Langutelo Ra Bibele

Xana Swi Fanerile Ku Venga Vanhu Va Tinxaka Tin’wana?

XANA a wu ta titwa njhani loko vanhu va ku teka tanihi mukanganyisi, u ri ni tihanyi, xilema kumbe u ri ni mahanyelo yo biha ntsena hileswi u nga wa rixaka ro karhi?a Swi le rivaleni leswaku a wu nga ta swi tsakela. Lexi twisaka ku vava hi leswaku vanhu vo tala va tekiwe hi ndlela yoleyo. Ku tlula kwalaho, ematin’wini hinkwawo vanhu vo tala lava nga riki na nandzu va khomiwe hi tihanyi hambi ku ri ku dlayiwa, ntsena hileswi va nga va rixaka rin’wana kumbe va tiko rimbe. Entiyisweni, ngati leyi halakaka etinyimpini to tala namuntlha yi vangiwa hi ku vengana ka tinxaka. Kambe vo tala va vanhu lava seketelaka tinyimpi teto va vula leswaku va ni ripfumelo eka Xikwembu ni le Bibeleni. Naswona ku ni lava va vulaka leswaku xihlawuhlawu xi ta tshama xi ri kona—vanhu va tswariwa na xona.

Xana Bibele ya swi pfumela leswaku tinxaka ti vengana? Xana swi kona swiyimo leswi pfumelelaka ku venga lava va nga ni ndhavuko kumbe va ri va rixaka leri hambaneke? Xana wu kona ntshembo wa leswaku enkarhini lowu taka ku vengana ka tinxaka swi ta pfumeleriwa? Xana Bibele yi ri yini?

Va Vengiwa Hikwalaho Ka Swiendlo Swa Vona

Ku languta ndlela leyi Xikwembu a xi hanyisana ni vanhu ha yona eku sunguleni, handle ko tinyika nkarhi wo kambisisa kahle u nga ha fikelela makumu lama hoxeke—swo fana ni leswaku Xikwembu a xi khutaza ku vengana ka tinxaka. Xana tindhawu to tala eBibeleni a ti kombisi Xikwembu tanihi lexi dlayaka rixaka hinkwaro ni matiko? Ina, kambe loko u kambisisa hi vukheta, swa vonaka leswaku Xikwembu xi avanyise vanhu lava hikwalaho ka mahanyelo ya vona yo biha lama nga xiximiki nawu kambe ku nga ri hi leswaku i va rixaka rihi.

Hi xikombiso, Yehovha Xikwembu a a venga Vakanana hikwalaho ka leswi a va tikhoma hi ndlela yo biha hi tlhelo ra rimbewu ni mihivahivana ya vudimona. A va hisa ni vana va vona va endlela swikwembu swa hava magandzelo! (Deteronoma 7:5; 18:9-12) Hambiswiritano, ku ni minkarhi laha Vakanana vo karhi va kombiseke ripfumelo eka Xikwembu kutani va hundzuka. Hi ku pfumelelana ni leswi va swi endleke Yehovha u va tsetselerile kutani a va katekisa. (Yoxuwa 9:3, 25-27; Vaheveru 11:31) Wansati un’wana wa Mukanana, Rahava, u kale a va kokwa wa Mesiya la tshembisiweke, Yesu Kreste.—Matewu 1:5.

Nawu lowu Xikwembu xi wu nyikeke Vaisrayele wu kombisa leswaku a xi nga yi hi nghohe. Ku hambana ni sweswo, xi kombisa nkhathalelo wa xiviri eka vanhu hinkwavo. Eka Levhitika 19:33-34, hi kuma xileriso xa Xikwembu lexi kombisaka tintswalo, lexi kongomisiweke eka Vaisrayele: “Loko muluveri o tshuka a tshama na n’wina a luvela etikweni ra n’wina, mi nga tshuki mi n’wi xanisa. Muluveri la luvelaka eka n’wina u fanele a va tanihi munhu la tumbulukeke eka n’wina; mi fanele mi n’wi rhandza kukota n’wina, hikuva mi ve valuveri etikweni ra Egipta. Hi mina Yehovha Xikwembu xa n’wina.” Swileriso leswi fanaka swa kumeka ebukwini ya Eksoda ni ya Deteronoma. Swi le rivaleni leswaku Yehovha a nga swi amukeli ku vengana ka tinxaka. U khutaze ntwanano exikarhi ka tinxaka.

