Ndlela Leyi U Nga Hanyaka Hi Masiku Ha Yona
TANIHI leswi swi nga erivaleni leswaku miri wa munhu wu ni vuswikoti bya ku va ni vutomi byo leha ku tlula lebyi vanhu va byi tsakelaka namuntlha, van’wana va veka ntshembo wa vona eka sayense leswaku va tshubula ndlela leyi hi nga hanyaka hi masiku ha yona. Dok. Alvin Silverstein u tsarile: “Loko hi ri karhi hi kuma vutivi lebyi engetelekeke lebyi heleleke bya tikhemikhali ta miri ni ndlela leyi ti tirhisanaka ha yona, hi ta paluxa xikongomelo xa vutomi. Hi ta yi twisisa . . . ndlela leyi munhu a dyuhalaka ha yona.”
Hi vuyelo byihi? Swi ta hi yisa “enguveni leyintshwa ematin’wini ya munhu,” ku vule Silverstein. “A ku nge he vi na vanhu ‘vo dyuhala,’ hikuva vutivi lebyi nga ta pfumelela ku hluriwa ka rifu byi ta tlhela byi tisa vuntshwa lebyi nga heriki.”
Xana vanhu va ta swi endla leswi? Bibele ya tsundzuxa: “Mi nga tiṭhembeleni tihosi, hambi v̌a ri v̌ana v̌a v̌anhu la’v̌a hlulekaka ku ponisa, ku hefemula ka v̌ona loko ku hela, v̌a tlhelela e nṭhurini; kutani hi siku rolero makungu ya v̌ona ma ta hela.” (Pisalema 146:3, 4) Vanhu va tsandzekile ku kuma, hambi ku ri ku lulamisa ku tsana loku munhu a velekiwaka na kona, loku vangaka ku dyuhala ni rifu, hi laha hi swi voneke kahle ha kona. I Muvumbi wa hina ntsena la nga swi endlaka sweswo.
Kambe, xana i xikongomelo xa Xikwembu leswaku vanhu va hanya emisaveni hi masiku?
Xikongomelo Xa Xikwembu
Xana Yehovha Xikwembu u veke mpatswa wo sungula wa vanhu leswaku wu hanya kwihi? A ku ri eparadeyisini ya laha misaveni. Naswona wu lerisiwe ku “[tswalana, wu] anḍa‚ [wu] tata misav̌a‚ [wu] yi fuma.” (Genesa 1:28) Ina, xikongomelo xa Xikwembu a ku ri leswaku hi ku famba ka nkarhi, misava hinkwayo yi akiwa hi ndyangu wa vanhu lavo lulama lava tshamaka swin’we hi ku rhula ni ntsako.—Esaya 45:18.
Hambi leswi xigwevo xa rifu xi nyikiweke Adamu hikwalaho ka ku nga yingisi kakwe, xikongomelo xo sungula xa Xikwembu xa leswaku vanhu va hanya hi masiku aParadeyisini emisaveni a xi cincanga. (Genesa 3:17-19) Xikwembu xi ri: “Hi laha nḍi v̌uleke ha kona, nḍi ta endlisa ŝeŝo.” (Esaya 46:11; 55:11) Xikwembu xi kombise leswaku xikongomelo xa xona malunghana ni misava a xi cincanga loko xi te: “La’v̌o lulama v̌a ta fuma misav̌a, v̌a ta ṭhama ka yona hi masiku.”—Pisalema 37:29.
Leswi xi nga Muvumbi wa hina, Xikwembu xi ta lulamisa xiphiqo lexi endleke leswaku vanhu va dyuhala ni ku fa. Xana leswi xi swi endla exisekelweni xihi? Tanihi leswi xiphiqo xolexo xi kumiweke eka munhu wo sungula Adamu, tanihi ndzhaka, Xikwembu xi lunghiselele vutomi lebyi hetisekeke bya N’wana wa xona tanihi gandzelo ra nkutsulo, Yesu Kreste, “leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.”—Yohane 3:16; Matewu 20:28.
