Ku Wisa Marhangu Leswaku Hi Aka Mabuloho

NDYANGU kumbe tiko leri hi velekeriweke eka rona a hi tihlawulelanga, naswona a hi tihlawulelanga leswaku i ndhavuko wihi lowu nga ta lawula ndlela leyi hi anakanyaka ha yona. Eka swilo swo kota leswi a hi nga ri na rito. Hinkwerhu swi hi endlekele hikwalaho ka nkarhi ni xiyimo. Kambe hi nga yi lawula ndlela leyi hi langutaka van’wana ha yona ni ndlela leyi hi va khomaka ha yona.

Bibele yi hlamusela ndlela leyi hi nga swi endlaka ha yona. Anakanya hi misinya ya milawu yi nga ri yingani leyi nga ta hi pfuna ku aka mabuloho ya ku vulavurisana ni lava va nga ha vaka va huma eka mindhavuko leyi nga faniki ni ya hina.

“Xikwembu lexi nga endla misava ni hinkwaswo leswi nga ka yona, . . . Hi munhu un’we xi endlile vanhu van’wana hinkwavo leswaku va eneta misava hinkwayo.” (Mintirho 17:24, 26) Hinkwerhu hi swirho swa ndyangu wun’we wa vanhu, xisweswo hi na swo tala leswi fanaka. Loko hi lava swilo leswi fanaka leswi hi nga na swona swi ta hi olovisela ku vulavurisana. Hinkwerhu hi lava vanghana lavanene naswona hi lava ku titwa hi rhandziwa ni ku xiximiwa. Un’wana ni un’wana u lava ku papalata ku vavisiwa emirini ni le mintlhavekweni. Vanhu va mindhavuko hinkwayo va rhandza vuyimbeleri ni vutshila, va endla mafenya, va lava ku kombisa vumunhu, ni ku lava tindlela to tsaka.

“Mi nga endli nchumu hi moya wa ku tirhandza, kumbe hi ku tidzunisa hi swa hava, kambe un’wana ni un’wana a a titsongahate eka van’wana, a nga anakanyi leswaku wa va tlula hi vunene.” (Vafilipiya 2:3) Leswi a swi vuli swona leswaku hi fanele hi teka van’wana va ri ehenhla ka hina eka xin’wana ni xin’wana. Ku ri na sweswo, hi fanele hi xiya leswaku eswiphen’wini swa vutomi, van’wana va hi tlula. Hi nga tshuki hi anakanya leswaku hina kumbe ndhavuko wa ka hina hi wona wu nga emahlweni eka hinkwaswo leswinene.

“Hikokwalaho, minkarhi hinkwayo loko swi koteka, a hi endleleni vanhu hinkwavo leswinene.” (Vagalatiya 6:10) Ku rhanga hi va ni xinghana ni ku pfuna van’wana, ku nga khathariseki ndhavuko lowu va humaka eka wona, swi nga hoxa xandla swinene eku pfaleni vangwa ra ku vulavurisana.

“Tivani leswi, vamakwerhu lava rhandzekaka: Munhu un’wana ni un’wana a a hatlise ku twa, a hlwela ku vulavula, a hlwela ku kariha.” (Yakobo 1:19) Lava tivaka ndlela leyinene yo vulavula a va fanelanga va vulavula ntsena; va fanele va va vayingiseri lava nga ni ntwela-vusiwana.

“Makungu e mbilwini ya munhu i šihlov̌o ša ku enta, wa ku twisisa o tiv̌a ku ya ka šona.” (Swivuriso 20:5) Hatlisa u vona ndlela leyi munhu a titwaka ha yona ni swivangelo swa ndlela leyi a endlaka swilo ha yona. Dyondza vanhu ku antswa.

“Un’wana ni un’wana wa n’wina a nga tshuki a tikarhatela leswi swi nga swa yena ntsena, kambe a a tikarhatele ni leswi swi nga swa van’wana.” (Vafilipiya 2:4) Vana ni ku anakanyela ko lava ku vona timhaka hi ku ya hi langutelo ra munhu loyi un’wana. U nga vi na vutianakanyi.

Ku Hambana Ka Mindhavuko Exikarhi Ka Timbhoni Ta Yehovha

Leswaku hakunene misinya leyi ya milawu ya tirha swi vonaka hi mpimo lowukulu eka vun’we bya Timbhoni ta Yehovha, leti ti chivirikaka ematikweni ya 232 emisaveni. I vanhu lava humaka “ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato” lava va tiyimiseleke ku landzelela xitsundzuxo xa Yehovha xa rirhandzu eka swilo hinkwaswo.—Nhlavutelo 7:9; 1 Vakorinto 10:31-33.

Timbhoni ha yin’we-yin’we a ti yi languteli ehansi mindhavuko ya van’wana. Naswona lava va hundzukaka Timbhoni a va yi lahli mindhavuko leyi va kuriseriweke eka yona, handle ka loko yi lwisana ni misinya ya milawu leyi nga eBibeleni. Loko swi ri tano va endla mindzulamiso evuton’wini bya vona. Va xiya leswaku ndhavuko wun’wana ni wun’wana wu ni swivumbeko leswi dzunekaka ni leswaku swivumbeko sweswo swi nga antswisiwa eka vanhu lava va amukelaka vugandzeri bya ntiyiso.

Va ringeta hi matimba ku languta pulanete ya hina hilaha Xikwembu xi yi langutaka ha kona—yi vangama, yi ri ya wasi naswona yi xongile—yi ri karhi yi rhendzeleka exibakabakeni. I pulanete leyi nga ni vanhu ni mindhavuko yo hambana-hambana hi ndlela leyi hlamarisaka. Timbhoni ta Yehovha ti rindzele nkarhi lowu hinkwavo emisaveni va nga ta tiphina hi vutomi va ri ndyangu lowu nga ni vun’we hakunene.

[Xifaniso lexi nga eka tluka 1]

Timbhoni ta Yehovha ti dyondze ndlela yo mbundzuxa swihinga swa mindhavuko