Yesu U Khutaze Leswaku Tinxaka Ti Amukelana

Loko Yesu a ri emisaveni, Vayuda ni Vasamariya a va ri ni mboyamelo wo honisana. Ku ni nkarhi wun’wana laha vanhu va le Samariya va hlongoleke Yesu, ntsena hi leswi a ri Muyuda la nga le ndleleni yo ya eYerusalema. Xana a wu ta angula njhani loko u hlongoriwa hi ndlela leyi? Vadyondzisiwa va Yesu va nga ha va va kombise rivengo ra nkarhi wolowo loko va n’wi vutisa: “Hosi, xana u lava hi byela ndzilo wu xika hi le tilweni kutani wu va lovisa?” (Luka 9:51-56) Xana Yesu u pfumelele moya wolowo wa rivengo wa vadyondzisiwa vakwe wu n’wi lawula? Ematshan’weni ya sweswo, u va tshinyile naswona hi loko a ti lavela ndhawu yin’wana ya byetlelo hi moya wo rhula. Endzhakunyana ka sweswo, Yesu u nyikele xifaniso xa Musamariya wa musa. Xifaniso lexi xi kombise kahle leswaku mhaka ya leswaku u wa rixaka rihi a yi ku endli nala. Ku vula ntiyiso a nga ha va muakelani lonene!

Tinxaka To Hambana-hambana eVandlheni Ra Vukreste

Hi nkarhi wa vutirheli bya yena bya laha misaveni, Yesu a tinyiketele ku dyondzisa vanhu va rixaka ra ka vona. Kambe u kombisile leswaku hi ku famba ka nkarhi tinxaka tin’wana a ti ta va valandzeri va yena. (Matewu 28:19) Xana vanhu va tinxaka hinkwato a va ta amukeriwa? Ina! Muapostola Petro u te: “Hakunene ndza swi xiya leswaku Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:34, 35) Endzhakunyana muapostola Pawulo u kandziyise mhaka leyi erivaleni hi ku vula leswaku ndhavuko wa rixaka ra munhu a wu nga ri wa nkoka evandlheni ra Vukreste.—Vakolosa 3:11.

Xikombiso xin’wana xa leswaku Xikwembu xi amukela vanhu va tinxaka hinkwato xi le bukwini ya Bibele ya Nhlavutelo. Exivonweni lexi huhuteriweke, muapostola Yohane u vone “ntshungu lowukulu . . . wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato,” lowu a wu ponisiwa hi Xikwembu. (Nhlavutelo 7:9, 10) “Ntshungu lowukulu” wu ta va xisekelo xa misava leyintshwa laha vanhu va tinxaka hinkwato va nga ta hanyisana swin’we hi vun’we va lawuriwa hi rirhandzu ra Xikwembu.

Sweswi, Vakreste va fanele va lwela ku nga pfumeleli nsusumeto wo tekela van’wana ehansi hileswi va nga va rixaka ro karhi. Ku teka vanhu ku fana ni munhu un’wana ni un’wana hilaha Xikwembu xi endlaka hakona, naswona ku nga ri ku va languta tanihi vanhu va tinxaka tin’wana i swinene naswona swi kombisa rirhandzu. Xana a hi yona ndlela leyi u lavaka ku langutiwa ha yona? Yesu u hi tsundzuxe hi ndlela leyi faneleke: “Hikokwalaho, swilo hinkwaswo, leswi mi lavaka vanhu va swi endla eka n’wina, na n’wina mi fanele mi swi endla eka vona.” (Matewu 7:12) Ku hanya ni tinxaka tin’wana u nga ri na rivengo swa phyuphyisa. Swi endla leswaku u va ni ku rhula lokukulu ka mianakanyo ni ku rhula ni vanhu van’wana. Xa nkoka ngopfu swi hi endla hi fambisana ni Muvumbi wa hina la nga yiki hi nghohe, Yehovha Xikwembu. Mayana xivangelo lexi twalaka xo hi susumetela ku nga pfumeleli moya wa ku vengana ka tinxaka!

[Nhlamuselo ya le hansi]