Xisweswo, kahle-kahle Yesu Kreste u sive, Adamu wo sungula tanihi tata wa hina, kumbe munyiki wa vutomi. Hi yona mhaka leyi eBibeleni Yesu a vuriwaka “Adamu lowo hetelela.” (1 Vakorinto 15:45) Kutani ematshan’weni ya ku va lava faneriwaka hi ku fa tanihi vana va Adamu wa mudyohi, vanhu lava yingisaka va nga ha langutiwa va ri lava faneriwaka hi ku kuma vutomi lebyi nga heriki tanihi vana va “Tatana l’a nga riki na ku hela,” Yesu Kreste.—Esaya 9:6.
Kavula, “Hosi ya minkarhi hinkwayo” “tata wa Hosi ya hina Yesu Kriste” i Yehovha Xikwembu. (1 Timotiya 1:17; Nhlavutelo 15:3; Vakolosa 1:3) Kambe Yesu Kreste, hambi leswi a hlamuseriwaka tanihi “Tatana l’a nga riki na ku hela” ni “Mulondzovoti,” u tlhela a vuriwa “Hosi ya ku rula.” (Luka 2:11) Tanihi muyimeri wa Tata wa yena, Kreste u ta tirhisa vulawuri bya vuhosi leswaku a tisa ku rhula emisaveni.—Pisalema 72:1-8; 110:1, 2; Vaheveru 1:3, 4.
Ehansi ka ku fuma ka Yesu Kreste, misava ya Paradeyisi leyi lahlekeke yi ta tlhela yi kumiwa. Yesu u vule leswaku leswi swi ta humelela “loko swilo hinkwaswo swi ta va swi vuyeteriwile, ni loko N’wana-wa-Munhu a tshamisile exiluvelweni xa yena lexo kwetsima.” (Matewu 19:28) Valandzeri lavo tshembeka va Kreste—hinkwavo ka vona va ri 144 000—va ta fuma na yena emisaveni ya Paradeyisi. (2 Timotiya 2:11, 12; Nhlavutelo 5:10; 14:1, 3) Timiliyoni ti ta vuyeriwa eka mfumo wolowo wo lulama hi ku tsakela vutomi aParadeyisini emisaveni. Exikarhi ka tona ku ta katsiwa ni xigevenga lexi feke etlhelo ka Yesu lexi Yesu a xi tshembiseke a ku: “U ta va na mina eParadeyisini.”—Luka 23:43.
Xisweswo, hambi ku ri vafi lava nga lulamangiki va ta pfuxiwa naswona va ta nyikiwa nkarhi wo fanelekela vutomi lebyi nga heriki emisaveni. (Mintirho 24:15) Bibele yi hlamusela ku herisiwa ka vuvabyi, ku dyuhala ni rifu hi laha ku faneleke loko yi ku: “Xikwembu hi xoxe xi ta va na vona, xi va Xikwembu xa vona. Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Nhlavutelo 21:3, 4.
Ndlela Yo Hanya Hi Masiku
Handle ko kanakana wa swi lava ku va exikarhi ka lava nga ta fuma misava ni ku tshama eka yona hi masiku. Loko swi ri tano, u fanele ku fikelela swilaveko swa ku hanya hi masiku eParadeyisini. Exikhongelweni xakwe lexi yaka eka Tata wa yena wa le tilweni, Yesu Kreste u vule xilaveko xa xisekelo, a ku: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.”—Yohane 17:3.
Timbhoni ta Yehovha ti ta tsakela ku ku pfuna leswaku u nghenisa vutivi lebyi byi nyikaka vutomi. Ti kombele, naswona ti ta ku endzela hi nkarhi lowu faneleke, a ti nge ku hakerisi naswona ti ta ku hlamusela xikongomelo xa Xikwembu xa ku pfuxela vanhu eku hetisekeni hi tlhelo ra moya ni ra nyama. Tiyiseka leswaku Muvumbi wa hina wa matimba hinkwawo u ni vuswikoti lebyikulu byo lulamisa ku tsana ka ku nga hetiseki loku vangaka ku dyuhala ni rifu. Nkarhi wa ta, naswona wu tshinele, lowu ha wona vutomi byi nga ta ka byi nga ha komi ku fana na sweswi. Yehovha u ta katekisa vanhu va yena hi “v̌utomi, hi laha ku nga heriki.”—Pisalema 133:3.
[Xifaniso lexi nga eka tluka 10]
Ehansi ka ku fuma ka Kreste hosana, ku dyuhala ni rifu swi ta hluriwa