Ndlela Yo Hanyisana Ni Vabaleki

EKA Nawu lowu Yehovha Xikwembu a wu nyikeke tiko ra Israyele, Vaisrayele va tsundzuxiwe hi xiyimo xa vona loko va ri vabaleki le Egipta. (Eksoda 22:21; 23:9; Deteronoma 10:19) Kutani, a va leteriwa ndlela leyi va faneleke va hanyisana ha yona ni valuveri lava tshamaka na vona hi musa, kahle-kahle tanihi vamakwavo.

Nawu wa Xikwembu a wu ku: “Loko muluv̌eri [loyi hakanyingi a a ri mubaleki] a luv̌ela e šikari ka ṅwina, e tikweni ra ṅwina, mi nga ṭhuki mi ṅwi šanisa. E muluv̌eri, l’a luv̌elaka e šikari ka ṅwina o ta v̌a ka ṅwina kukotisa uṅwana wa ṅwina; u ta ṅwi ranḍa kukotisa loko u tiranḍa; hikuv̌a a mi ri v̌aluv̌eri e tikweni ra Egipta.”—Levhitika 19:33, 34.

Hi ku vona leswaku hakanyingi vabaleki lavaya a va xanisiwa naswona a va nga sirhelelekanga, Yehovha u nyikele milawu leyi kongomeke leyi khumbanaka ni vuhlayiseki bya vona swin’we ni ku sirheleleka ka vona. Xiya timfanelo leti landzelaka leti a va nyikiwe tona.

MFANELO YA XIGWEVO XA KU NGA YI HI NGHOHE: “Mi ta v̌a ni nawu wuṅwe ka hikwav̌o, wu ta v̌a wuṅwe ka muluv̌eri ni ka l’a tŝariweke tikweni.” “U nga ṭhuki u v̌oyamisa ku lulama ka muluv̌eri.”—Levhitika 24:22; Deteronoma 24:17.

MFANELO YO HLANGANYELA EKU HUMESENI KA VUKHUME: “Kutaku loko ku hunḍile malembe manharu, u ta humesa ŝa v̌ukhume hikwaŝo ŝa leŝi u ŝi ṭhov̌eleke hi lembe leri, u ta ŝi v̌eka e mindyangweni ya wena. Kutani mu-Levi o ta ta hikuv̌a a nga na ku av̌eriwa ni nḍaka na wena, ni muluv̌eri, ni šisiwana ni wansati wa noni, la’v̌a nge mitini ya wena, v̌a ta dya v̌a šura.”—Deteronoma 14:28, 29.

MFANELO YA MUHOLO LOWU RINGANAKA: “U nga ṭhuki u dyelela mutiri wa šisiwana l’a nga mupfumari e šikari ka v̌amakwenu, kumbe šikari ka v̌aluv̌eri la’v̌a nga ta luv̌ela e tikweni ra wena ne mitini ya wena.”—Deteronoma 24:14.

MFANELO YA VUCHAVELO EKA LOYI A TSHUKAKA A DLAYA MUNHU KU NGA RI HA VOMU: “E miti leyi ya 6 ŝi ta v̌a ŝitšhav̌elo ŝa v̌ana v̌a Israel, ni ŝa muluv̌eri l’a akeke šikari ka v̌ona, leŝaku mani na mani l’a dlayeke munhu, ku nga ri ha v̌omu, a ta tiv̌a ku tšhav̌ela kona.”—Tinhlayo 35:15.

MFANELO YO KHWAJA: “Loko mi ṭhov̌ela e tikweni ra ṅwina, u nga fiki makuṅweni ya nsimu ya wena hi ku ṭhov̌ela, u nga ka u nga roleli le’ŝi seleke e ku ṭhov̌eleni ka wena. U nga ṭhuki u kha le’ŝi seleke vinyeni ya wena, ni ku rolela e mihanḍu le’yi weke nsiṅwini ya wena. U ta ŝi ṭhikela šisiwana ni muluv̌eri. Hi mina Yehova, Šikwembu ša ṅwina.”—Levhitika 19:9, 10.

Hakunene, Muvumbi wa hina Yehovha Xikwembu, u ni ntwela-vusiwana eka vabaleki, naswona u fanele a tsaka loko na hina hi va twela vusiwana. Muapostola la nga Mukreste Pawulo u tsarile: “Tekelelani Xikwembu, naswona mi hambeta mi famba erirhandzwini.”—Vaefesa 5:1, 2, NW.

[Xifaniso lexi nga eka tluka 1]

Boy on left: UN PHOTO 159243/J. Isaac