameke ndzi ri hlaya hi ta ripfumelo.”

Muongori wa le St. Petersburg, doroba-nkulu ra vumbirhi hi vukulu eRussia u tsarile: “Ndzi tlangela swinene nongonoko wa swihloko swa Xalamuka! ya January 8, 1995, leswi a swi vulavula hi vuhlakari. Swihloko leswi a swi susanga swiphiqo swa mina kambe swi ndzi nyike nseketelo lowu a ndzi wu yimerile ni lowu a ndzi wu lava.”

Xichudeni xa malembe ya 17 hi vukhale xi tsarile: “Ndzi ba mandla ndzi vuyelela eka hinkwavo lava kandziyisaka tibuku letinene swonghasi. Loko mina ni vanakulorhi hi huma eholweni ya tibayisikopo, hi vone timagazini ti nga ri tingani ti sele ehenhla ka xitulu lexi a xi nga ri na munhu. Hi ti tekile. . . . Loko ndzi ri karhi ndzi hlaya Xihondzo xo Rindza, a ndzi nga swi kholwi leswi a ndzi swi vona. Xana swi ta endleka hi ndlela yoleyo enkarhini lowu taka? Sweswi ndzi hlaya Tievhangeli naswona ndzi ringeta ku ti twisisa. Timagazini ta n’wina ti hlamusela leswi Bibele yi swi vulaka hi laha ku heleleke.”

Wanuna wa malembe ya 26 hi vukhale u te: “Ndzi tlangela swinene xihloko lexi nge ‘Xana Ku Tidlaya I Ntlhantlho?’ eka Xalamuka! ya April 8, 1994. Hikwalaho ka mboyamelo wa mina wa gome ni mukhuva wa ku tlangisa swirho swa rimbewu, minkarhi yo tala ndzi anakanye ku tidlaya. Kambe Rito ra Xikwembu ni swikhongelo leswi yaka eka Yehovha swi ndzi sirhelerile leswaku ndzi nga herisi vutomi bya mina. Xihloko lexi xi tiyise ntshembo wa mina etintswalweni ta Xikwembu ni ntshembo wa mina wa leswaku Xikwembu xi ta ndzi pfuna ku langutana ni swiphiqo swa mina. Xa ku vona ku tisola ka mina. Xi lava leswaku ndzi hanya. Ndzi nkhensa nseketelo wa xona lowu xi wu nyikeleke hi xihloko lexi.”

Mayelana na xona xihloko lexi xa Xalamuka!, nhwanyana wa malembe ya 15 hi vukhale u hlamuserile: “Magazini lowu wu khumbe vutomi bya mina swinene. Loko ndzi ri na malembe ya nhungu hi vukhale, ndzi sungule ku anakanya leswaku ku hava munhu loyi a ndzi lavaka. Vatswari va mina a va nga ri na nkarhi wo vulavula na mina, ndzi ringete ku tlhantlha swiphiqo swa mina hi ndzexe. Ndzi tihambanisile. A ndzi holova ni maxaka ya mina nkarhi hinkwawo. Kutani ku ta mianakanyo ya ku tidlaya. Kunene a ndzi tsakile loko ndzi hlangana ni Timbhoni ta Yehovha!”

Wansati wa le xiphen’wini xa Yuropa eRussia u te: “Ndzi tshame ndzi twa bulo ra Bibele ra majaha mambirhi exiticini xa tibazi. Ndzi ri tsakerile ivi ndzi ya eka vona. Majaha lawa ya ndzi nyike kopi ya Xihondzo xo Rindza. Hi ntsako ni ku swi rhandza, ndzi hlaye magazini lowu, naswona ndzi lava ku tiva leswi engetelekeke hi Bibele. Ndzi rhandza ku hlangana na n’wina hi timagazini ta n’wina, naswona ndzi lava ku tiva ni ku dyondza Bibele nkarhi na nkarhi.”

Tibuku Tin’wana Ta Tlangeriwa

Wansati lontsongo wa le Caucasus u tsarile: “Wansati un’wana u te ehofisini ya hina ivi a sungula ku vulavula hi muxaka wo karhi wa nhlengeletano. Ndzi vone ntsako ni ku hiseka loku a a ri na kona, ivi swi ndzi tsakisa. Siku leri tlhandlameke u ndzi nyike buku leyi nge U Nga Hanya Hi Masiku aParadeyisini eMisaveni. Ndzi yi hlaye ndzi ku yi bi. A ku ri nchumu lowu hlamarisaka. A ndzi twa onge hi loko endzhaku ko guguruteka emunyameni ndzi kume nyangwa lowu ndzi yisaka eku vonakaleni. Endzhaku ko lava nkarhi wo leha hi ndlela leyi, ndzi kume tinhlamulo ta swivutiso swa mina hinkwaswo ebukwini yin’we ntsena. Lowu i ntsako lowu nga hlamuselekiki.”

Wanuna wa le Asia-Xikarhi u tsarile: “Ndzi mufundhisi wa Kereke ya Mahungu Lamanene ya vuevhangeli. Hi ku xiya swinene ku kayivela ka tibuku ta swa moya. Hi mahlo-ngati hi kombela leswaku mi hi rhumela swibukwana, tibuku ni tibroxara, to dyondza ha tona ni to ti avela van’wana.”

Munhu un’wana wa le Armenia, ekusuhi ni Lwandle ra Ntima, u tsarile: “Ndzi hlaye broxara leyi nge Xana Xikwembu Xa Hi Khathalela Hakunene?, ndzi ri a swi fana ni ku hefemula moya wo tenga. Ndzi kale ndzi kuma tibuku leti nga ta ndzi pfuna ku dyondza Bibele. Hi ku titsongahata ndzi kombela mi ndzi rhumela tibuku to tano to dyondza.”

Wansati wa le Siberia u te: “Un’wana wa Timbhoni ta Yehovha u hi endzerile ekaya ka hina ivi a hi siyela kopi ya buku leyi nge Nghwazi Leyi Tshameke Yi Hanya. Hambi leswi ndzi veke mulandzuri wa vukona bya Xikwembu hi mpfhuka ndzi nghena xikolo, leswi ndzi swi hlayeke swi ndzi khutaze leswaku ndzi anakanyisisa hi vuenti naswona ndzi sungula ku dyondza Bibele.”

Mana wa vana vambirhi u be mandla mayelana ni vutomi bya Yesu Kreste ivi a hlamusela a ku: “Ya twisiseka eka vana naswona ya va tsakisa. Yi pfuxa ku navela loku engetelekeke ko dyondza Bibele ni ku hlaya tibuku ta vukhongeri. Buku leyi yi kandziyisiwe ni ku endliwa hi ndlela leyinene.”

N’wexemu vanhu va 34 608 va le khale ka Soviet Union va kombise ku tlangela ka vona ka leswi va swi dyondzeke hi ku khuvuriwa. Onge tibuku leti ti sekeriweke eBibeleni leti kandziyisiweke hi Timbhoni ta Yehovha ti nga hangalasiwa hi xitalo ni ku amukeriwa swinene exiphen’wini lexi xa misava, naswona onge magidi man’wana yo tala ma nga amukela mintiyiso ya Bibele leyi ti yi tameleke!